الاجابة علي السؤال متشعبة وممكن تاخد وجوه كتيرة..ممكن تكون العلم لانو الحياة صعبة بدونه والاكتشافات العلمية سهلت لينا كتير من الحاجات كانت زمان زي الخيال،والشيخ فرح كان بقول(آخر الزمن السفر بالبيوت والكلام بالخيوت)..وهسع بقت مامحتاجة خيوت كمان..
وفي ناس يقولو ليك ياخي عيش حياتك يعني الحياة عندهم تقضية وقت ومعايشة اللحظة ومافي داعي تتعب روحك بالتفكير الكتير..امير الشعراء احمد شوقي قال(مافات مضي والمؤمل غيب ولك الساعة التي انت فيها)..
واكيد العمل اجابة مقنعة لي حد كبير لانو الاعتماد علي العمل
شرف الحياة ومكسب ليك وفايدة للناس الباقيين..
طبعا من قبيل بلف وبدور عشان اصل لي نقطة معينة وهي انو الحاجات القلتها دي ممكن تتوفر في اي مكان لكن ببقي العمل المشترك والاهم وهو البني آدم نفسو وده طبعا بختلف من مكان لي مكان..ونحن في السودان الوحيدين العايشين الحياة برغم ظروفنا الصعبة وامكانياتنا البسيطة..ليه لانو بنتميز بمجتمعنا البقدر البني آدم..بتلقي بساطتنا وطيبتنا ولهفتنا علي بعض ومجاملاتنا في كل شي حتي لو علي حساب نفسك لازم تمش عرس فلان وفاتحةفلان ولازم تزورو في المستشفي..وممكن تدين عشان ده يحصل وبيتك مايكون فيه طرقة كسرة..
جاوبوني لو نوع الحياة ده موجود في اي مجتمع غير السودان
عشان كده دايما بقول انو الحياة ببساطة هي البني آدم لانو بدون معاملتك للناس انت مابتسوي شي (مع تعدد اوجه المعاملة)وربنا خلق الحياة عشان العبادة بامر الدين وجعل الدين المعاملة..
lhid hgpdhm