اانا بكرهك للشاعرة نضال

اانا بكرهك للشاعرة نضال

بس بكرهك..!
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد فلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك

مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك

المصدر: :::: منتديات أبو فروع :::: - من قسم: منتدى الشعر والشعراء والأدب

---

hhkh f;vi; ggahuvm kqhg

بسم الله الرحمن الرحيم
السلام عليكم و رحمة الله تعالى و بركاته
المحترم/ الأخ -هيثم محمد علي خضر
اهلا و سهلا بالذي زار الحمى بطلعة فاقت بدر السما
نرجو الذي رد التلاقي بيننا ان لا يرد لنا الفراق المؤلما
-------------------
فقدناك كثيرا نرجو ان نراك دوما لانك من اعمدة منتديات ابوفروع الاساسية التي ارتكز عيها منذ بدايته.
لقد عبرت الشاعرة نضال عن مشاعرها في القصيدة ولقد واجهت هجوم من شاعر رد منتقدا لمشاعرها و قبل ان نقرأ رد الشاعر نشاركه في رده بالآيه({وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}) صدق الله العظيم .
أن الإنسان قد يقع له شيء من الأقدار المؤلمة، والمصائب الموجعة، التي تكرهها نفسه، فربما جزع، أو أصابه الحزن، وظن أن ذلك المقدور هو الضربة القاضية، والفاجعة المهلكة، لآماله وحياته، فإذا بذلك المقدور منحة في ثوب محنة، وعطية في رداء بلية، وفوائد لأقوام ظنوها مصائب، وكم أتى نفع الإنسان من حيث لا يحتسب!.
والعكس صحيح: فكم من إنسان سعى في شيءٍ ظاهره خيرٌ، واستمات في سبيل الحصول عليه، وبذل الغالي والنفيس من أجل الوصول إليه، فإذا بالأمر يأتي على خلاف ما يريد،
قال الشاعر في رده لنضال:
انا بعشقك
بفتح شبابيك قلبي ليك
ريدا وغرام بستنشقك
وبوقف حروف القول عليك
بدمي للكون برسمك
وانا بعشقك
انا بيك بكون عالم جميل
لافيهو اهة ولاندم
وانا فلبي بيك يا ست هواي
صالح جروحوا واستجم
يالفيني ساكن ومشتهيك
يا اقصي غايات العشم
مكتول هواك يا احلي زول
لو بالفصيح او بالعجم
وانا بعشقك
مين السواك اهداني ريد
جوة القليب نبضو اتزرع
ومين السواك داوي القليب
من كل اشكال الوجع
ناخب فؤادي اشر عليك
اداك نبضو واقترع
سطر حوف اسمك غنا
احرف غناك ليها اخترع
وانا بعشقك
ياماليه جواي باليقين
بيك الحياة ما اجملا
انابيك بتحدي السنين
يابت فريده ومذهله
عبيني يومات بالحنين
كان يوم اطول فيك العلا
وافيهو لي عهدي الامين
كان يوم اطول فيك العلا
وانا بعشقك
باختصار
انا بعشقك
بالليل نهار
انا بعشقك
عز الشتا او جو حار
رغم الالم والانكسار
انا بعشقك
رغم الاسي والانتظار
انا بعشقك
يابت بتدي الكون نضار
انا بعشقك
و ربما كان كل هذا الكره من الشاعرة نضال بسبب غدر الزمن لانه ربما يبدل الاحاسيس النبيله
غـدر الزمن

شغل القليب بالشوق على زولاً بحن
طبع الفراق الجوة إحساسي الدفين صورة شجن
زاد الألم سبب الفراق البينا كان غدر الزمن
غدر الزمن مسح الأحاسيس النبيلة وبدلا
عشرة سنين ممزوجة بي أحرف وفاء ما أجملا
عزاي حروف بعد الشقاء مسح الليالي وبدلا
سلواي قصايد شاعر إتغرب وزادو بقى الصبر
نعمل شنو إلا الحصل بيناتنا ما نفذ القدر
يرجع يعاودني الحنين خاطري إنكسر يوم إنجبر.

