في محراب هواك؟؟ باريت جميع طرق الهوى وكل الدروب الممكنة وساهرتا بي ريدك سنين مشتاقة عشه تضمنا معتكفا في محراب هواك حاضنا الزهور والسوسنا وطاوعت إحساسي النبيل وطوعت
في محراب هواك؟؟
باريت جميع طرق الهوى
وكل الدروب الممكنة
وساهرتا بي ريدك سنين
مشتاقة عشه تضمنا
معتكفا في محراب هواك
حاضنا الزهور والسوسنا
وطاوعت إحساسي النبيل
وطوعت كل الأزمنة
نسيرو ..مشوار الفرح
في غرفة واحدة تضمنا
وتسقيني من شهد ألهنا
الكان بيشهد حبنا
وأنا كم رخيت حبل الصبر
راجيا الأماني تلمنا
لكن لقيت ريدك سراب
تاركني للأسى والضنى
وعرفت بعض الحب خداع
مليان نفاق و فيهو الضنى
وقفلت باب الريد خلاص
ومنعت عن قلبي ألهنا
ورجمت شيطان الهوى
الساقني لي ريدك هنا
وكذبت إحساسي البقول
انك متيم بي أنا
تحياتى ليك الاستاز هاشم وقد اعجبتنى القصيده المليانه بحق وحقيقى . بارك الله لنا بك . واسمح لى
ان اجعل منها البوست الجامع لكل قصيده جميل بنفس نغمة تلك القصيده . انا لا اكتب الشعر ولكتى
اتزوقه واحب هذا النوع منه . فاتمنى من الجميع التداخل بما يقع على العين من قصائد واشعار
وما يؤثر ايجابا بالنفس . وهذه ومن الاشعار التى عجبتنى .
مالينى لحد العشق
لمتين بتتوارى وتبين
لاتصفا لا يوم نتفق
انا كل مااعتب عليك
من شوقى بالشوق بنحرق
يسبقنى درويش الغرام
والقاه فى ريدك غرق
امرق من الوهج العلى
وادخل عليك ذى البرق
تدخل متل ضل الضحى
وبالراحه تمرق منسرق
فاض الحنين والريد بحر
واشواقى من شوقك فرق
فرق المشاعر المانست
قدر الحبيب لا شمتت فيه الخلق
فرق الحنين من زول بريدك بصدق
كل ماطراك بالفرحه يشهق وينشرق
وانت الهناك لا حنه قلبك لاشفق
لو توهك وهم الظنون
من ياتو سكه بتتلحق
وياتو عشره تهون عليك
ما تسوى حاجه وتستحق
وانا ماحدقتك من زمان
كان اصلو هو الريد بالحدق
امرق هداك باب المروق
لو مره نقدر نفترق
وادخل بدسك فى العروق
مااصلو دساس العرق
يامالى عينى باليقين
والله يا استاز هاشم ما بحب الكلام فى السياسه لاننا بجد فترنا لكن القصيده دى حبى ليها جاء من حب الوطن وعجبتنى كلماتها من قصائد طارق الامين الثورويه فتفحصها معى
نمشي وين والدنيا عتمة
يا حكومتنا العزيزة ؟
كل احاديث المدينة
... قصه اليخت اللذيذة ..
والتعرفو من مصيرنا
كلو تحت الطربيزة ..
وكل صباح الامة تصبح
بي مزاج ناس كونداليزا ..
ونحن صلعنا وكبرنا
وتاني ما بيدونا فيزا ..
*****
والقصة ما قصة يخوت ..
القصة قصة شعب
جايع دار يموت ..
قصه البلد المكتح
وباني فوقو العنكبوت ..
قصة الايدز والملاريا
القالو ازمة بنكنوت ..
قصة الكلى لما تفشل
من شراب موية البيوت ..
قصة السيل البيطفح
فات خلاص حد السكوت ..
قصة الوطن المجرح
وكل يوم خاشيهو بوت ..
وايه الفرق بين فرح الوطن
وفرح الحبيبة وبسمتا ؟
وايه الفرق بين الرفد
وبين الضياع والشلهتة ؟
وايه الفرق بين الرسم
في الامتحان والشخبتة ؟
وايه الفرق بين الرسوم
وبين القلع والهمبتة ؟
وايه الفرق بين المقابر
والضماير الميتة ؟
وايه الفرق بين موتة دايمة
وللا موتة مؤقتة ؟
وايه الفرق بين العرس
والقرمصيص والكبرتة ؟
وايه الفرق بين البري
وبين الكلام العكلتة ؟
هل جينا في الزمن الخطأ ؟
هل جينا في زمن
الضجيج والسلبطة ؟
هل جينا بالشعر الطوال
خشينا عهد الزعمطة ؟
هل نحن عاجزين عن
مواجهة المصايب والمحن ؟
هل نحن اكوام من
هلافيت الزمن ؟
هل نحن كالابطال
بندفع في الثمن ؟
أم نحن اذيال الحكاوى الانتهن ؟
هل نحن إنسان القرون الانتهن ؟
أم نحن اصحاب المباديء
ويا أم ضفاير قودي الرسن ؟
هل نحن جادين في الوطن ؟
هل نحن اخوان في الوطن ؟
هل نحن سيان في الوطن ؟
هل نحن اخوان في المحن ؟
هل نحن انسان الوطن ؟
ام نحن من جان نمتحن ؟
من نحن.. يا هذا الزمن ؟
يا ام مصايب قودي الرسن ؟
واهتفي... يا سيدي الحسن ؟
في محراب هواك؟؟
العرض العادي
