رواية سالم ودالسما

الكل يعرف ماسيحدث بعد ذلك. سوف يولي مفتش المركز البرطاني الاصل المستر جون ونتاباطون الامر إهتماماً خاصاً وسوف يتولي التحريات بنفسه فاذا اسفر التحري بتورط اناس في الحادث فسوف يلقي القبض عليهم ويحولهم الي قاضي المديرية بود مدني للمحاكمة.
فالحكام الجدد هلاء يختلفون عن الحكام الاتراك الذين سبقوهم في سلوكهم وادائهم.
0000 تعال ياود امبتال .. الانجليز ديل مايكضبو ،ما يماطلوا ، ما ياخدوا رشوة ، مايخلفوا الموعد... الحاجات الجميلة دي جابوها من وين؟
0000 سرقوها من الاسلام.
0000 يعني هم ما مسلمين زينا؟
0000 لا مش مسلمين .كفار.
0000 ويوم القيامة يدخلوا النار؟
0000 لو ما اسلموا يدخلوا النار .
0000 ولو اسلموا ؟
0000 لو اسلموا مايخلوا في الجنة مكان لينا.
0000 طيب الاتراك مسلمين لكن الحاجات السمحة دي ماعندهم ليه؟
0000 خليك من الاتراك. نحنا في ذات انفسنا نصلي ونصوم ونحج ، بعد ده كلوا نكضب ونقدم الرشوة وناكل حق الناس.
0000 كلامك صحيح ياتود امبتال ، حرّفنا دينا وضلينا ، وحرّفوا دينهم وإهتدوا.
0000 الله يهدي الجميع.
وعند موعد صلاة العصر عاد ابو كتيرة بأمر عاجل لود الامين شيخ الحلة لاحضار كل التلاميذ ومدرسهم الي الكاملين في صباح اليوم التالي للتحري معهم.
فأضطرب الناس ودبّ الخوف في نفوسهم . فلو تضمنت إفادات هؤلاء الصبية اي إشارة لحضور محمد نور الي الخلوة في الصباح وإرسال سالم لاحضار حمارته من الغابة وعدم عودته بعد ذلك فسوف يقضي بقية حياته في الحبس. خاصةً وانه ذهب الي الغابة بعد ذلك وأ حضر حمارته وتوجه بها الي الحليلة.
وفي المساء تحركت القرية وكان التحرك هذه المرة بقيادة الخليفة قسم السيد الذي ارسل الي جميع اباء التلاميذ واجتمع بهم في خلوة الشريف مختار. فالامر خطير ولا يمكن ان يناقش في مكان عام كالمسجد او دار الخليفة.
بدأ الخليفة الاجتماع بقوله:
0000 الملعون ده سواها تاني ياجماعة .قبال كدي سرق ام تقدة خادم ياسين وباعها في ود الفادني.
0000 ومشيت انت ودفعت التمن ورجعت الخادم لاهلها.
0000 لكن ده كان ايام ود تورشين ياسيدنا الخليفة.
0000 نعم ياود قرينات ، كان ايام الخليفة عبدالله عليه رحمة الله.
0000 المرة دي اكان ثبتت عليه تاني مابشوف ضو الشمش .
0000 لا مابشوفوا ياود انور. دحين ياخوانا رايكم شنو ؟ نخلي محمد نور يقابل في السواها ولاعندكم راي تاني انا عييت منو!
0000 واله ياسيدنا الخليفة دي بيضة ام كتيتي . اكان شلتها امك تموت ،وكان خليتها ابوك يموت.
0000 كلامك صحيح ياصباح الخير .لكن نشوف اهون الشرين.
0000 اهون الشرين ياود كريب نقيف مع محمد نور ، سالم وليد وأمه لسّع بنية وحلت تكتها من زمان ... تلد وتجيب غيرو ، لكن محمد نور عندوا تلاتين نفس اكان حبسوهو منو بيتبالى بيهم؟
0000 دا عين العقل ياود المادح كل واحد يشدد علي ولدو ما يقول شفت محمد نور رسل سالم للحمارة.
0000 دا الكلام النجيض يا الحسن جنا ود الحسن . لكن الطلبة الغربا عملت ليهم شنو ياسيدنا اخليفة؟
0000 مجتمع بيهم الشريف محموداً في خلوة الشيخ البشير .
0000 سمح ياخوانا القرعي من امس يكورك " بت الادمية وقعت في المايدية" نخاف يمشي الكاملين يفتن علينا .
0000 زي ما سوينا ليهو يوم ودنور الدايم . مريسة بقرشين ولحم بتلاتة قروش . أمسك ياود الجنيد.
0000 لكن يا اخوانا الحكاية دي مافيها إثم علي ياسيدنا الخليفة؟
0000 القاليك فيها اثم كضب عليك، حتي لوشربت معاهو لاتثم ، ولاشنو ياسيدي الشريف مختار؟
0000 ما فيها شئ الضرورات تبيح المحظورات.
0000 نقرا الفاتحة يااخوانا.... الخائن الله يخونو.
0000 الخائن الله يخونو.
0000 الخائن الله يخونو.