رواية سالم ودالسما

[align=right] الفصل الخامس
تجارة الرق اصبحت محرمة بنص القانون منذ ان استولى الانجليز علي مقاليد الحكم في السودان .فالحكام الجدد يتفهمون عادات السودانيين ويطوعون قوانينهم لمواكبتها . فان تصارع شخصان او تضاربا بالسياط في الدلوكة ومات احدهما فلا توجه للجاني تهمة القتل . يعلمون ان القابلات يمارسن الخفاض الفرعوني وسط البنات ويغضون الطرف عن ممارستهن. وذا عينوا شخصاص لتولي منصب عام ورفضه الاهالي فانهم يستبدلوه باخر اكثر قبولاً، وما قصة مفتش مركز رفاعة البرطاني والشيخ عبدالله ابوسن ببعيده عن الاذهان، ففي اول يوم له برفاعة عقد المفتش اجتماعاً بالنظار والعمد وبعد ان اطلع علي الموقف قال مهدداً:
0000 البلد ده عفن .!انا لازم اطهرو.
فهرع النظار الي ابوسن الذي لم يكن حاضراً الاجتماع فاخبروه بما قال المفتش فقال لهم :
0000 اولى بالطهارة هو، لانه اغلف!
وبعد مكالمة هاتفية مع السكرتير الاداري بالخرطوم تلقي المفتش برقية عاجلة باستدعائه الي الخرطوم، وعندما ادرك ان ابوسن وراء نقله سأله:
0000 انا عملت ايه ياشيخ العرب عشان تطلب نقلي ؟
فاجابه بسخريته المعهودة
0000 ماعملت حاجة غلط ياجناب المفتش ،لكن خفنا عليك من العفنة!
اما في الجرائم المتعلقة الاتجار بالرق فلا يبدون اي مرونة او مياسرة .فعقوبة البائع والمشتري والسمسار السجن المؤبد مع الاعمال الشاقة . واذا قال انسان لانسان اخر (ياعبد ) او (ياخادم) وتظلم المجني عليه للمحاكم فعقوبت الجاني الحبس لستة اشهر لا يخففها استئناف او استرحام
0000 صفيحة الطماطم بكم ياسوميت؟
0000 بقرشين ياسيدنا الشيخ .
0000 قرشين ليه ياعبد ياطماع؟ سقيتها علي ضهرك ؟ انت عايز تجيب المجاعة في بلدي وتعيش علي المريسة .
0000 يا جماعة خليكم شاهدين ،الخليفة قسم السيد قال لي ياعبد، ودكريب ،ود ضوين ، خليكم شاهدين، ناكر الشهادة شيطان رجيم ، هبّد بيع لي الطماطم دي انا ماشي ابوعشر اشكي الخليفة قسم السيد
وفي المساء دخل شيخ الحلة ، ودالامين ، وهو يحمل في يده ورقة والاكتأب بادي عليه
0000 سيدنا الخليفة وقع علي الاستدعاء ده من شيخ متولي .
0000 العبد شكاني بالصح؟
ولم يرد عليه ودالامين ، بل اخذ الورقة وخرج. وفي الصباح وصل ود عبد الجليل خفير الناظر متولي الي الساحة
0000 يا ناس ودالماجدي الناظر متولي قال ليكم الحكاية دي كان ما انتهت بالصلح الخليفة بخش السجن.
0000 لاحولة ولاقوة الاالله ، الخليفة ينحبس كيفن؟
0000 الخليفة كان انحبس تاني فايدت حياتنا شنو؟
وعندما راي القرعي ودعبدالجليل توقف عن التهريج، ولما فهم ماكان يدور اقبل نحوه وامسك بقلادة حماره
0000 اسمع ياود عبدالجليل الخليفة قال لسوميت شنو؟
0000 قال ليه ياعبد
0000 انت اكان اديت جرفك لسوميت يزرعو وباع ليك صفيحة الطماطم بقرشين بتقول ليه يا شنو؟
0000 يازول ابعد مني ماتجي لي مصيبة كمان .
0000 الحمار اكان فقس الحصان مايلد فرس ، والحنضل اكان سقو موية سكر ومورقوه بالعنبرمابلد بطيخ وكاكك ....كاكك....كاكك....
وتشغلب في الهواء ثم مشى علي يديه
وفي المساء كان منزل سزميت وكريمة الصغير كتظ بأناس لم تطأ اقدامهم ترابه من قل اذ ليس بينهم شارب مريسة او طالب متعة.؟
0000 السلام عليكم يااهل هذه الدار.
0000 وعليكم السلام .......سيدي الشريف محموداً ! سيدي الشريف مختار ! ود خوجلي !الامين ود الجبارة! انا اخو الفقراء اتفضلوا .اتفضلوا.
0000 ايوي ...يوي ....يوي ....دارنا نورت!
0000 سوي الشاي للجماعة ياكريمة اتفضلوا، اتفضلوا.
0000 عليّ الطلاق مانشرب شاييك لو ماقلت لينا غرضكم مقضي.
0000 غرضك مقضي ياود خوجلي عليّ اللاق اكان ضحت ليكم واحد في اولادي مافي ندامة.
جلس اعضاء الوفد في فناء الدار تحت ضوء القمر الساطع الذي انعكست اشعته علي مياه النيل الازرق. وما ان الاسرة لم تكن كافية فقد جلس بعضهم علي بنابر زبائن المريسة المنتشرة في المكان. وفي لحظة صمت فيها الجميع حمل اليهم النسيم صوت صبي يهش علي ثوره بساقية الخليفة ياسين علي الضفة الشرقية للنيل وهو يغني :
0000 الدنيا ام قدود غشاشة زي الغيمة..
واخوك العزيز ما تبيعو يوم كليمة
وبعد ان شربوا اليمون اعتدل الشريف محموداً في جلسته وبتدأ النقاش بقوله:
0000 ياخوي الخليفة قسم السيد كلامو في خشمو لكن قلبو ابيض زي الحليب
0000 داك الليلة ماقال لود اخته ياعبد؟
0000 ان القدامك ده ماقال لي ياكادير !الكادير مايَّاه العبد!
0000 نحنا كلنا عبيد الله المامعاه سيد
0000 اكان الخليفة انحبس تاني تلقي ليك وش وين تقابل بيه الناس؟
0000 ياناس انا عفيت واتنازلت جيبوا الورقة اكتبوا الصلح اسع دي.
0000 ايوي....يوي....يوي....يوي...
وفي الصباح حمل المك محمدأحمد ناصر الصلح وأخذ معه سوميت وتوجها الي محكمة الناظر متولي في ابي عشر.
0000 جبتو الصلح يامك؟
0000 ايوة جبناه ياحضرة الناظر
0000 الخليفة حضر؟
0000 لا، الخليفة جوه ضيوف من الشقيق اخروه لكن العبد قاعد برة!!
فضحك الناظر متولي وضحك سوميت واعضاء المحكمة وقدم الصلح وشطبت القضية.[/align]

المصدر: :::: منتديات أبو فروع :::: - من قسم: منتدى الشعر والشعراء والأدب