رائعة حـــــميد
كرويات الصبر البيضاء
انهزمت ووجمت
وخر جوادك قبل يقرب
حميات الغلب السوداء
انلمت وضمت وغزت اجسادك
وبت تهضرب من هضريبك ومر تعذيبك
بين النخله ومجري النسمة
اتساقط طاير
فتفت حتحت ريشو قصادك
وكان دا حبيبك وقمت تجقلب
بين القيفه وباب النهر
دبيب الريح من دبش القهر
اتلوي اتلبد ولدغ الشيمة
الشيمة انكفت
البحر انخج
الزبد انعج
الطين انحترب
ومرقت عقرب
ورفعت شارة اندفعت فارة
تجاه المركب ووقعت سارة
علي صنقور رواسي قريبك
وقام منو هدب وكابسو الجندب
وكان دي امجادك
بين الميضنة والارصاد
انجرحت غيمة
الغيمة الطيبة وحاملة حلال
من ألق البسمة الفي الاطفال
من عرق النسمة الفي العمال
والناس الفال
انسرحت فيها شظايا
آذن الوقت الواقع
بين تغريبك وسرقة زادك
مدت ايدك تالا القبلة رشاشها يصيبك
تسبي نديهتك تفقد جيهتك
تنزف تنسف دانات
دعاة الهوس الديني
الطيني الجيني قوافل اورادك
تقضف
تركض تالا جنازتك ونعش اولادك
باري نحيبك ترجف تتعب
تغضب تهتف
تلقي قصادك سد مرابي
ارزقي رباطة وكوم همباتة
لــــــحي ونخاسة
وكل الساسة الباعوا نصيبط
باستشهادك
عاد انشاء الله تكون الجنة
الماهلة ميعادك
الا الحاصل ديل حسادك
بعض يقول الله لا عادك
وبعض ان لاقي طريقة يعيدك
تاني عشان الموت يصطادك
يا مجلوب في سوق الاخرة
ويا متمقلب تحت جهادك
خر جوادك
مات الطاير لدغت شيمة
كرش الغيمة انبعجت
دمت عينك طمت
وغم قليبك وكان دي بلادك
وين مستغرب ؟؟؟؟؟؟
تقدر تكسر حمرة عينك ؟؟؟؟
تنكر سيفك تابي جفيرك ؟؟؟
دابك تقوي
يابني ادم تفقد مرة مريرة
ضميرك تكسب ثروة
وتلقي العالم تحت سريرك
تشبع تروي وترضع ذاتك
من لذاتك وحلو الحلوي
من ما تـــــــبلـــــع
يوت تتبرع وكلك نخوة
صدقة لعمرك وباقي حياتك
ونصر الدعوة
حبة جوامع
وقبة صوامع
وكوتة وكوتة تفوت الفوتة
باسرع صهوة
عمرة وحجة وتسأل ربك
يقبل توبتك يغفر ذنبك
يمسح ســــفــك
خيرات شعبك
اصلها كانت عترة في دربك
لما تعبت وفاتك حزبك
لما ضهبت وخانك قلبك
كانت هفوة في لحظة سهوة
عن الانسان والحال والاسوا
ودابك فقت وجاتك صحوة
وجيت تكفر يا رب تغفر
اغفر اغفر اغفر
عبدك خاسر شئ ما بيسوي
انت القادر انت الاقوي
يا البتخادع حتي الله
وين الهرة المال والجاه ؟؟
وين السطوة الجشع القسوة ؟؟
اركز اركز لا تجيب رخوة
يا متلبك في الادران
الحجر الاسود ما هو البروة
وما هي مكاوي الكعبة تجيها
حين ينكرفس توب التقوي
ومافي خرط للجنة تودي
لا في خطط ممهورة برشوة
والمشروع الديني الخالص
ما محتاج لدراسة جدوي
يا من قال يااااااااااااارب من قلبو
رد الخالق دائما أيوة
اركز اركز لا تجيب رخوة
اركض اركض تالا اشجار العملة
واقصف اقصف من اوراقها
يمكن تستر عورة شينك
وما سواهو زمانك جملة
اركز اقوي ولف بشكيرك
فوق الراس النشف غيرك
لا تستهوي
قضي منافعك وتم العمرة
وفور موية زمزم قهوة
اركز اركز لا تجيب رخوة
ماك غلطان !! غلطان الشعب
الجز جراد الغفلة كفاحو
الجني ارباحو ضياع ارواحو
وجيد للحاصد وبخت الحاصد
ماك غلطان
غلطانين الشهداء الراحو
الواحد واحد
ماك غلطان غلطان الحزب
الجم سلاحو وخيلو تناهد
ماك غلطان
غلطان زمنك واصلا وطنك
ياها جراحو وعندك شاهد
رفضك0000 سجنك !
شان الكادح والمتكادح
يلقي صراحو ويبرأ الساعد
تهتف لامن تقضف دم
وشارعك هازئ
يهز اصفاحو وبرضو تجاهد؟؟
لامن صقر سن منقارك
لامن طايرك قصو جناحو وخر يكابد
ما حسابك الا عذابك وليلا دائما
كارمه صباحو ونجمك ساهد
لما بديت تفرز لي عيشتك
لاكو عويشتك
واجمعو جملة بأنك تالف
وان سقطت مع انك واقف
فوق اسمنت وتحتك عملة
هم ساقطين في البرد الناشف
وجاهم زاحف قوز الرملة
الاملاق العيش الشاظف
وفي ظلمات الزمن العاصف
قاسي عبور اليم يا نملة
قاسي عبور اليم يا نملة
وهسه غلابا الدنيا
الكنت بتتعب غنية
عان يرتاحو المنك راحو
الكجنو حنك وعنك اشاحو
ضراعم غادي
عليك يتجارو بدون ما تنادي
وصارو نفيرك وقت حصادك
ورابي نصيبك
هرب هرب هرب
خير بلادك بره وسيبك
يا أوعية البلد القطت
ما بسقيك الدم الفاسد
ويا أودية الولد الشطت
ما بيشفيك اليم الراكد
الا الدم البا يلقط واحد واحد
الا اليم اب غيما نقط وجييك قاصد
يا محبوبة في وضع خريف
شالع دجلو وكضبا راعد
بيت راكوبة وحوشو صريف
سوس مرقو وسقفو يناهد
احسن تحت المطرة تقيف
بي كفيك كفي والساعد
وراسنا نضاري الطفل الواعد
لامن يبقي سمانا نضيف
من تخويف
تسويف
من زيف
ونلقي الوطن الحن مو الطارد
والا الموت الدغري الواحد
!! مني متعشم طلوعك
كلي مستنيك تعودي
ويغسل الساحات رجوعك
في حشي احراش الليالي
منتظر بقة شموعك
تشتلي الضوء في الضهابة
ترخي للجايعين ضروعك
يرجع الطير المهاجر
يملأ في الفجاج ربوعك
؟؟ في كلام الناس يفتش
بين عوينات المدارس
في صدي آذان المساجد
ورنة اجراس الكنائس
في اندهاشات العذاري
في ارتعاشات الموامس
في بحر فرحان يبشر
موجو لي جية النوارس
موجو لي جية النوارس
hgJJyJhfm ,hgJJJJJwpJJvhx