قــــــــــــــــرنتية
لا دبابة برمائية
لاجاسوسه مدسوسه
لا غواصة روسية
لا جندية في حركة
لا مختلسة مال شركة
لا خصفت حدود فشلا
لا كسرت صريف كسلا
لا معروفة ختمية
قرنتية !!
لا صعلوقة لبست شورت
لا بتعرف شنو الباظبورت
لا محتاجة جنسية
هي قاليه النيل سقف بيتها
وقايله ضفافو محمية
جات منسابة عز الصيف
قاليه الناس بكرمو الضيف
وقايله النيل امان والقيف
وقايله الحاضرة عصرية
قرنتيه ؟؟
جات بصغارها دايره الخير
لا شافت يفط تحزير
لا نزحت تكوس توزير
لا جاطت حركة السير
لا دارت وسام تقدير
لا مستلفه عشررين وش
لا بتعرف تعيش بالغش
كان محتاجه بس للقش
وجات احلامه دغرية
قرنتية !!
لا بلعت عديل السوق
لا نضمت بدون طايوق
لا كترت دهب او ماس
لا ظلمت بدون احساس
لا عصرت شباب الناس
لا كتمت علي الانفاس
لا قطعت عشم بي فاس
لا داستنا زندية
قرنتية ؟؟
لا دست سلع في الخيش
لا شربت مريسة عيش
لا ضبطوها في التفتيش
لا خانت قسم لا ديش
لا اجتمعت بمستر جون
لا اكلت مؤنة العون
لا سدت علينا الكون
لا سبت كتاب لا دين
لا سامتنا حمرة عين
ولا باعتنا ضهرية
قرنتية !!
جات مشتاقة للخرطوم
تزور احبابها خايفة اللوم
تصيح وتنادي بالحلقوم
جنينة النزه وين يا زول
لقت حال الجنينه خلا
حليل زمنه وحليل اهله
لا قرنتية لا اصله
لا صوت ككو لا بغلة
لا حلوف لا اسد مهاب بالخوف
لا نمرا يشد للشوف
لا ضل فيل لا تيتل جريهو جميل
ولا غزلان ولا طاؤوس يباهي النيل
لا زفة طيور ونعام
لا نمرا دفر قدام
كل الشله ياقرنتية غمضة عين
احالوهم لصالح عام
تقول الدنيا مهدية
قرنتية ؟؟
جات زي ضيفة ما غاره
لا محتاجه لي فيزا
ولا تصدق علي زيارة
جات والشوق دموع حاره
تجدد في عيون الشوف
بين توتي وعلايل ابروف
قايله الدنيا لسه سلام
ما خيم زمان الخوف
لسه هناك ضفاف حره
ما مطموره للمره
قايله الناس بكرمو الضيف
ما بسوقوهو لي حفرة وجوار القيف
ما بياكلوهو في الصفرة ومصيرو مخيف
قايله الحاضرة ما غابة
وقايله حقوقه محمية
قرنتية ؟؟
لا قدلت في شارع القصر
لا حامت في وقت الحظر
لا خشت عل المامور
ولا نطت سلك او سور
لا دخلت علي ام درمان
ولا كسرت قفل دكان
لا دفرت علي التلفاز
ولا عضت كراع فنان
لا ذاعت بين الناس
لا احتلت كمان حيشان
ولا نصبت شبك للحش
جات بصغارها كايسه القش
تلاقي القوت صبح محظور
وخير البقعه جوه السور
سماحة الدنيا منسية
قرنتية !!
لا بتعرف عجن او لخ
عجب ... ساقوها جوه الفخ
عجب ... منطولها وقعت لخ
عجب ... سلخوها صبحية
عجب ... ونحن بنسلخ الانسان
كيف ما بنغدر الحيوان
عجب ... والدنيا عصرية
قرنتية ؟؟
لا غواصه روسية
ولا حزبية بعثية
يا ناس يا هو دي مجرد
قـــــــــــرنــتــيــة ؟!؟!؟!
rvkJJJJJjJJJJJJJdJJJJm ?!?
قرنـــــتـــــــيــــة ؟!؟
العرض الشجري