تنبأ الزول الجميل الاستاذ سعدالدين ابراهيم للمغنية نانسي عجرم انها اذا (شدت حيلا شوية واخدت جكة) ح تصل الي حيث الفنانة مونيكا نصري اقصد مونيكا روبرت ... وقد ذكر لي ذلك ...
وهسه سمعنا مين دا اللي نسيك
قبل يومين إلا ثلاثة ساعات كنت قد التقيت وعن طريق الصدفة ب(نوفا) وهي طالبة حاورتها ذات يوم في صفحة (شارع الجامعة) بخصوص اسمها التي قالت عنه(الاسم عنوان وانا عنواني مهدد امني) فأخبرتني ان (الولد الوحيد) الذي صارحته بي اسمها كما هو... وهو (خطيبها) لقد تخلت عنه لانها اكتشفت انه مسجل اسمها في هاتفه المحمول بي اسم غير اسمها (اي انه بخجل من اسمها) وبالمصري كدا (بستعر منو ) .
والله جد
كذلك قبل فترة بعيييييدة قامت (امرأة ) سعودية بطلب الطلاق لانها اكتشفت ان زوجها(كتر خيرو وبارك الله فيو) مسجل اسمها في تلفونو ..(غوانتنامو) ...
عديل كدا زوجتو غوانتنامو ...بالتركي كدا تتصل ع طول يظهر ع الشاشة (غوانتنامو تتصل)
والله جد
وطبعاً بعد ان عرفت زوجته هذه الحكاية ( (بالصدفة )عشان ما تقولوا هى البوديها تفتش تلفونو شنو؟؟؟)هو لازم يبرر..
مرة يقول لها: (سجلت رقم تلفونك بغوانتنامو عشان يكون اسم مميز في تلفونى ...)
ياشيييييييييييخ ...
تعر ف ايه انت عن التمييييز يا سعادتك ؟
ومرة تانية يقول ليها (عشان لو اتصلتى ومعاى زول وشاف اسم المتصل ما يفهم حاجة وما يعرف انو القمر بتصل علي..)
يا زوووووول
(حنك نمل) والله
زوجته هذه (ونحمد الله علي ذلك) طلعت زولة مفتحة قالت لى (خلاص يا الطلاق يا تدفع لي مبلغ مالى كبيييييير كتعويض على الاثر النفسى الحصل لي) ...ويقال انها اشترط عليه ان تحضر حفلة للسطورة مونيكا روبرت (مرة واحدة)
كلاما صاح
هسه مبلغ مالي كبير ترفه بيه على نفسا ان شاء الله تلف العالم دا كله وتجي تحضر دراما سودانية وفلم (بيت ابونا)...لو تنسى الاهانة دي ...حاجة كويسة
انا لا اعرف ماذا اختار ....و..لكن! (بي حليفتا) الزول دا شكلو بقي على الطلاق...
يعنى يسميها غوانتنامو ويكون باقى عليها؟؟؟ ما اظن
والله جد
اقول ( وهذا ليس تحريش) وؤاكد (انا ما فتانة) اي امرأة بعد موضوع الزولة السعودية دى .. مفروض تشوف زوجها (البحبها ومكسلر فيها) مسجلها بياتو اسم في تلفونو....
اتبعي هذه الطريقة وقومي بهذا الاجراء
تشيلي تلفون زوجك في يدك اليمين وتلفونك في يدك الشمال ثم تقومي بتحويل رصيد ثلاثة جنيه (تزيد ولا تنقص ) من تلفون زوجك الي تلفونك ... وتضغطي زر الاتصال من تلفونك متصلة على رقم زوجك ... وانتظري اسمك الذى سوف يظهر علي شاشة تلفون زوجك .. وهناك طرق اخرى واسهل ...وكل الطرق تؤدي الي غوانتانمو والسجون المشابهه والزهور والوردي ..
مثلاً يعني
او ممكن ميدان التحرير
واحتمال تلقن (سجن كوبر تتصل بك) وربما احمد شرفى والفاروق والبكري والشريف محمود ... اى اسم سجن او مقابر خُتنو في بالكن
والله جد
وفي واحدين بفضلوا التسمية بالحيوانات المتوحشة...
واكرر انا ما فتانة (بس بفتن ساي)
..وهسه شربنا الشاي
في فترة الخطوبة وماقبل الخطوبة (حياتى تتصل )،(روحي تتصل)،(حبي تتصل) ...(الورد يتصل) و(مكالمة لم يرد عليها من القمر) ...وحاجات وحاجات و........
ثم يصير الامر والامور المجاورة غوانتنامو تتصل ...الحاصل شنو؟ انا مابعرف !!
اذاً في الخطوبة (الدلع )ببقي ليهم وفي الزواج (غوانتنامو) بتبقي ليهم ...
وحتي لا نكون كذابين في ناس حياتي تتصل دى بتفضل طول العمر ولو اتغيرت بتبقي ام العيال تتصل او المدام تتصل او ام فلان تتصل
غايتو مجدداً انا مافتانة (ومصرة علي كدا) رغم هذه (الفتن البائنة بين الحرف والبعدو) لكن شوفن مسجلنكن بياتو اسم وركزن على الغرامة المالية بعيداً عن الطلاق ...
الغرامة المالية لو مسجلك علي سجن حا تكون اقل من غرامة مسجلك علي مقابر ... هناك فرق
لو ما عندو قروش خلي يغسل العدة تلاتة شهور ويطبخ سنة ..وكمان يحضر امجد يومين ...ويعوس الابري
عشان يعرف غوانتنامو دى جد جد
ما اعتقده انا انه بعد هذه الغرامات .. زوج الرضية سراب حا يسجل اسمها في تلفونو (جنات)
والله جد
وزوج ام حقين ابو قناية حايسجل اسما في تلفونو (انجلينا جولي)..
اما الدكتور فادي الهاشم زوج نانسي عجرم مؤكد ح يتكرم عليها ويسجل اسما )الاسطورة مونيكا روبرت)
تقولي له غرامة مالية يشوف (......... )شرم الشيخ شرم الشيخ
الزول البسجل زوجتو غوانتنامو .. هي بتكون مخصصة ليهو نغمة (ربنا يخليك ليا وتحبني وتخاف عليا)
وبعد عرفت حكاية غوانتنامو دي غيرتا ب(الوسيم القلبي رادو..) النسوان ديل طيبانات ساي...
والله جد
غوانتنامو !!!! والله صعبة ... بالسوداني كدا اتلومتا عديل ....
وعلي قول (الاء بت زُهرة) عاد تجااااااازى
إتلقي المراة السعودية دي قاعدة تقول بلغة نانسي عجرم ...... سميتو غالى شغلي بالي وسماني غوانتنامو
...
بوريك غوانتنامو دي
و.....
وصبرك عليا .. انت يا
والله جد
lkr,g y,hkjkhl, (jjwg f; )
منقول غوانتنامو (تتصل بك )
العرض العادي
