ما أقساك يا وطني!!!

أستاذي عبدالمنعم
الله يحييك وبالعافية يبتليك ومن كل شر يقييك
ما ذكرته هو (عين الواقع) وهو اصدقنا بأنو

الحـــــــــــل: الوطن يبقي بامكانيات تستوعبنا كلنا.

ودى المعادلة الصعبــــة ومعركة الكرامة الكبرى؟؟؟؟؟
اطرافها سلطة حاكمة شبعانة وفاقدة الإحساس بالمواطن إختارت التعامل معه بواقع ((جوع كلبك يتبعك ويخدمك)
ومواطن محكوم جائع أيضا فاقد الإحســـــــــــاس بالوطن أختار لأحلامه في الوطن الهروب للمنفي.
العامل المشترك بينهما(فقد الإحساس).... ودا التوهان ذاتـــــــــــــــــــــــو.
والمنافي برضو بقت طاردة وبعضها بدأت بالتململ من إستيعاب العنقاله من أمثالي والحالمون بمنافي سعيدة مدى الحياة من أمثال عبدالسلام ومن لف لفه
نورة علمتنا إنو الفقراء بقسمو النبقة؛ وإنو الجوع بنختارو عبادة.
ولما الجوع يبقى مفروض علينا
لازم تلهمنا إحساس متسامى بالوطن وفعل نقدر نتجاوز بيهو واقعنا.
وتصحح المعادلة ...
وللاوطان في دم كل هالك يد سلفت ودين مستحق

وخصمتك بالنبي تكون قريب من كيبوردك.

المشاركة الأصلية كتبت بواسطة a bdalsalam.a.abdullah
الوطن يجب ان تحمله اينما ذهبت عندما لا يكون طاردا
المرحوم الطيب صالح له مقالة في العام 1991 يقول فيها :
ان اهل الجنوب يهربون الي الشمال وان اهل الشمال ينزحون الي اي بلد يأويهم ما رايكم :d

كيف كانت زيارتك للوطن؟

الوطن محمول في شكلك ولونك ولغتك وطريقة كلامك وتفكيرك وسلوكك أينما ذهبت
يازوووووووووووووووووووووووول

بصمة حدها الموت

ولا بد من التصالح مع واقع الوطن

تعااالوا نغنى غنى الايااام الجايه كتير ونفرح بيها سماء السودان تعالوا نلم الوان الطيف الفى الخرطوم ابناااء شعبى والفى امدرمااان تعالوا نفكر ايه البيحصل فى السودان الجوع.. المرض.. الخوف الشك عدم اطمئناااان هد الانسان تعالوا نقعد نحسب خطونا من ما اخدنااا ا...لاستقلال لحدى الآن.. اتقدمنااا ولا اتأخرنااا اتأخرنا ولااا اتقدمنا.. سؤال مطروح لى كل فئه من فئة الشعب بالف سؤال: دم اجدادنا بيحرض فينا على الحرية وبيذكرنا عشان ما نحافظ على وحدتنا الوطنية بس مكتسابتهم بصراعاااتنا وبخلافاتنا دفناها وبقت منسية... حقو نشوف من وين بتجينا مشاكلنا ومنو البيعطل حركة شعبنا بالزندية ونجيبوا ونحاسبوا بعدالة وبديمقراطية انا شايف الجوع بيطل من وقت لاخر ليه!! وبلدنااا سهول اطفال بيتشردوا فى الطرقات وبياكلوا الذل ومنو المسئول والحرب لعينة وممتدة وبتحصد فينا ويا للهول ويا للهول وبلدنا الغاليه ام الخير فيها كمان ظهر البترول اشياءنا بتنتاقض وفى الواقع نحنا كتير وكتير بندور فى الحلقة الواحده كما البندول.. نكسرها كيف!! الحلقة الواحدة دى نكسرها كيف!! ونمدها جسر يوصلنا والدنيااا عجول.. يا حكامنااا الدنيا عجول ياساستنااا الدنيا عجول يا جنرالتنااا الدنيا عجول يا ساااداتنا الدنيا عجول