و ختاما اعتقد ان نضال لا تكره في الحقيقة من ابدت كرهها له بدلالة انه قد اخذ حيزا زمنيا من وقتها بدلالة انها مشغولة به و تذكره في اشعارها

حبيبنا العريس حاتم الف مبروك الزواج وبالرفا والبنين وخلاص تعال السعودية كفاية عسل
طبعا القصيدة هي نضال ردت علي الشاعر معز عوض لانه هو اول من كتب انا بكرهك ووعدتوا انها ترد عليه وهي ردت علية بهذه القصيدة وبعدها توالت الردود علي نضال وقصيدة انا بعشقك دي كتبها الدكتور كمال شرف الانتا كتبتها دي
ورد ايضا عليها كميه من الشعراء ومنهم كمان الشاعر بن عثمان وكتب لها الاتي بعنوان (ليه تكرهي)

ليه تكرهي ؟ ليه تكرهي؟
ليه تكرهي ؟
ليه تكرهي القلب البنادي علي غريبا ماهو في؟
ليه تكرهي الوطن الجمع اشلاء غراما منتهي؟
ليه تكرهي القلب النبض بي حبو قلبك من سنين؟
ليه تفتحي الباب للدموع؟
ليه تزرعي الشوك في ارض كانت تضم الياسمين؟
شبهك قليل,,, ياشامخه زي قمم الجبال
ياحلوه زي زهر الربيع ،،،،،، ياساطعه زي شمس الضحى
يالوحه ضاجه حياه وشعور,,, ياحقيقه اروع من خيال
ياسامقه زي شجر النخيل
ليه تكرهي؟
مشكلتك الروح التفتش ديمه لي قلبا امين
لكن خساره بقي الامان حلما سراب مدسي مابين نور وطين
ليه تكرهي؟
كل الزهر حزنان عليك
حتي البحر لاقاني بي حزن السنين
فاضت دموعو عذاب وهم ,,,زعلان شديد معقوله انتي بتكرهي ؟
ماانتي جمعتي النجم اجمل عقود من الوفا
نورتي دربا بي شموع,,, قلبك وحاتك مابيعرف يوم جفا
بس اسمعي : الريده صبحت مستحيل
والعشقو من قدم السنين ياكان مصيرهم للجنون
او طعنه في جوه القلب جرحت فؤادم والحنين
ليه تكرهي؟
دمعك نشف من طول سهادك والنواح
نضمك كمل من شعرك المنسوج الم علي ماضي كان مليان جراح
شمعك طفا,,,نجمك افل ,,, نورك رحل
سجن الغرام مابشبهك
حتي الكره مابشبهك
ليه تكرهى؟
طردك مباح ,,, هجرك مباح
قفلك وراو باب الضلوع ,,, كان قلتي طفيت الشموع
كان قلتي خليت القصيد ,,, او قلتي من بعدو العشق حرمان اكيد
ليه تكرهي؟
كان اشتهاك شوق البلد للنسمه في عز الهجير
كان اشتهاك بسمة طفل بتبدد الليل الطويل
كان اشتهاك غنوة فرح بتودي للزمن الجميل
ليه تكرهي؟
كريات دماك ما اتلوثت بس زادت الحد في الغرام
عشقك جميل ,,, ماانتي علمتي الهيام
ليه تكرهي؟
زولك عرف انو القلب مفتاحو كلمه وكلمتين
خبط علي باب القلب وبدون اذن اتحكر العشق اللعين
غيمك شمس مليانه ضو,,, وشمسو من كتر الخداع دايما بتغرب مرتين
لازم جراحك تندمل ,,,لازم ضلامك يبقي ضو
لازم صحاريك تبقي نيل
ليه تكرهي؟
خيل ريدك اجتازت قصور ,,,دكت قلاع,,,دكت حصون
