من طــــــــرائف عيد الأضــــــحى
 

من طــــــــرائف عيد الأضــــــحى


قال: أن جارهم وصاحب حافلة (جرايس بحري أم درمان) في آخر مشوار من بحري إلى سوق ليبيا قرر أن يشترى الخروف لأنه كان اليوم وقفة وغدا عيد فبدلا من أن يذهب ويقوم بشرائه بعد الصلاة وما ينطوي على ذلك من مخاطر و احتمالية عدم وجود خراف أو وجودها بأثمان مرتفعة قرر أن يشتري الخروف وهو في طريق عودته إلى بيته و قد فعل و وضع الخروف داخل الحافلة وعندما هم بالتحرك فإذا بجارهم ينده عليه يا فلان أقيف ... إن شاء الله ماشي على الحلة ؟؟ قال ليهو أيوه ... فقال الجار الحمد لله طيب خليني أرفع الخروف حقي معاك ... قال ليهو جدا و في أثناء ما هم في طريق عودتهم لمنازلهم وفى الطريق اشر لهم شخص ... صاحب الحافلة أكد لجاره أنه لا يرغب في حمل ركاب ... ولكن الجار قال له يا أخي الدنيا عيد ركبوا أخد فيهو الأجر... فعلا توقف ورفع هذا الشخص و بعد مسافة ليست بطويلة وجدوا شخصا أخر اشر لهم فتوقف له لأنها بشريات العيد ... المهم في الأمر ركب الشخصان في المقعد قبل الأخير واحتلت الخراف المقعد الأخير على الأرضية بعد ذلك دار بينهم نقاش الخراف ( راكبي الطريق )
*والله السنة الخرفان غالية شديد
*رد الراكب التاني قال ليهو اى غالية
* الشخص الذي ركب في الأول قال للتاني أنت عارف أنا هسي اشتريت الخروفين ديل ب800 جنية رفعتهم في الحافلة قام ضرب لي اخوي هسي قال لي أنا جاي من الدمازين وجايب معاي الخرفان وأنا ما عارف اعمل شنو والله لو جابو حقهم بس ببيعهم .
* رد صاحبنا الركب آخر قال ليهو أنا يا زول بشتريهم منك بسعرهم؟
* رد صاحبنا الأول أتفقنا يا زول جيب قروشك
*فعلا قام بعد المبلغ وسلموا ليهو
وطبعا صاحب الحافلة وجاره ما جايبين خبر
اها الزول استلم المبلغ وقال لصاحبو أنا طبعا بيتي هنا بنزل و إنت الزول بتاع الجرايس ما تحاسبوا لأنه حسابو خالص..
صاحبنا وقف بتاع الحافلة وقال ليهم شكرا جزيلا يا جماعة الزول دا ما تنسوا وراء .. و تحركت الحافلة في طريقها
بعد داك طبعا الشخص الركب آخر وقّف صاحب الحافلة و قال ليهو لف يمينك!!!
استغرب صاحب الحافلة من الموقف لأنه راكب فانوس و ملح
فقال ليهو ليه في شنو يا إبن العم؟؟
قال ليهوعشان أنا بيتي بجاى والخرفان دي إلا انزلها جمب البيت!!
جار صاحب الحافلة قال ليهو ياتو خرفان؟؟؟
صاحبنا قال ليهو دي أنا اشتريتها من سيدا زاتو الزول المأجركم نسيتوه خلاص!!
ردوا عليه و أكدوا له أنهم هم أصحاب الخرفان
إلا أنه أصر انه هو صاحب الخرفان و أنه دفع تمنهم كامل عدا و نقدا..

منقوووووووول (جزء من قصة واقعية)