أمــــل وألــــــم

أمــــل وألــــــم

مين القال الدنيا بخيلـة وديمـة تشيـل أبـداً مـا بتـدي ؟
طبع الدنيا متِـل مـا قالـوا زي الموجـه تجيـب وتـودي
زي ما الفرح أيامو جميلة بتمشي بسرعة بدون مـا تهـدي
الأحزان تتنسـي لحظاتـه وبرضـو تقضـي أيـام وتعـدي
*** *** ***
حزنت كل الدنيـا عليـه لمـان مـات الحـاج (ود احمـد)
يتم خمسة صغـار يتباكـوا أكبـر واحـد إسمـو (محمـد)
بعدو (أميرة) و (أمجد) و (سامي) وأصغر واحد فيهم (أحمد)
رمَّل (فاطمة) الباكية عليهو ونار أحزانـه أبـت مـا تخمـد
قعدت ومسكت راسه تمنح وتبكي الزمـن الجايـر وأسـود
كيفن أقدر أشيل الشيلـة أصلـو الحـال سجمـان ومرمـد
وكيف يا خويا تسيبني برايا في نص ليـل وأمـواج ورعـد
حسـت بـي أيديـن ضاماهـا وحركـة زول قدامـه قعـد
رفعت عينه تشوف الحاصل كـان قدامـه وليـده (محمـد)
قالها يُمه أنا عاوزك تصبري وأعرفي أنو جـد وقـت الجـد
ليشن زغـردوا نـاس الحلـة لمـان قالـوا ولدتـي ولـد
صغير أنا يمكن بس لكيـن فـي الحـارّه الشبـل بيستأسـد
بشيل الشيلة علـي لا تخافـي بـس دعواتـك لـي َّ مـدد
بعود يا يمه الفـرح الضـاع مهمـا إتغيـب وطالبـو أمـد
وفعلاً خـلَّ المدرسـة سافـر ولـلأرزاق مـا خـلا بلـد
والله أجاب لي دعـوات أمـو بقالـه وليـده يميـن وسنـد
وكان بت عمو (أمل) شايفـاه فتـي الأحـلام وبطـل الغـد
وكانت أمل الكل في الحلـة جمـال متميـز وفايـت الحـد
تحبو وكل ما مـرت سيرتـو بتلقـى خيالـه معـاهُ شـرد
وكل ما تحـاول تكتـب ليـهُ آخـر لحظـة تخـاف تتـردد
تقولوا إتكلـم وريـح قلبـي انـا مبعـا بـت وأنـت ولـد
وكيف البت تتطاول وتعشـق ويبقـى سكـات الولـد الـرد
كيفن تسكت ولي تتجاهـل ويبقـى أخيـر مـلاك (السيـد)
الدرويش الزاهـد وهامـل لا عنـدو أهـل لا عنـدو بلـد
الدرويـش الجابـو الشـارع وفـي زاويـة حلتنـا قـعـد
يسقي الشتل الضال بي جوزو ولي أزيـار الزاويـة إتجنـد
تقولـو تعـال بخطبلـك أمـلَ معـاى أخـدم يتخيلـو جـد
تلقى حرت لـك إنقايتيـن وبـوَق وتيلـن ومـارن وسنَّـد
ويومو اليبقى جعان ومفلس وسط الناس ينضـارى ويشحـد
وكلما شِلـت صفيـح للمويـة توتـل جـوزو معـاي ورد
يحكي لي عن حبو وريدو وليهو سنين بـس راجـي الـرد
وأنت سكاتك طال يا غالـي وأنـا راجـاك مستنـي وعـد
آخر يوم في إجازتو مشاله حكالـه ظروفـو وليهـا سـرد
إنو الحالة مِتل ماك عارفه خليط ممزوج مـن فـرح ونكـد
يوم الفرحة تطير بالواحـد ويـوم أحـزان وسهـاد وكمـد
وأول فرحة تعطر بيتنا يـوم مـا إتخـرج وسافـر (أمجـد)
قال في الغربة بحقق حلمو وفيهـا طريـق أحلامـو معبـد
بس نستنَ (أميرة) تكمل وأفـرح بيـك وبـي حبنـا نسعـد
