الاخوة الكرام جزيتم خيرا علي المرور و هذا الامر شجعني ان اجتر اياما مضت
كان ذلك في بداية الثمانيات و بعد التخرج عمل معنا بالمالية احد ابنا كريمه و كنا نفطر سويا تصداقنا تناقشنا كان هم الوطن هو الهم المشترك .
كان يعتقد بانني اعرف حميد و قد اندهش حينما عرف انني اجهل حتي شعر حميد
بلهفة اخذني الي بيت العزابة في بيت المال و كانوا يخافون جهاز امن نميري كما كنت اخافه
انتهزنا ليلة شتوية و ذهبنا الي حميد كي نتسمع اليه:
كأنما كان يعرف تعلقي الخرافي انذاك و احترامي لعبد الخالق محجوب له ما عشت ان اختلفت او اتفقت مع االشيوعين بدأ حميد في قراءة
شوق الشوق :
شوك الشوق لى الشوف آ خَىْ
ضارب فِطن النسج الحى
يا منقاش أحزانى إنشرت
وادى الفرح إتمدد صَى
يا راحلين ــ عِـنْ ــ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو:
انتهي نص حميد
القصيدة لا تحمل التأويل لانه قراءة اي نص منها مهما قل في حد ذاته متاهة ابداع
كانت لحميد رؤيته
و رغما عن انف حميد انذاك كانت لي رؤيتي للقصيدة
كان حميد يبحث عن الثورة من خلال تصوريه الرائع للبحث
و كنت ابحث عن راشد ( و كان هذا الاسم الحركي لعبد الخالق ( عليه رحمة الله تعالي )الذي كان يمثل لي اليقظة و الاقدام و الثبات و التضحية و البطولة
بكيت حتي استفرغت الحزن جميعة و دبت في عافية التطلع للمستقبل
رأي الاشباع في كل حواسي
و كانت القارءة الثانية لنورة :-
النص
وكتين يضيع عرق الجباه الشُّم
شمار فى مرقة .. آه .. يا نورة آه
من دربك التوّر نفس خيل الصبر
فتـّر خطاوى الشوق وراه .. يانورة .. آه
ساعة الشموس الغُر تهضلم
تلحق الصِّح .. فى المغارب
يستر الضو الكهارب
تستر المدن السرابية .. الضبابية الكآبة
حائط التيه .. والطشاشات .. فوق قفيِّك
يا أمْ عوارض...
يا أمْ عوارض .. ما دُعاشة ماها شبـُّورة وتقيف .. جايى ليك يا نورة غيمة
تملا ماعونِك خريف
يملا عينيكى ويفضـِّل
يروى جوّاك العطاشا
*****
يا نفس فجر القصايد يا بلادى
القطع قلب الروادى .. بى اللّواج الجاى .. وغادى
ماهو صوتك .. لاها صورتك
دى البترقش نادى فوق صدر الجرايد
إنتى يا حُضن الصحارى
شُفّع العرب الفتارى
البفنـّوا الشايلا إيدمْ
ويجروا كايسين القطارى
لا سراب الصحرا .. موية
ولا حُجار سلّوم .. موائد
حالكم البصرخ وينادى
ياوطن عز الشدائد
*****
يا هُدى الناس الحيارى
يا ندى الفجر الببلِّل نور عِوينات الفقارى
جايى ليك يا نورة
آفة .. للسوس البنقـِّر
عود عِشيماً داخرو فيك
أصلى لمـّن أدور أجيك .. بجيك
لا بتعجّزنى المسافة
ولا بقيف بيناتنا عارض
لا الظروف تمسك فى إيدى
ولا من الأيام .. مخافة
يا نفس فجر القصايد
ما ضِهِبْ فى بعدى عنـِّك
أصلى متغرِّب عشانك
راضى بى الجايينى .. منـِّك
ما شكيت شُح اليالى .. وما بكيت نُحْ .. شِلتوا حالى
رغم إنو الحال بيفضح
إلاّ كٌتْ فى الحارة بصرُخ :
يا وطن عِز الشدايد
انتهي النص
و كان ذلك تطور فاق خيالي
كنا تناقش في التزام ادب الاشتراكية الواقعية متمثلا في الادب السوفيتي بداية بمكسم جوركي و نهاية بادب المقاومة الذي جسده بابلو نيرودا و ناظم حكمت
و محمود درويش
كان محمود درويش في قصائده المعبرة عن المقامومة و الصمود
مديح الظل العالي
بيروت قد وصل في تقييمي القمة
حينما سمعت نورة الاولي