كيف الحل يا جماعة

النبقة المطلوب قسمتها دي ذاتها وين اكان في نبقة
كنا طلعنا من السودان؟
الشى التاني يا ود عبد الله لحد الان الحلم مجاني اطلق لعنانك ان تحلم لولا الحلم ما طار الانسان ولا ركب سيارة ولا وجد علاج لامراضه ف انا ادعوك لتحلم .:d

الاخوة الكرام
السلام عليكم ورحمة الله وبركاته
متابعين للحديث الشيق وبث الهموم والبحث عن مخرج لما نعانيه
لعمري ماضاقت بلاد باهلها ولكن اخلاق الرجال تضيق
الغريب انه بلادنا من اكبر البلدان ( قبل التقسيم )
ارض واسعة ومستوية ,, ومياه كثيرة ,, وامطار غزيرة ,, وثروة حيوانية
يعني مفروض نكون سلة غذاء العالم بدل ما تتسل روحنا عشان لقمة العيش
وعشان تتسع بلادنا باهلها لابد من فكر جديد وعقلية جديدة في كيان جديد يوفر للجميع
الحد الادنى من الصحة والتعليم ومساواة في الفرص الوظيفية دون محاباة او محسوبية
وبلادنا ما قاسية بل واسعة تسع الجميع كما اتسعت من قبل لغير اهلها من رشايدة وزبيدية ومصريين واريتريين
وهنود وغيرهم

قدمونا يا هندسة
شكرا على مداخلاتك التى لامست أوجاع الكثيرين منا وضغطت
ع الجرح النازف مني.
الخير كثير ووفير في الوطن...والجميع يرتع في شجرة النبق
ولكن أين القوي الأمين ؛وأين التوزيع العادل
وأين نحن من معادلة الفاسدين والحرامية والمرتشين والأرزقية
وأين نحن من معادلة أبجديات الوجود بكرامة أدمية في وطنا
في ظل أنانية وقهر ((العُصبة الحاكمة أولى البأس**))
أسئلة الماضى في الوطن هامة جداً للعبرة والعظة والإعتبار
وأسئلة المستقبل في الوطن تحتاج لرؤى سيدنا يوسف.
وواقع الحال يحتاج لسياسين وحُكام مُبدعين ولإلهام الأنبياء.
و نحن بين البين تائهون في غربتنا (نومتنا)
أتمنى ويأخذ منا التمني والرجاء أحياناً عمراً كاملاً
أن ندرك لحظات ميلاد الوطن التاريخية
والفاصلة قبل أن نهرم أوتنسل روحنا
حتى لو بالحلم...
وحتى لا يقول أبناؤنا أو نقول يوما ما وطن لله يا محسنين

النبقة المطلوب قسمتها دي ذاتها وين اكان في نبقة
كنا طلعنا من السودان؟
الشى التاني يا ود عبد الله لحد الان الحلم مجاني اطلق لعنانك ان تحلم لولا الحلم ما طار الانسان ولا ركب سيارة ولا وجد علاج لامراضه ف انا ادعوك لتحلم .:d

صديقي اللدود

هل تعتقد أن الباقين في الوطن بتقسمو في اللالوب؟

ويا أخى بدل تدعوني للحلم المجاني

كان تدعو ربنا إنو يحقق حلم ودعبدالله الغلبان دا

وبقية الغلابة المعاهو (دي برضو دعوة مجانية)

يقال أن أحسن خطاب قيل في التاريخ السياسي كان خطبة الرئيس الامريكي جون كينيدي وأن أحسن عبارة جاءت فيه:

" لا تسأل عما يمكن لبلدك من أن يعمله لك بل أسال عما يمكنك عمله لبلدك؟؟؟؟؟؟؟؟؟؟

"ask not what your country can do for you
ask what you can do for your country"

وكما قال الشاعر:

وللأوطان في دم كل حر يد سلفت ودين مستحق

فما سلف لا يمكن حصره. فقط يحتاج الانسان لقليل من التفكير الايجابي ويتحاشى التفكير السلبي المحبط والذي ما قدم بلدا ولا أرسى تنمية ولا رفع من مستوى معيشة.

