الشيخ محمد الأمين القرشي

[align=right]الشيخ محمد البرناورى .. بعرفو حق المعرفة، آى قادرى لكن مسألتو هو ضعيفة. اصلو راجل عجوز مية سنة وزيادة اظنو. وبعدين فى البلاد ديك مشى داعية للاسلام، داعى للطريقة القادرية. بيدى الناس الطريقة يدقو النوبة ويذكرو فيها ويجيبولو الهدايا. انا قابلتو هناك احترمنى ونزلنى فى بيتو سوالى حلقة ذكر وذكرنا فيها وبعدين ادانى الجبة بتاعت الدراويش والجبة المرقعة دى اهداها لى وبعدين قام بحركة للدعوة لا بأس بها. مات .. لا نوعو هو ما فى وهو كان انسان طاهر.
فى جهة كادوقلى وهيبان فى اولاد الفكى على الميراوى. اولاد الفكى على الميراوى ساعدونى قدموا هدايا وقروش عشان اديها للناس وبقدمو لى شوالات كانت مجاعة اقسمها للناس ملوة ملوة. الكلام ده الانجليز قاعدين.
ناس كادوقلى لما وقفت خطبت فى الجامع طلبت منهم المساعدة ساعدونى. جنيه جنيهين خمسين قرش كونا مبلغ ما هو كتير.
الهيئة الكونتها هنا فى ام درمان فى جمع التبرعات زول واحد ما مشى اتبرة ولا مشى بورسودان. طلبت امشو معاى. ابـو. مشيت انا براى. انا البشجعنى امشى اتبرة براى وامشى بورسودان براى انا بورسودان كنت قاضيهم ومدرسهم. الناس اهل لهم صلة شديدة بى. واتبرة قعدت فيها اربعة سنين قاضى ومدرس. فقط واحد اسمو على محمد صالح كان قاضى راح معاى. اما مصلحة الشئون الدينية طريقها الماشية بيه غير طريقنا.


بعد جبال النوبة مشيت ملكال ... ونزلت عند احد قضاة المحاكم الشرعية هناك، تاج عمر اخو عوض عمر. وجدت لجنة الجلابة عملو ليهم حكاية كتبو للمفتش انو فى ناس مسلمين دينكا بجونا هنا عريانين تسمح لينا البجونا عريانين نحنا نكسيهم والجعان نوكلو. خدمة إنسانية. المدير قال طيب. لكن دى مى ياها القاصدها انا. هذه جمعية المؤلفة قلوبهم ما ليها قيمة.خليتها. خطبت فى الجمعة وقلت ليهم انا جيتكم للإسلام تكونو مسلمين. الناس كوركو ووافقونى وقالو لى طيب. وانا عندى قروش قدر كدى وعندى هدوم قدر كدى نعمل كيف؟ نكون لجنة نعمل ليك بيت. كونا لجنة فلان فلان فلان. اهه اسوى شنو انا؟ قالو لى يعنى الناس بجونا هنا نجيبهم ليك فى بيتك تكسيهم وتديهم. قلت ليهم لا دى ما خدمة للإسلام. ما كفاية. انا امشى بره اشوف المحلات الهامة اسكن فيها. قالو البلد باعوضة ومافى اكل وما فى غذاء. قلت ليهم لا يهمنى وفعلاً رحت حتة اسمها اكوكا وفيها حفير وفيها موية قلت ليهم دى البتنفع معاى. وفعلاً فى جلابى هناك ادانى بيت اسكن فيهو وصرت اشيل الرغيف واشيل التمر والسكر وهناى وفى حلال قريبة قريبة تجى ترد فيها. سويت لى راكوبة اسقى الناس الشاى واديهم القروش والبس العريانين كلهم بأساميهم عندى دفاتر اكتب فيها. الجلابة هنا بقو يساعدونى. الخبر شاع انو فلان الفكى فى الحفير بكسى الناس وبديهم، البلد كلو بجونى. القـنم الشهادة واكسيهم وحلال قريبة قريبة بلقى لى هناى .. حمار بمشى بيها. ابيت فيها اضبح ليهم تور اضبح كبش. بالحكاية دى يعنى صاروا احباب واصدقاء لى. فأسلمو عندى عدد كبير وعملت لى هناك مسجد للصلاة نأذن ونصلى وانا اقرى العيال. جبت الاولاد سويت ليهم داخلية والواطة كانت غلا. نديهم عصيدة الصباح عصيدة العشية والشاى يشربو فى النهار مرتين. وفتحت الخلوة واستمرينا.