بكيت مرة اخري
هذا الكنز المدفون في العلاقات الشيوعية و بيوت العزابة بجانبي و انا استعرب النضال الفلسطيني ليسطر لي هادي و و حادي مدوزنا لحلم النضال
الله يا حميد حيا و ميتا
بعدها استمعنا لنادوس و كان نصها كما يلي :
تعالي .. فإن الأيادي التي في كتفها صقر قتلننا ثم لم يحيين قتلانا
الحال وراك كيفن تسر .. باقيلك إنتي بلاك في زين
ما تهشم إبريق الرضا .. خنست نسيمات السمح
والبسمة زي حبة قمح
لفحا وطفر طيراً كتر
أورث عصافيري الضنى .. يبس غناها مع الفجر
هطل على الشدر الهموم .. وشاشات نهارات العنا
عانيت وراكي جنس عنا
بوغ سهادي كرو النجوم
خطو المواويل إرتعش
حرس عصاتي بنات نعش
دومست فوق حجر البتول
هلوست بي صلب المسيح
دروش .. شردت من الضريح
شويمت بي ظلم الحسين
أومت علي كم ميضنة
وما بين عيونك والمغول
ساهد بي قافلة الحروف
وإيقاع ظنابير الزمن
إنصربع إيقاع الفصول
هبطت غمامة ورا الجبل
طرحت من الليل الجروف
شهقت شعاب إنساني خوف منك عليك .. على أي زول
توك نياق شوقا الضنا .. سرح عصا التسيار قبل
درب الحياة المرمول فنا
يا وقعة الواقفين هناك .. يا وقفة الواقعين هنا
يا آفة الوطن الجريح .. إشمعنى لا وصلك دنا
لا آفة الزمن المشيح .. قدرت رويحتي تيقنا
من جيتك المرقت بسيم .. الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكية فوق شعب الصبر
ساندتها .. علم بطانا الشيطنة
غنيت معاهم .. سودنا .. يا سودنا .. يا سودنا
لملمتهم والدنيا ليل .. والقمرة بت فاتا القطر
وصف لهم حتة شليل
ردد حروفهم ردتها
وقف سحابي مع الدغش .. شهدتها
شهدت معايا على العذاب .. الهد أطلاع الغبش .. راعفتها
تكلت خدودا على بكاي .. لاقيت سجون .. جاهد بها
بي جيهة الجذب القديم .. دخلت مكندك بالشباب .. خنت التراب .. راودتها
فوق ها التراب .. واعدتها
لا إنتي جيتي ولا هي آه .. روحت وين
يا زين مرقت مشيتي وين
كل البنات جو من الملي
هشت بكت شدت حكت .. وأزيارنا والمرحات خلي
يا إنتي يا مرت العدل .. ماك في صعيداً تترجي
روحت وين .. قوليلنا بس من الغلبان تجي
لو فينا أطلعي مننا .. أو برة أدخلي .. أدخلي
غنيتك البارح براي .. إنصلبتو التانيين غناي
والليل بتواتاك شعر .. دونو إنعتاقك أو فناي
هيا يا مغنين الشعر .. ضد ها الزمان وطبنجتو
شعر الشعر .. شعر أيوة يلا علينا جاي
ونكر المغني كمنجتو
نادوس يا فجر القصائد إندلق
ما حك جلدك مثل ظفرك فانطلق
إنا شرحنا لك صدرك .. أو شرخنا فانعتق
يا أنت يا كل الذين لأجل خاطرهم طهوت غداة عقم زهور كلم لتنفتق
غضباً يؤرق موقديه .. كورته ..
رجماً لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك .. تبت يدا كل الذين تغامزو
وتهامزو .. وتلامزو .. وتقززو .. وتلذذو
من فيه جرحك يا وطن
نادوس آه .. نادوس يا ...
أمسينا يا نادوس واصبحنا بيك يا أم
يا سوسة ضد السوس .. قلباً بلاكي يضم
ليل الضياع مهووس .. يحلم هواك يؤم
بعض الحصاد الروس .. عالم نداهو يعم
ختيت هواك فانوس .. بقالي شلتو وحم
جيت المدن باخوس .. لاقيتو جالب السم
راشح هجير البوس .. وكل الوجود دم دم
كوركت يا نادوس .. أم الغبش يا أم
يا نخل يا أبنوس .. يا سامبا .. يا تم تم
يا البيك غناي محروس .. دخري الغلابة هلم
دهمني كم مجروس .. وعكمت تاني وقم
حمرت في السحب المكبرتة ..