ويمكن الفرد الواحد أن يسهم بما تحت يده من إمكانيات ولو كانت بسيطة ويغير الواقع المحيط به ولو عمل كل واحد قادر على فعل ما الشيئ البسيط فإن مجموع ذلك كبير؟

بالمناسبة عندي سؤال للاخوة: ما هو الوطن؟؟

سلام و تعال يا الفاتح انتا ود عمي ده زي المتفق معاك بس تحت تحت كده انتا داير تزنقو في مربع ضيق اوعا الود بقا مؤتمر وطني
اها يا عبد السلام إن بقيت مؤتمر وطني بحكم اني ابن عمك لو لاقيتك حا اجضمك حا اجضمك سامع!
المهم و بالواضح حكاية تعريف الوطن دي هو شنو الناس اسع مختلفة فيها و تعال شوفوا
في ناس عندهم جنسيات تانية و جوازات تانية فير السودانية
اسع شفعهم لو اديتهم واحد من بيوت ناس عمر البشير في كافوري ما بجيك يعيش في الشودان
يعني الواحد قاعد في امريكا الملاينة حسنات و عيوب
يجي يعيش في السودان التعب و الملاريا و الجوع و التعليم البقا تحت
ياخي و الله حالة تطلع الزيت زاتو
انا شخصياً اولادي براهم اختاروا انهم يقروا و يعشيوا في السودان و السودان يبقا ليهم وطن
ده اختيارهم
و احترمتوا ليهم
بس امكانيات انوا يعيشوا احسن كانت ممكن تكون خارج السودان الان.
يعني اختيار الوطن صعب
مافي زول بختار امه و ابوه
كمان الزول مرات ما بكون عندوا امكانية في اختيار وطن
كمان الانتماء دي قضية تانية صعبة
و الاصعب كيفية الانتماء
يعني باختصار نحنا عندنا قضية
القضية اننا في وطن
ما عندنا الخيار فيهو
العندنا الخيار فيه
كيفية الانتماء للوطن
نحنا زمان اخترنا الاشتراكية
و كان الكلام عن انه
القضية الاساسية هي قفة الملاح
المدارس التعليم
الصحة
المسكن الكريم
الجماعة طلعوها شيوعية و كفر
طيب النرمي الشيوعية و الكفر
و النعاين للعدالة الاجتماعية
و هو موجودة في الاسلام بس القضية
كل زول شبعان بنظر في كيفية الاحتفاظ بي الشبع

بس لحسن الحظ فقد روي عن سيدي ومولاي عليه افضل الصلاة و اتم التسليم حديث بسيط
ما ملأ ابن آدم وعاءً شراً من بطنه، بحسب ابن آدم لقيمات يقمن صلبه، فإن غلبت على الآدمي نفسه، فثلث للطعام، وثلث للشراب، وثلث للنفس" أخرجه الثلاثة والحاكم وصححه
و كما قال الحارث بن كلدة و هو من الاطباء

فان المعدة بيت الداء .
يعني الشبعبانين ديل و احسب اننا منهم يعني المغتربين شفانا الله و اياكم اكلنا الكتير السمح ده كلو مرض.
و الجوع امتحان
و امر المؤمن كله خير.
يعني الشغلانة فيها امتحان للفير و الغني
للجائع و الشبعان للحاكم و المحكوم
انا ما عايز اكتل القضية بس سيدنا عمر رضي الله عنه روي عنه و الله اعلم انه قال
يقابل القدر بالقدر
يعني لو الحاكم ظالم لاقي قدر ظلمة بالصبر عليه
او بمقاومته
و لو جيعان تلاقي القدر بالمكافحة من اجل الرزق
او الصبر عليه و كله خير
غايتو انا جربتا الصبر و جربتا مقاومة ظلم الحكام و كله عايز صبر
تعرفوا انا دخلتا في متاهه
بس برضو ما حا اسحب المداخلة
اخليها كده بي تشتت افكارها

ود سعيد سلام عليك

تعرف ما بيني وبين المؤتمر الوطني مثل المسافة ما بين الفقر والغني