سلام
زمانا ما كان في تلفزبون و لا مسلسلات
اظرف المسلسلات كانت الحجا
فاطمة السمحة امحمد اخوها و الغول
السحلوة و البنات و بطل ينتصر للحق
بعد شوية كنا بنتابع مسلسلات حمدنا الله عبد القادر الساعة خمسة الا ربع في الراديو
في كلو كان الخير بنتصر علي الشر
واحدة من الاشياء الكانت تفرطق راسي دعاء عماتي رحمة الله عليهن
يا ود رابح يا التور القارح
يا الشيخ القرشي ود الزين
يا اب سقرة ود عجين
يا الفكي الامين ود امحدين
كان الوالد = مد الله في عمره = ايضا كثيرا ما يصطحبني الي طيبة الشيخ القرشي و خاصة في زيارته لابونا الشيخ الزين
كنت استمتع باكل الفول و الرغيف في حضرة ابونا الشيخ الزين
و طبعا للفول و الرغيف في طفولتنا هشاشة و بشاشة و فرح و افتخار لاتوجد و لن تعرف و تعرف حتي عند الكنتاكي و البتزا بانواعها
كنا لمن ناكل فول و رغيف ما نغسل ايدينا حتي يتمكن اترابنا من شم و تاكيد اكلنا للفول و الرغيف.
كنا نعيد مرات بي طيبة الشيخ القرشي و نستمع باكل الرهيفة بي ملاح ام رقيقة و عليها طمام و بصل اخضر في الفطور = لانو الفطور في معظمه كان لقمة. و الرهيفة للغداء و العشاء ممكن يكون واحد من الاتنين = في بيت شيخ ابراهيم الدسوقي ود الشيخ الزين
كان ما يضايقني كمية التراب الذي يهيله الوالد = البركة = علي راسي و جسمي = و شريط القماش الذي يربط علي زراعي = و طبعا الوالد كان بيمارس معاي الشي ده لغاية الجامعة
كنا نحظا بدخول القبة .
في احد المرات و كنا في قمة شيوعيتنا و اتذكر عند حدوث حادث لابن عمي شيخ الطيب محمد محمد احمد = رحمة اله عليه = اتي لزيارته ابناء الشيخ القرشي و كان ذلك بحضور الاجداد جدنا احمد ود سعيد و جدنا احمد ود عبد الحليم رحمة الله عليهم =و هم من المريدين و هم الاصفياء الاتقياء الذين تتنسمهم المعرفه = عرفت فالزم = و جدنا الشيخ احمد ود سعيد في ظني بالله انه جمع الصفات الاربع للخصوصية اي انه من القوم الذين لا يبيحون حزامهم الصمت زادهم اليقين راحتهم السهر اختلاطهم العزلة لله . و قد حاول احد الاخوة من الذين تزوجو بابي فروع ان يسبقه يوم الي المسجد في يوم الجمعة و الجد احمد اشتهر بانه من اوائل القادمين لصلاة الجمعة . عرف هذا الاخ بان جدنا احمد ود سعيد يحضر حوالي 11:30 فحاول ان يحضر الساعة حوالي 11 فوجده قد سبقه بزمن
هذا الاخ ذكر و العهدة علي الراوي بان الجد احمد كانما قال له شوف غيرها و العب بعيد
االمهم في الامر حاولت ان اتصرف ببعض النفرزة مع اولاد الشيخ فما كان من الجد احمد عبد الحليم الا ان انتهرني
جدنا احمد ود سعيد هدن اللعب و ذكر بانه و بعد انتقال الشيخ الطيب ود الشيخ القرشي زار مرقده بعد فترة و خاطب القبر قائلا:
معقول شيخ الطيب اكلو الدود
ذكر الجد احمد بانه و بعد انتهاء حديثه ظهر له وجه الشيخ الطيب كما هو.
شدني الامر
استفزني احد الاخوة من الرفاق و قال لي جدكم كضاب
قلتا ليه و شرفي الماركسي ما كضاب
ودي طبعا كانت الحليفة القمة عند الرفاق انذاك
اندهش الرفيق و قال لي كيف تحلف بي شرفك الماركسي علي شي زي ده
قلتا ليهو صدق جدنا احمد ود سعيد بخليني اقول انو هو شاف حتي لو تجسد خيالو لي حقيقة شاف لانو متاكد انو ما بيكذب
ما دعاني لذلك انو الجد احمد وكان وكل احد احفاده عليهم جميعا الرحمة بان يرعي بغنمه و في الرواية انو الحفيد ذهب بالغنم القطن و لانو جدنا احمد ود سعيد اعتبر الرعي في القطن زي السرقة قام بحلب لبن الغنم في الارض و لم يستعمل منه قطرة
شفتو كيف الدين و كيف الشريعة عند الناس ديل .
ساواصل ان شاء الله
التعديل الأخير تم بواسطة عبد المنعم سعيد ; 04-18-2010 الساعة 02:28 PM
|