لكن اذا خيلك كبت ماتاسفي ,,,ماالكبوه من طبع الخيول
بس اوعي تلدغي مرتين
ليه تكرهي؟
لمن عشق قلبك سما,,,بقي طير يرفرف في السما
ليه تحبسي الطير في قفص مصنوع من الهم والانين
ليه تكرهي؟
ليه تحرمي القلم الكلام ؟
خليهو يكتب في الملام ,,,او مره يقريهو السلام
اوحتي يتزكر حنينك والهيام
بس ياملاك ماتكرهي
خلي الشمس تدخل تطل تطرد نسيج العنكبوت
خلي القمر يقعد حداك,,,خلي الحزن يرحل يفوت
ماتاسفي
لوكنتي في كونو القمر ,,ضوو انطفا
لوكنتي في دنياه غيم شمس الهجير حرقت دناو
لوكنتي في عز البرد نار اّنسك واوحشة الليل الطويل
علي زول وحيد ماليهو هم,, وفي ايدو قيد
ليه تكرهي؟
مسكين اذا ماقدرك,,,غبيان اذا ماقدرك
مابكفي لو شال الشمس واهداها ليك في يوم مطير
مابكفي لونسج الحروف بي رقه زي صوت الخرير
مابكفي لو شكرك الف,,,مابكفي لو صاد النجوم في كل ليل
مابكفي لو مسك السما ,,, اوحتي مسكك العبير
قلمك اسير في وقعة العشق المحال
شعرك جريح مابين حقيقه وبين خيال
وغناك اسير مابين مؤكد واحتمال
ليه تاسفي؟
ماتاسفي لو في عيونك شوقو بات لابد من يصبح صباح
ماتاسفي لوليلك المهموم وقف في بابو منتظر السماح
لابد من من فرحا يطل ويلبسك اجمل وشاح
لابد من زمنا يجي يسقيهو سم,,, يسقيك راح
لابد من حزنا يفتق في قليبو المات زمان كل الجراح
ليه تاسفي؟
ليه تكرهي؟
ماتندمي قدامك المشوار طويل
فيهو الكعب,,,فيهو العديل
فيهو الاجاج والسلسبيل
فيهو العشر,,,فيهو النخيل
ماتندمي لودمعك اتساقط مطر
او حلمك اتبدل شجن
او حبو من دنياك رحل
اوحتي فارقك السحاب خلاك في عز الهجير
لو طل ليلك بالعذاب قرب خلاص فجر الهنا
لو قلمك اتفجر الم ,,,اوحتي من دمعك اخد
اوحتي من دمك اخد,,,اوحتي من روحك اخد
قرب خلاص فرحك دنا
لو حتي طالت فرقتك كتلت معاني الريده فيك
روح خلاص زمن الانين ,,,ورجعتي لي زمن الغنا
ماتبكي ,,,يكفيكي الحداد,,,اتوضي بي موية الصبر
ماتبكي ,,,يكفيكي الحداد,,,قلبك كفاو اتملي فوق نار الجمر
ليه تكرهي؟
املي الصحاري ورود وحب ,,,ماتكرهي
رغم احتمالات العذاب ,,,ماتكرهي
رغم الحقايق المره في دنيا السراب,,,ماتكرهي
رغم الشنا ,,,رغم الكذب ,,رغم الضباب ,,,ماتكرهي
رغم الحنان الانفقد في دنيا مابتعرف إياب ,,,ماتكرهي
بالرغم من كل السؤالات البقت من غير جواب,,,ماتكرهي
بالرغم من انو العشق اصبح خراب ,,, ماتكرهي
بالرغم من صوتنا الصرخ يازول تعال,,,ارجع تعال ,,,
لاجانا زولنا ولاصدي,,, ماتكرهى
حالك عديل بس همو دابو الليله طال
علي كل حال ما تكرهي