وتبقى الدنيـا إبتسمـت لينـا وليـك بتقـدم ومـا بتـردد
وخلي البينا يكون بيناتنـا وسـوي ضلوعـك للريـد سـد
وسافر وعاد لي شغلو محمل بي إحسـاس أخضـرَّ ورفهـد
سنين عشرين من عمرو تمر ممـا سافـر ويمكـن أزيـد
ما ضاق فيها حـلات النـوم ولا مرتـاح فـد مـره هجـد
وبنيت عمو هناك منتظـرة والعرسـان كـل يـوم تتـردد
يناجي خياله يقولهـا أصبـري لا ناسيـك لا شوقـي بـرد
قريب ألقاكى وأبل الشوق ويبقـى لقـاي لـي حُزنـك حـد
*****
يوم جابولو جواب مستعجـل فتحـو ولـي صفحاتـو فـرد
لقـا جـواهُ المـا متوقـع وآخـر شـي فـي عقلـو ورد
سيل الدهشة جرف تفكيرو ولي لحظات بـي عقلـو شـرد
طول الليل راقـد سهـران لا جـاه النـوم لا لحظـة غمـد
قـرر بكـره يسافـر بـدري ولمـا يعـود حيكتـب الـرد
ولمن صبحت كان في اللوري حجز قدام في الكرسـي قعـد
وصل البيت الطـوَّل منـو بعـد مـا إستـن وصبـرو نفـد
سالم خالتو وعمتو (زينـب) وبالأحضـان لـي أمـو قلـد
حكى بالحاصل ليهم كلـو ولـي مضمـون القصـة سـرد
إنو الجابو أمر مستعجل تفصح عنو رسالـة مـن (أمجـد)
كاتب قال نخطبلو بسرعـة وحـدد لـي بـت عمـو قصـد
قامت عمتو (زينب) فاتـت لـي بيـت عمـو تجيـب الـرد
أمل قالتلهـا خيـر يـا عمـة دون مـا تفكـر أو تتـردد
ضمته عمتها قالت ليها إنشاء الله يكون بيـت مـال وسعـد
إنتي جميلة بتملي العين وبرضـو مهـذب ورايـق (أمجـد)
سكتت لحظة وقالت تضحك عمتـي غلطـت قالـت (أمجـد)
(أمجد) ميـن يـا عمتـي صلـي الإتقـدم أخـوه (محمـد)
قالـت عمتـه لا لا الدايـرك ورسـل خطـبـك (أمـجـد)
ويلا معايا براك بي نفسك شان مـا نمشـي هنـاك نتأكـد
ولمـا (محمـد) أكـد ليهـا كـان إنهـارت وحيلـه بـرد
قالها (أمجد) فعلاً عـاوزك ودمعـو يكبكـب فـوق الخـد
عشانو بضحي بأعظم حاجـة ولـو الحلـم عشانـو إتبـدد
إنتي الروح بهديك إياهو وراضي أموت لـو بيكـي بيسعـد
أنا المهدت طريق أفراحو كيف في يوم أجـي أكـون السـد
ديل أخواني الأنـا ربيتـم وريـدي أنـا ليهـم مـا بتحـدد
أنا خليـت الدنيـا عشانـم وضقـت عشانـم ويـل ونكـد
ولـو بتقسـم فوقـم عمـري بقسمـو فوقـم ومابتـردد
ونحن خلاص أصبحنا أخـوان والموضـوع بيناتنـا أتعقـد
كيفن ترفضي (أمجـد) وترجعـي عـاد تنتظـري (محمـد)
واقفة (أمل) قدامو وتسمع ودمع العيـن فـي عينـه جمـد
كأنو إغتـال الشـوق العـارم ولـي أفـراح جواهـا وئـد
قالت كيف إتهنى بدونك وكيـف فـي الدنيـا بدونـك أسعـد
جرح الليد سرعان ما يبرأ وجرح الجـوف كيفـن يتضمـد
وقلبي العشقك كده يستاهل إنو يعيش طول عمـرو مشـرد
وفاتت خلتو واقف ينضم ساهيـة وسارحـه وبالـه شـرد
وكان الريح تنهر بي بره هبوب وأمطـار وبـروق ورعـد
والسكان من بدري إتلمـو وكـل واحـد فـي بيتـو هجـد
