خواطر

الفاتح سلام
مستعد ليك
كما الاحباب يا قوم هون مقصودي
اقرع و اقيف بالباب هون مقصودي
تعرف يا الفاتح الشغلانة مقلب
مقلب كبير
تعرف ممكن تفهم شوية تقول روحك فهمان كتير .
او ممكن تكون ما فهمان شي
المهم علشان تصل للحقيقة لازم تعرف انك ما ممكن تفهم كل شي
و قمة الحقيقة انك ما ممكن تعرف كل شي
علشان كده ربنا لمن سيدنا موسي كليم الله عليه السلام ظن امتلاك المعرفه الله سبحانه و تعالي ارسلو الي سيدنا الخضر و اراه ثلاث اشياء كانت خارج توجه و علم معرفته و هي الخرم بتاع السفينة ليه؟ و قتل الغلام ؟ و بنيان الحائط ؟
يعني الادارك بعدم الادراك ادراك
علشان كده احسن نلف شوية
تعرف مرات بقول مالي و مال القراية ام دق ما كنتا اكون طلعت من المدرسة من الثانوي العام عرستا مسكتا حواشة ابوي في ورا الكنار و كان همي و تطلعي كلو برنسة و لا زراعة تجارب بصل و لا طماطم و ما اشارك التامة .
شوف المشكلة النحنا فيها دي يحلوها كيف
هم عام
دين هيام
بيت ما تام
و بعد داك تتكتشف انو الشغلانة يوم و ضحوة
اتذكر مرة مشيت لعم يوسف معاي المرحوم الطيب الامين ابوسمرة ود عمتي = رحمة الله عليه =
جدك يوسف بدا الحديث و السؤال عن الاهل و الاحوال و بتين العرس و الكلام ده كان في التمانينات
سالني من كل شي و اخر شي تطرق الحديث لي ليلة حصلت في الحلة قام قال لي تعرف الحيشان الكبيرة دي حيشان ليالي علشان الواحد يقدر يتدردق فيها .
غايتو لو هو قام قرأ كلامي ده حيكون عندو راي .
مرة تعرف مشيت لي ليلة و جيت البيت متاخر كان احد اعمامي مبيت معانا في البيت
بكرة الصباح سالني قال لي كنتا وين
يا زول ما كضبتا قلتا ليهو كنتا في ليلة قام قال لي عليك الله ما كان احسن ليك شيوعيتك.
المهم نحنا اسع طلعنا من الحيرة داخلين لي تغيب الوعي زاتو
دي لو وصلناه الواحد ممكن تلاقيهو في كورنه من الزاويا المجهولة و المهجورة ده لو بقا في العمر بقية
و المسالة تبقا بس سفنجة و جلابية و سترة شرعية
و يا حليلك يا شيخ خوجلي

المصدر: :::: منتديات أبو فروع :::: - من قسم: منتدى الحوار العام