طبقات عالية وبينا فوارق شاسعة اتعارفنا
وكانت جادة
وقالت عيد ميلادي الشهر الجاي ولازم تحضر
قتلها خير . . قتلها خيييييييييييييييييييير
ودخل في أضافري وقلت بتقصد ايه بي عيد ميلادا
ياربي اتولدت يا دابا..يمكن الأعياد سووها زيادة
يمكن ولدت وأنا ما عارف؟؟؟؟؟؟؟
يا ربي بقو الدلوكة وبعزموا الحلال كالعادة
بس قلتلا خير أنا جاييكم عديلا وزين
الشهر الجاي مرق مركوبي من السحارة
داقاوه المطرة قبل شهرين
ونقط طاغيتي من العضاضة سليتا ورقعتا
زيييييييييييييييييييييييييييييييييين
سديرتي أبوي مسويها لبد
فرتقت اللبدة مرقتها طين
عراقي مغزوز في الكركار كان ساوينو وقاية
وقت فازعين
سروال مدفون في رحل العيش ملفوف محشور
بين شوالين
لميتن واديتن شطفة
وشريتن فوق لي زريبة الزين
والزين بقراتو مكوفرات تب
مضغن طاغيتي هرن زيييييييين
شافتن السرة بت الهراف طردتهن وجابت لي اللتاف
وغضبتا غضب وعزمتها جفا ما جفا أقوم في الحين
وصتني الحلة رجال وعوين
وصتني أم نوفل لي كركار
كان تلق ودك جيب لي رطلين
وصتني حليمة بت العجبين
سروال لمحمد ورطلين بن
والناس بتوصي وغبيانا والناس غبياناوبتوصي
وانا ظرفي مكدر ذي الطين
متوصي انا زي بايعلي بعير
وانا بايع تيسي وعيش كيلتين
اتصور خطوة ها السفرة
أنا ماش لواجب أقوم باليل
وركبت الباص مخلاتي دفس
كدوسي وحقة وعود سكين
وانا راكب في البص بتأمل
بجيبوا الحكامات
بتسوا دلوكة بيجوا الحلال
ضابحين تيران أم خرفان صر
مدقق كمين شوالت عيش
انا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادلاق أصقر في الدارات
وامسك صوتي المدهون قطران واندق
شان السمحات ما يقولن ضيفنا كريت ينساق
ووصف وسعال لامن جيتن
وهداك البيت يرقش لوحات
وصل ولقيت البيت لا حدو مزرود بنات سمحات
يضاحكو قر حايشين صينية تبق شمعات
ما في زول قال لي انت منو ما بعرفو الضيف زي
الخوجات
ختيت عكازي وقفت طرف
ملص نعلاتي اتفرجختا
لي تفة خلالي مضنقلو تب سكيني منزلي
بالجمبات
تمباكي وحقتي مزرودة ولعت كدوسي واخد
جبدات
وانا بتامل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحها
والبقر اشابه لي ضمة
ماعرفت الراحن والفايتات
لحسن الحظ هي النقرتني
ما شالت شك من شافتني
ساقتني وقامت بالواجب هي أصيلة وراسية
وست حوبات
نادت صاحباتا بنتعارف
نانسي ونانسي وشيماء ولمياء وحوراء وكفا
من وين! من لندن جينا امس راجعين باكر زي
ها اللحظات
من الطائف والمنشية ومدينة النيل وبنوت
راقيات
طيبات طيبة وكل كليمة معاها ضحيكة
ونضااااف ورهاااف زي اللعبات
واحدتا فيهن سمحة سماح لكن مي طاعمة
وانا زول مستغرب في حاجات
انا زول اسراني سماحتا كاسيا
بنت البلد الهادية وراسية وضميرا الحي التب
مامات
وقالت لي
عرف نفسك بي عبارات
قلت: انا الاسد الحرس غابتو الضريا
وانا الساعة الكتال بختف حديا
وانا الدايرني ما بجيب لي هدايا
وسارح مدرج الخمجة التخية
مراتع اللبل الضان السعية
وادرج عاصفة اللقدة السخية
rwd]m gahuv hgf'hkm
قصيدة لشاعر البطانة
العرض الشجري