ترجف وتبكي مباري الحيطة نص الليل كان قاصدي (السيـد)
كان في الزاوية رقد هلكان راح في النوم لي إيـدو إتوسـد
متفرشلـو دلـق شـوال جنـب الحيطـة رقـد وإتـمـدد
صحتو قام مخلوع من نومو مـن قدامـه بسرعـة شـرد
قالتلو رضيت بك وبكرة نعرس مـا صـدق بالهجمـة قعـد
وفعلاً بكرة بـلا زغريـد جـاب شاهديـن وعليهـا عقـد
وبكت الحلة عليها هي حية وعاشت يومـه دمـوع ونكـد
وبكى بي حرقه وسافر وراجع جاري زيول الخيبة (محمـد)
كتم الحزن العايش فيـهُ وحكـى بالحاصـل كلـم (أمجـد)
قالو قسمت البت لي غيرك وكلـو نصيـب مكتـوب ومقيـد
خبر (السيد) وامـل اتـوزع بيـن النـاس إنـزاع واتـردد
إنهـا عاشـت فـي تعذيـب والعبـرات إنقلـبـو غــدد
وإنـو قليبـه علـى الأحـزان والالآم بالحـيـل إتـعـود
ويومه الفرحت وجابت بت حزنـت تانـي ومـات (السيـد)
ويوم الصدقة سمايتة كانت قالو النـاس سموهـا (شهـد)
وبعد سنتين إتحكى بالصدفة وفي الحاضرين كان قاعد (أمجد)
عرف القصة تدور حوالينو وقف الـدم فـي جسمـو جمـد
كِره الدنيـا وكِـره الفيهـا وبكـى وإتألـم ولحـق الحـد
قاعد يبكي ويبكي ويبكـي لمـن غـاب ولـي وعيـو فقـد
كيفن أخوي الضحى وعانا عشانـي إتبهـدل وحلمـو إتبـدد
وكيفن أكون أنا سبب أحزانو وكيفن أكون لـي فرحـو لحـد
دا المن قام ما غلط حاشـا ولا بـي حاجـة علـى جحـد
بعد يومين رجـع السـودان دون إنـذار أو سابـق وعـد
عانق أخوه عناق مشتـاق لـي محبوبـو أحضانـو فـرد
قالوا أنا عايزك توعدنـي وتحلـف وتقسـم ولـي تتعهـد
إنك إنت و (أمـل) تتراضـو وعهـد الريـد المـات يتجـدد
وبينك وبينه يعـود الماضـي ويحيـا شـرار الريـد الهبـد
هِن حلين يا أرجـع أسـع ولا كمـان فـي عقـدك أشهـد
أخيراً وافق أخوه وخاصة بعد مـا العـودة طريقـة إتمهـد
وعاد من تانـي فتـى الأحـلام وللمحبوبـة العـود أحمـد
عادو وعـاد الفـرح الغـاب وعـاد مـن تانـي وإتجـدد
وفوق راس بيتم غنَّ القمري رقص طربـان غـنَّ وغـرد
ونخل الحلـة رقـص فرحـان مـال طربـان سـل وجبـد
وقعدو سوا الإتنين في الكوشة وكان بيناتم قاعـدة (شهـد)
بسمته ضاوية أطراف الدارة وختت فـوق كـل واحـد يـد
رسمت لوحة حلم اللقيـا بـي تحنـان فـي أروع مشهـد
وكل الناس بالفرحـة إتباكـو وكـل إنسـان للتانـي قلـد
وكانت (أمل) القمر الضاوي وكل الشافـه وقـف وإتشهـد
وكان الفرح الفـي عينيهـا دون مـا تحسبـو غـنَّ وردد
زي ما الدنيـا أحزانـه كثيـرة الأفـراح مـا ليهـا عـدد

المصدر: :::: منتديات أبو فروع :::: - من قسم: منتدى الشعر والشعراء والأدب

---

HlJJJJg ,HgJJJJJJl

الغالي جادالله
كل سنة وانت طيب
حقيقه الدنيا زي ما فيها احزان
فيها الفرحة كمان
واديك العافية يا مان