يا دخان يا ريحة يا قوادة للبحر المخنس والعساكر والملس .. ما تختشي
بيوضة يا ماخدة الخريف .. ما طمبرت عربانا شي
مستني في الزمن النزيف .. القال بجي وفات بي وشي
رشت النهار بالصبر .. أبت المغارب تترشي
دقست سواقي المتعبين .. كايسالا فيها عقاب عشي
بيوضة آه .. أواه لو الكلمات حصى
قالت لي الله اقرب فرج
أواه لو الكلمات لهب .. نرجم به وش زمن القسا
قالت في إطن الليل وهج .. هدام أمان الناس نسى
دنقرت للأرض المسربلة بالسراب .. فرغت بي غلبي العوج
فقدت أيادي العصا .. شديت حزامات الجلد تالا ضرا الواطة
كوركت صد .. أرجع يا ولد ..
طورية أبوك تراها دي ... عاند كواريكك مشيت .. طورية أبويا تراها ديك
لفحوها لمن قام يصلي .. خطاب بكارات الغمام .. مغرب صباح ليلة دخلتو على البلد
حرق عرق .. الفي الكلام عطشان سقيت عرق الشديرة من المطيرة الفيّ كان حس العساكر لا ورا ..
قالت لي اجر .. شدرة غنايا جريك ضرايا جريك ضرا قبل العساكر ما تصل قبل الدرادر ما تبين .. وكانو العساكر في وشي .. قت أقول وقع ..
طينة الجداول ماها زي طينة جسارتك يا بلد والكل طين
يا نبوت .. دقة تفوت .. ولا حلم يموت
النندق .. نندق .. نندق .. ويفضل باقي لهيب الحق
حق الناس ينزل في الحلق
أو ينعارض شوكة حوت
يا كهنوت اليجي كابروت
يا جبروت اليجي كابروت
يا كابروت .. كابروت .. كابروت
كابروت عشم وطن الغلابا .. الحال بلاك تب ما تسر
ما بان صباح أو عسعست قدامنا ليلة تزيدنا ضر
أوتارنا يا آخر الغنا .. حردان عشياتا النغم
فرغت مجالسنا البلاك .. عنكب على أبوابا السأم
أنزح .. كفانا كضب رياح وبكاء رعود وضحك برق
العشب مالي حشا الأراضي .. حواهو لما العش حرق
الشعب حي .. بس كيفن تصد .. يملابك المليون عرق
كدبنا في الثرى في رجاك .. مافينا زولاً ما عرق
ساوين عصا الأشواق مرق
عربان ونوبة نهاتي بيك .. والزنج تتمناك عتق
ورا يا وجع .. هيا يا طلق
صد لي ملامحك يا حراز .. ريح العوارض غربت
فرتق ضفايرك في الرذاذ .. جية العصافير قربت
لاقيتا في غابة مديني .. وسط شتيلةً حبحبت
على عش صغارا الدوب حبت
ما وقف الليل لا الهجير .. كم جفّ ريقا وورتبت
لاقت من العنت الكتير .. ملت الفيافي .. أحدُ أحد
فايدة جناحي بلا أطير .. الموت ولا العيشة النكد
يا نيل مدد
يا غيث مدد
ندى دمر نادوس ونشوغا ...
وخلي الناس الصبحت يوم من حيات الخور ملدوغة
خلى الصوت الكبتو الجوع يلقى براحو .. يضوع ويضوع
الصوت العالي .. يا صوت الناس التحت الواطي الما مسموع
انبهكم الي المقطع الاول
النندق .. نندق .. نندق .. ويفضل باقي لهيب الحق
حق الناس ينزل في الحلق
أو ينعارض شوكة حوت
يا كهنوت اليجي كابروت
يا جبروت اليجي كابروت
يا كابروت .. كابروت .. كابروت
كابروت عشم وطن الغلابا .. الحال بلاك تب ما تسر
و قد الهم هذا المقطع الكثيرين بالصمود و من ضمنهم حميد نفسه
اواصل ان شاء الله
العرض العادي
