بريدك انت يا امي
 

محاولات شعريه

بريدك انت يا امي ..
وريدك بجري في دمي "
اتغلغل في مسام الروح ..
في صحياني واحلامي "
"بريدك انت يا امي"
***
بريد الضحكه في عينيك ..
تشيل همي والاحزان "
بريد اللمسه من ايديك ..
تداعب كتفي بي تحنان"
بريد القعده في جانبيك ..
تانس وحشة الازمان "
" بريدك انت يا امي "
***
منوالغيرك ..
وكت النوم يجافينا ..
يساهر الليل حجا ولولاي "
ينادي من الصباح للشاي ..
تعال ياولدي جنبي حداي "
تكب الشاي تونسني ..
انت مرادي وكل مناي "
اشوفك بكره تتعلم ..
وتتوظف تتمو رجاي "
اشوف الحنه في ايديك ..
وافرح بيك والقي هناي "
"منو الغيرك"
***
مهما كتبنا من كلماتنا ..
الف قصيده ما بتكفيك "
ومهما رسمنا في لوحاتنا ..
احلي معاني ما بتوفيك "
لانك انت نبع الخير ..
بالطيب والحنان الفيك "
لانك وصية الرحمن ..
بالاحسان تبر والديك "
لانك عايشه في الوجدان ..
وباب الريده قافله عليك "
" بريدك انت يا امي "

الاخ محمد احمد الذين ...... التحايا والاشواق ....... محاولة شعرية رصينة ويبدو انو سبقتها محاولات ..... حاول ان تجعل هذة المحاولة قاعدة انطلاق الى رحاب الشعر بصورة عامة وشعر الحنين بصورة خاصة ...... تحايا لكل امهاتنا ...... واسأل اللة ان يوفقك فى ابراز موهبتك الشعرية والمرة القادمة تكون قصيدة شاعرها ابوسن وليست محاولة شعرية ...... بالتوفيق .

وعليكم السلام لاخ الغالي النور حسب الرسول شكراً للاشاده والتشجيع .. ماعندنا امكانيات شعريه هي محاولات خجوله قلنا نشارك بيها عسي ولعل تلقي الرضا والقبول ولو القليل ..
شكراً للمرور