قطع التذاكر للسفر
الود خلاص قال اغترب
كبا الهموم في راسو كب
هم للعرس
هم للقرش
هم للملابس والدهب
(بت الحلال) قالتلو يا زولي الحبيب
والحاجة قالت (يامجيب)
نجيهو لي من كل (جيب)
والود كمان شال الدعا
ياربي يسر لي سبب
****
قطع البحر
لا في الهبايب والخطر
لمن وصل (جدة) بسلام
وقتو الوصل . من تاني قام شال الدعا
يا كاشف الشر والكرب
نجيني من (جيب) العرب
(جيب) النصايب والتعب
و(الكشة) والحظ الكعب
والناس تهاتي (الكشة) جات
(الكشة) راحت بي هناك
(الجيب) ظهر فوق الدرب
الزول خلاص قلبو اضطرب
عقلو انشطب
فكر وحاول في مفر
(لوحات حمر) في السكة
زي لمبات خطر
داقش يمين داقس شمال
لمن وقع فوق المطب في (باخشب)
قام خابي خب
خاف السؤال
(وين الهوية) سؤال صعب
برميكا في ساعة غضب
من جدة لمن (ديم عرب)
****
كابوس لعين
زي الكمين
سموه كشة في كل حين
من الصباح لما المسا
جيبات كتيرة مكدسة
ناس تقول صابينا صب
***
صاحبنا قال عامل (مقيم)
زرّوه في حي (النعيم)
شالوه في الجيب واعترف
ساقوه لي سجن القرف
والود هناك ضاق الشقا
وضاق العذاب لمن فتر
قال ما خلاص ما فيش مفر
الجاني في اللوح إنكتب
أحسن أكابس في البلد
أزرع أرض
أصبر وآكل في القرض
أنا أصلي قبال انقبض
في جدة ما خليت محل
أسأل أفتش في عمل
والزول هناك مهما اشتغل
لابد في الجيب ينكمش
والناس هناك مغشوشة غش
(بالكبــــسة) بس تعمـــل كـــــــــرش
***
أهلي الغبش
أحسن لي من جمع القرش
أنا من هناك شفتا العجب
أنا تاني منا التوبة تــــــــــب
لا كشة لا جيب لا تعب
لا جدة لا جيب لا عرب

---

for fun >>>>>hahaha