سلام عليكم يا الزينين والله انا لي كم من يوم بجي فوق الراكوبه علا ماني قادر اقعد علشان كنت مشغول بالحيل المهم انا جيتكم وطبعا انا زول عريبي وبحب الدوبيت والشاشاي والجابودي ببداء ليكم بي نمه انشاء الله تعجبكم عشان الجبنه تبقه حاره والبعرف دوبيت يرد لي بمربع ولا مربعين اها انا بديت
--------------------------------------------------------------------------------



الليلة البلد أصبح معاي متقفل

كل ما أقوم صعيد انا بلقى روحي مسفل

عيني سنقدن والنوم بقالــى تجِفِــل

الميزانو بعد الرحجة جابلو تِنِفِــل



البارح بعد ناس الفريق ما هجـــعوا

عقبان صادنى طاعونى المنوسر وجعوا

البــدو والبنـادر والعريب النجــعوا

ما ببقــولي متل القدمــوني ورجعوا



بِريريبة البساتين والعُلو المتسايف

ممطور برقو يلهب همبريب وعسايف

بطارية اليمني .. الضميرك هايف

دغسة وفرَ وشامك خلى نومي جسايف



أبكَن يا الـ بقيتن للغبينة مساكِن

عليكَن طال .. ظِبَيْ ناس بت فلانة فَرَاكِن

حسس الديمة قمْحان منّهِن شرَّاكِن

زي ما بْتَرْكُن النار في الحجر .. فِيْ راكِن



نسيمِك يا ام هَبَج شفخانة الـ متألّم

حُقَنِك سيف.. وسَلْفِك راس حصان متكلّم

أكان كتّم سماكي وليلِك أمسى مضلّم

ما بْشُق بيكي طالْب الجامِعة المِتْعلّم