القروش الجايبها انا شايلها من قروش الدلنج. حساب الدلنج داك انا شايل منو وبكتب لى لجنتى انا شلت كذا كذا ضمن حساب جارى. نحن مقرنا فى ام درمان. واخيراً اللجنة اختلفت معاى قالو لى انت بتجيب الهدوم توديها هناك حقك تجيبها هنا فى ام درمان عاوز ليك عشرين تلاتين قميص اكتب لينا نصدق ليك. جبت الزنك من بورسودان ابنى بيهو هنا قالو لا تجيبو ام درمان ونحن نصدق ليك. قلت ليهم: انا الجـبتكم، رفـدتكم، انتهى البيان.
المالية ما كتيرة وهناك عملت اكتتاب فى ملكال ذاتها ثم عملو لجنة واللجنة دى ماسكة القروش. عاوز هدوم تاخد لى. عاوز سكر تجيب لى. حاج عمر ابكر اهه دا رئيس اللجنة وعثمان ود اخوه. عثمان مبروك والبشير ابراهيم عندو عربيات كتيرة وحاجات وحاج وداعة آى. اهه ديل كلهم ناس ملكال وواحد تاجر قريب ناس عثمان صالح نسيت اسمو. انا قعدت فى ملكال مدة يمكن سنتين. عبد الله خليل مشى. حسن بشير كان بساعدنى دائماً بدينى عيش وهدوم. وطلعت فريد كان بساعدنى.
بعد ما قضيت السنتين فى الجنوب رجعت للنوبة وقعدت اشتغل معاهم زى عادتى دى. بنيت مسجد هناك فى الدلنج بره من الدلنج كدى شوية فى الرديف. سموها الرديف لكن اسع دى نحن نقول حلة الاسلام. قعدت هناك. بعدين تاقت نفسى ان امشى مكة وما لاقى وجهة تدينى إتساع فى العمل. قروش ما لاقيهم والناس بمشى بيهم مرة مرتين تانى ما بمشى ليهم. باخد منهم القروش تانى ما بمشى. ما كتبت لى ناس بره. ناس سعـود ظنهم فى السودان ذاتو ما حسن. آى ومع ذلك ما لى معرفة بيهم انا حبيت امشى قلت كفاية العمل السويتو دا فاحسن انا امشى مكة. السفير السعودى اسمو محمد العبيكان بعرفو من زمان مشيت مرة مرتين قلت ليه سهّل لى الحكاية دى. قال لى انت ماشى تحج وتجى؟ قلت ليه لا. عايز اقعد فى مكة ..اقعد ادرّس. قال لى تجيب لى شهادة القضا وشهادة التدريس. رحت جبت شهادة القضا وشهادة التدريس قال لى انا الملك قريبى وما بخالف كلامى انا بكتب اسويك قاضى. قلت ليه ما بنفع ما عاوز. طيب اسويك مدرس فى الرياض فى الجامعة. قلت ليه ما بدور. قلت ليه انا داير اكون مدرس فى مكة بس. اصوم واشرب موية زمزم واصلى الصلاة كدى كدى. قال لى فى مكة ما بتلقى ليك ماهية كبيرة. قلت ليه رضيان رضيت. فعلاً قال لى انت عندك كتب مؤلفة؟ قلت ليه آى. جبت ليه الكتب رسلها للملك. الملك كتب لشيخ الحرم.
عالم من السودان اشير عليكم تعملوه مدرس فى الحرم. شيخ الحرم ده راجل متشدد بلحيل. قام كتب للسفير قال ليه جيب لى كتبو اشوفها يمكن راجل مخرف ولاّ مش عارف. السفير قال لى الراجل ده غلطان الملك قال يقبلوك ما بنودى ليه الكتب. قلت ليه ما من صالحى. جبت ليه المؤلفات بتاعتى. كتاب فى علم الاصول "سفينة الأصول" وكتاب فى علم المصطلح الحديث "تحفة الآثار فى مختلف حديث النبى المختار" وهناك كم كتاب ارسلتهم قروهم. عملو لجنة براهم كونو لجنة قالو لى تعال. قالو الراجل ده يجى. قمت مشيت مكة قعدت فيها تلاتة سنين مدرس فى الحرم. ادونى مرتب مية وخمسين جنيه ادرس واقوم اطوف واشرب زمزم واصلى وراضى بالحكاية دى وما كان عندى فكرة اجى. قلت انا كفاية التبشير كفاية استمر فى دى. لكن علمنا انو اسرائيل جايبة القسيسين المرقوهم ناس عبود. ديل قسيسين جايباهم بواسطة الحبش تدخلم فى السودان، جنوب السودان. انا خفت القسيسين ديل يجو لى ناسى ويكفروهم فأنا اقعد فى مكة انا بشرب زمزم واصلى ويدونى ماهية. لا هذا حرام انا اترك مكة واجى احارب. استفتيت العلماء هناك قالو لى اذن وجب عليك تمشى لانك انت تعبت فى الناس ديل. استقلت من هناك وجيت. اهه جا مدير الشئون الدينية السودانية محمد ........ هناك كلمتو قلت ليهو الامر كذا وكذا هل بتعمل لى مساعدة ان اكون هناك؟ قال لى بعملها ليك. سألتو تدينى كم عشان استقيل؟ قال لى بديك سبعين جنيه. قتليهو بارك الله فيك. استقلت جيت. لما جيت قال لى الميزانية ما وافقت وما بديك الا خمسين قلت ليه بمشى واحافظ على اولئك الناس من القسيسين ما يكفروهم. ها دى الجابتنى.[/align]