قصائد إيهاب الأمين

قصائد إيهاب الأمين

عيونك والمطر


لسة بسأل نفسي

عن سر العلاقة البين

عيونك والمطر

ولسة بسأل نفسي

عن سر التضاد

البين وجودك والخطر

ولسة بتساءل

شنو الخلى الربيع

ينحاز إليك

وينسج نسايمو غنا

ونغم أجمل وتر

إنت الفتحتي براكي

للغيم ألف باب

وبقيتي أنشودة صحاب

وهتفتي للصبح الأغر

عصفورة بشويش غردت

فردت جناحا... اتمردت

جات قررت

دون سابق إنذار السفر

وجعتي قلب الليل

وبعزقتي النجوم

رجعتي للموج التساب

صالحتي مابين بوري يا بت

والسحاب

واحرجتي بالضي القمر

وأنا مندهش

ما بين عيونك والمطر

أشتاق ألاقيك سنبلة

يا وردة ... رقصة كمبلا

قدمتي للشوق ألف ناي

وأنا جيت براي

ما كان معاي غير الهواجس

والنوارس

والكلام

الكان مسافر في الغروب

وجلبتي لي يا بت طيوب

علمتي نجماتي الألق

كرستي لعيوني الأرق

ورسمتي في اللوحة الشفق

شالتني موجات الحنين

فاجأني ضيك حين شرق

مديتي إيدك

وبيك نجيت من الغرق

وهواكي كان نازل مطر

نازف مطر

وأنا لسة بسأل نفسي

عن سر العلاقة

البين عيونك والمطر

المصدر: :::: منتديات أبو فروع :::: - من قسم: منتدى الشعر والشعراء والأدب

---

rwhz] Ydihf hgHldk

[align=right]بتمناك

يا مطراً زارنا
وصحّى موات الأرض البور
بتمناك
والهمس المطوي يدافر
جوة حناجر
شايلة صراخ أطفال مبتور
بتمناك
أنا قلبي النازف
كان بتحدى رحيل الغيم
عن ريداً فيهو النيل
زي أحلى عروس يتراقص
ومن أعماقو يطل النور
أغصان النخلة النايمة
تزور أحضان الجرف الباكي
تعدد في تاريخا الماضي
وعمق الحاضر... وفرحاً جاي
النيل بتباشر بالقمرية
وضل النخلة...
وكلمة عاشق...
بنسج ريدو غنا ودوباي
بتمناك
والقول ممدود أنغام وتحية
بتمناك
بيناتنا سدود...
بيناتنا حدود وسنين ضوئية
دمعة راحل فارق شمسو
وودع آخر نغمة ناي
القمر احتار
في الضلمة الجرفت
مد الحلم اليافع
وحس دلوكة تبشر بالأفراح
القمر النيل...
القمر العرب الرحل
أدى الناس أنوار ساحاتو
وراضي يفجر من واحاتو
وميض البشرى وطعم الكسرة
وحس طنبور
لا شمساً تحزن
لا عصفور يهجر أوكارو
تغني الدنيا ...
تغني النخلة وضل النخلة
وحلم النيل يتخطى السور
بتمناك
يا شغف الوادي...
وشرف أجدادي...
وخالد باقي دهور ودهور
بتمناك
يا مطراً زارنا
وصحى موات الأرض البور[/align]

مشكور اخي محمد
اتحفتنا بقصائد الرائع ايهاب.
وكمل جميلك وادعوه للانضمام للمنتدي
خصوصا انه ماغريب عنا

من ويـن معاك

من وين معاك يبدا الكلام
يا نور رحل...
خلّف مع الحسرات ضلام
يا انتظار خطوة أمل... يا انتصار
يا ليل ممدد
في شوارعنا النشف ريقا
وبكت بعدك سلام



كل النجوم نايحات تشيل
دمعات وجوم رافضات تسيل
ومشى المطر
مشوار دموع
ودع أراضينا اليباب
أنغام رباب...
أنانة ... حزنانة... وتموت
في حلوقا أفراح الوصول
ترحل تفوت
بعدك هجر عشو الوطن
عصفور يدغدغ
عمرو باللوعة الحزن
يا انتحار قمراً طلع
قبال زمن
يوم خاصم السما والغمام



من وين معاك
يا حرقة الأسى والأسف
يبدا الكلام
من وين معاك يبدا الغنا
وتبدا الحروف تحرق تواريخا القدام
الكان مسجلة في الأفق
من وين معاك يبدا القلم
ويكتب رحيل زمن الصدام
يا صرخة القرى والحقول
يا وجعة الموج والفصول
يا همسة الرحلة الأليمة
وقول قديم مزروع شتول
ترحل معاك ضحكة ضفاف
فرحانة بي
موجاً غلب مدو النشاف
من وين معاك
ترجع خطاوي الليل سكون
وتغيّب البهجة الألم والإرتجاف

تسلم اخي محمد علي الكلمات الرائعه ...تقبل اضافتي و مروري ...ودمتم

لكم الحب أيها الأصدقاء الأحباب...
ولكم الشكر على الإهتمام...
هأنا أتيت إليكم دون دعوة...
وهاكم مني قصيدة (عيونك والمطر) بالصورة والصوت...

الرابط

عيونك والمطر

مع خالص التقدير

مرحبتين الشاعر المرهف ايهاب الامين انت اتيت بالف دعوي ودعوي وكل البيوت بيوتك كم شرفنا قدومك هذا ولا املك الي ان اهديك اباتك الرائعه هذه
يا مطراً زارنا
وصحّى موات الأرض البور
بتمناك
والهمس المطوي يدافر
جوة حناجر
شايلة صراخ أطفال مبتور

كلام رائع وجميل اتمنى ان تتحفنا باستمرار ..........
تقبل مرورى

القصائد جميلة جداً ، والأجمــل وجودك بيننا تزيين بقصائدك منتدانا

الف مليون مرحب بالرائع ايهاب والزيك مابحتاج عزومة لانك دخلت كل بيوتنا ومن قبلها قلوبنا الدار دارك ومستنين منك كل جميل

شكرا لكلماتك الرائعه كروعتك فلك التحيه