هم طبعا ياحاتم كتار الشعراء الردوا علي انا بكرهك شوف الشاعر دا رد عليهم كلهم وقال شنو

أنا مافاضي ليكم كلكم
لا مافاضي للكره اليحتحت من عرق صوتكم
ينزل ينبّت ...
يطلع يعرّش يبقي ليكم ضُلكم ...
وانا ذاتي ما فارق معاي كل البيطلع منكم ..
مافارق معاي كُره البٍيكره ..
وعِشق البرِيِد
لا مافارق معاي .. وهج البيكتُب في القصيد
ولا اليفصِد حُبُو في الكراريس والوريد ..
أنا همي أكبر من كده
وفي وآدي آخر همكم ..
:
أنا ما فاضي ليك يا نضال
لا مافاضي للحُب المُحرّم والحلال
أنا همي أكبر من كده !!!
أبعد من حدود رجعت حبِيبك في الخيال ..
ما فاضي ليك أنا بإختصار !!
شآني موجوع بي شعر
محجوب شريف و القدااال ...
وعرفتي ليه مافارق معاااي ؟؟
:
أنا ما فاضي للمعز عوض ولا المعز عمر البخيت
لا ما فاضي للبيسَجعَ والبِعيِد
أنا همي أكبر من كده !!
أسمي من كل الحوافز والقصيد ..
أنا رمزي زول مناضل
شال هموم وطنو وإتوسد وحيد
ما فاضي ليكم بإختصار !!!
شآني مسكون بي ( شبح ) ( حميييد) ...
:
وعايز اقول ليك يا نضال
أنا بكرهِك ؟؟؟!!!
ما شآن ابيتي تجي الميعاد
ولا شآن العيون اتعلمت شرف السُهاد ...
أنا بكرهِك ..
كُل ما إتسرق من المزارعين الحصاد
أنا بكرهِك ..
عدد الكُتوف المجليّة بي ضهر السياط
انا بكرهِك ..
عدد الرُتب المزيفة والنياشين والنياط
أنا بكرهِك ..
عدد الحقوق المنهوبة من رزق العباد
أنا بكرهِك ..
عدد ما حرقو ..
وما غرقو ..
وما فرقو ..
عدد العذآب والإضطهاد
أنا بكرهِك ..
عدد ما كبرو هُم للجهاد
وينو الجهاد ؟؟؟
حتي الجنوب خلانا فات
وينو الجهاد ؟؟
وأخوان نسيبة بجاهدو في شرف البنات
أنا بكرهِك ..
كُل ما دقّ ليهو جهاز الأمن باب
أنا بكرهِك ..
وبعشق ( صفية ) الكآوياها نار الأغتصاب
أنا بكرهِك ..
عدد ما شعبنا سف التراااب ...
أنا بكرهِك ..
من هسي لي يوم الحسااب ..

:
وأنا بكرهِك .
ما شآن شخصِك قت ليك
ولو عايزاني في يوم أعشقِك ؟!!
يا نضال أنا بعشقِك
عِشق غير
يوم تقولي .. لا .. وماتغني ليو ..
يا نضال أنا بعشقِك
يوم تقلبي ( إسمك ) عليّ وشِيو
يا نضال أنا بعشقِك
يوم تمُرقي الشارع وبي لهب صوابعِك توقيديو
يا نضال أنا بعشقِك
يوم تملصي توب الزراق وتشرطيو
يانضال أنا بعشقِك
تلفي منو في وشِيك وباقيهو تحزميو
يا نضال أنا بعشقِك
يوم تمسكي مقشاشة العدل
وسودانا الغالي تنضِفيو
يا نضال أنا بعشقِك
يوم تصنقعي للسماء مرة تاني
ودنقري حُرية وسرور ترشرشيو
يا نضال أنا بعشقِك
يوم نتماسك كلنا ودرب النضال نمشي فيو ..
يا نضال أنا بعشقِك
:
ويا سودان أنا اكتر بعشقَك