حواء السودانية ما لها وما عليها

العبد السلام بن عبدالعزيز
سلام
طول بالك وخلينا نمشى حتة حتة وزنقة زنقة

لا يفوت فطنتك إنو أي علاقة (زوج وزوجة) زي الكائن الحي بتمر بمراحل طفولة وشباب وشيخوخة ودى بالذات مرات بتكون مبكرة ( أعمل حسابك) ، وتتمايز عن غيرها بأنو ليها بنية نفسية وبنية وعي وإسلوب خاص بيها وتحكمها عادات وتقاليد وقيم وثفافة متفاوتة ونسبية في أي زمان ومكان في صيرورة ظروف إقتصادية وإجتماعية متباينة.
مع إحترامي لراي الاديب الطيب صالح (رحمة الله عليه ) .. المكتوب في الستنينات ولكن لو جاءتنا (جين مورس) النصرانية دي ذاتا في الستينيات عشان تعيش معانا المشهد حقنا دا يوميا.:
1- قامت الدغش حلبت غنمها وصررت بعضهم وولعت كانونها وعملت الشاي .
2- قامت وردت ليها جرادل موية من البحر.
3- جات شدت عصيدتها للفطور وسوت شاي الفطور.
4- ولعت نار في التكل وعاست كسرتها لليوم كلوا فطور وغداء وعشاء.
5- شدت حلة ملاحها وعزلت ليها لحمتين ثلاثة ... لزوجها فقط وعلى الزعلان يقع البحر.
6- مشت بى كرعيها سكلبت وعزت وباركت وكفرت وحمدت السلامة وزغردت ونممت وتبادلت الأخبار في القرية والقري المجاورة (تواصل إجتماعي).
7- هاجشت في الشفع وشكت محنهم على الله .(واحد برضع وواحد بتعلم في المشى وواحد في الكلام)
8- مشت بى كرعيها مع زوجها الحواشات في المواسم لقطت قفات القطن إذا عندهم حواشه أو أشتغلت اجيرة إذا ما عندهم حواشة.
9- مشت تيربت وزرعت في البلدات وجمعت الموليتا واللوبا وبامية الويكة وغيرها.
10- مشت فزعت وجمعت حطب القطن والحطب والبعر لتأمين النار لطهو الطعام في جميع المواسم... وكذلك جرت الشوك.
11- شالت المحجين في الصيف لرمي الخورييم والبرييم لعلف بهائمها.
12- رقعت وخاطت الهدوم والعراريق.. ألخ
13- رعت الدجاج والغنم والسخلات والشفع.
14- قامت بنظافة الزرائب وتلييس الغرف والحيشان بالزبالة والطين لتجميل البيت
15- لم تحظى بأي تعليم ولا محو امية.

هل كان يمكن لجين موريس أن تقول كلامها دا لو عايشة في هكذا مشهد؟؟؟؟
وما هى التربية و الوعي والخبرة والمعرفة التي يمكن أن تنتجها وتنقلها لبناتها زوجات المستقبل؟؟؟؟؟
وعواطف (حسنة) دى أراها..... جياشة و أعمق من (جين موريس) لانو مفردة (أبو أولادي) لها حمولتها المفهومية يعني بإختصار بتخجل تعبر عن نفسها بطريقة وإسلوب (جين موريس).... بإعتبار انو مفردة حب دي ذاتا كانت كلمة معيبة زمان ناهيك عن إعلانها.... وعشان ( حسنة) دي تغني شعراؤنا زمان:::::::::::::: في حب يا أخوانا أكتر من كدا:::::::.

المصدر: :::: منتديات أبو فروع :::: - من قسم: منتدى الحوار العام

يعني يا الفاتح لفك ودورانك دا كلو عن برنامج اكل وشراب هذه هي حياة حواء في السودان ما عرفناها راجل ولا مرة يا اخي الحياة اعمق من الخريم والعصيدة (حسنة ) اختصرت كل الحياة في الابوة يني بيعيد عن العين بعيد عن الالب (القلب).

عبدالسلام يا حبيب

أها جينا للنطيط

قلت تريد إصلاحا بهذه السهام .. وانا اريد إنصافا ثم إصلاحا

وتجاهلك لاسئلتى الفوق دى لا يغرى بالمواصلة معاك.(للاعادة )

هل كان يمكن لجين موريس أن تقول كلامها دا لو عايشة في هكذا مشهد؟؟؟؟
وما هى التربية و الوعي والخبرة والمعرفة التي يمكن أن تنتجها وتنقلها لبناتها زوجات المستقبل؟؟؟؟؟

اشتقت اليك فعلمني ان لا اشتاق
تنقل لبنات جنسها ان الرجل قيمة وكنز نادر الوجود ان يعتني بة وليس مفرخ عيال وكفي.

اشتقت اليك فعلمني ان لا اشتاق

حلم الجيعان عيش... ونحن في رحلة الشوق وانت المنتظر الوحيد

تنقل لبنات جنسها ان الرجل قيمة وكنز نادر الوجود ان يعتني بة وليس مفرخ عيال وكفي.

العرجاء لي مــــــراحها... والمراح فيه ما فيه

يعني ي الفاتح ليديك اعتراف ضمني بان هذه المراءة السودانية لا يمكن اصلاحهابدليل العرج البادئ عليها ف هنالك حلان اما الهروب الكبير او اعادة التاهيل .

طرح جيد وشييييييييق جدا والتناول للموضوع من الفاتح نجده أصدق وحاتم محمد دفع الله راس حربه
والدفاع عند الفاتح عبدالله والهجوم مع الحبيب عبد السلام ونحن فراجه ونشجع اللعبه الحلوه وساكتين
على كثير وأسالوا الغالي ياسين عبدالعزيز