|
هاجس التعليم في الغربه
عندما وصل ابني سن المدرسه وانا في الغربه تشتت افكاري مابين الاراء المختلفة
ادخليهو مدارس سودانيه لا المدارس السودانيه هنا ضعيفة المستوي ادخليهو مدارس عربيه سعوديه حكوميه فالمنهج اقوي والنظام التربوي مكتمل لا باس ولكن الافضل في المدارس السعوديه الخاص لان به اللغه الانجليزيه تدرس من الصف الاول وكذلك الحاسوب وكذلك الفصول بها عدد قليل من الطلاب وامكانية المتابعة اسهل والمشاكل بين الطلبه اقل وهو صغير السن مع العلم بانها مكلفه ويصعب التحول الي الحكوميه مره اخري مالك بكل ذلك الموضه الان والافضل له الامريكي او الانجليزي.. والامريكي اقوي لان الهنود هم الذين يتولون التدريس في الانجليزي وبالتالي لغه انجليزيه اقوي ومستقبل باهر وطبعا ولاني ام في المقام الاول ومعلمه في المقام الثاني فضلت الوسط لا اريد لابني ان يبعد عن اللغه العربيه او حتي ان تدرس له بصوره هامشيه او كلغه اخري لانها لغة القران في المقام الاول واخاف من تلك المناهج الاجنبيه وما بداخلها من ثقافات بعيده عن ديننا مع علمي بتاثير المناهج علينا وما يرسخ في الطفوله هو الاقوي اخترت مدارس سعوديه ولايماني بان اللغه الانجليزيه مهمه اخترت الخاصه منها حتي يكون لديه خلفيه عنها ومع اجتهادي فلا باس فهي تظل لغه ويمكن تحصيلها مع الاجتهاد وقناعاتي دائما ان الشاطر شاطر مهما تعددت انوع اللغه التي يدرس بها والان وابني يكمل الصف الخامس رجع الهاجس مره اخري.. لم اندم علي عدم ادخاله المدارس الاجنبيه لان السودان رفض مؤخراشهادات هذه المدارس وان لا دخول للجامعات الا بسبعه مواد وهم يمتحنون من خمسه مواد والسوداني ما زال ضعيفا ولا تطمئن النتائج التي تظهر من تلك المدارس والسعوديه يقللون النسبه كثيرا عندما يعادلونها بالسوداني فما رايكم وارجو من كل من له راي او تجربه ان يفيدنني بس ما تقولو لي امش السودان لقناعاتي بان لا شئ يعدل وجود ابنائ مع ابوهم وبالتحديد الصغار منهم وكلهم صغار بس اذا كان هذا حلا ما مشكله قولو ... ولكم مني كل التقدير وفي انتظاركم!!!! |
هاله .جمعة مباركة .عليك وكل الاخوة. برجع لموضوعك ب تفصيل وعن تجربه . يوم الاحد.الجمعة ف سودان معرف برنامجها والسبت بشتغل طباخة طول اليوم. (أطمئني مابقول ليك ارجع سودان)..
|
هاجس
السلام عليكم ورحمة الله وبركاته
الاستاذه هاله جمعه مباركه عليك وعلى الاسره الصغيره وعلى الجميع التعليم فى رائى الشخصى فى المرحله دى ما بقلق شديد وابنك ربنا يحفظو ليك لازال فى بداية المشوار والتعليم فى السعوديه افضل كثير من السودان فى الفتره دى منهجم اقوى ووسائط التعلم متوفره وفوق هذا وذاك الاستقرار الاسرى ونفسيات الاطفال لها دور كبير فى التعلم فلا تبعدى اولادك عن ابوهم وخليك هنا ولسه قدامك المرحله المتوسطه ثم المرحله الثانويه وسامع انها سوف تكون من 4 سنوات هنا وكذلك فى السودان فى اقتراح لترفع الى4 سنوات يعنى لسه الولد قدامو 8 سنه للجامعه باذن الله خليه يواصل بى هنا ولا تغلطى وتبعديهم عن ابوهم فالاستقرار الاسرى مهم جدا جدا فى التحصيل العلمى وبعدين بى هناك الكل مشغول فى روحو والتربيه بتصعب عليك لوحدك خاصة وان الاولاد ماشين اكبر ومشاكلهم ومتطلباتهم ح تزيد وتكبر معاهم وهمهم بزيد مع الايام والمسئوليه اكبر واعظم فلا تشيلى الهم من الان واطمئنى غدا اجمل واحلى الله يديك ليهم الصحه والعافيه وتفرحى بى نجاحهم وتفوقهم يارب |
اخي ميرغني سلام الله عليك وبعد
شكرا علي طمانتي ولكن لم تقل لي لو كنت مكاني ماقرارك سيكون في المستقبل يعني خليتها مفتوحه وزي ما قال لي ابوي الله يحيينا لما محمد ولدك اكون ماشي الجامعه ... بس انت عارف في المرحله دي في حاجه اسمها المتوسطه او امشي سابع وثامن في السوداني وده مصدر الحيره ارجو افادتي مشكورا |
الحبيبه ساره في انتظار تجربتك لانها تعني الكثير وارجو ان لا تبخلي بها وايضا الي كل الاعضاء لو كنتم مكاني ما قراركم ؟مشكورييين
|
هاجس التعليم فى الغربه
السلام عليكم ورحمة الله وبركاته
الاخت هاله لكى التحيه والتقدير والامتنان واشكرك على وضع ثقتك فينا ومعرفة اراءنا ومشاركتك الهم ومن خلال ردك واصرارك على هذا الامر يظهر انك لا زلتى متردده فى الامر ولكن وقبل اخذ اراءنا السؤال المهم ماهو رائ ابو الولد فى الموضوع اياه وانا اقترح عليك مشاورته وعرض اراء الاخوه فى المنتدى لو تكلفوا الرد عليك ولكن رائئ الشخصى انا وبعد تجربه قريبه ما تبعدى الولد عن ابيه بالذات فى السن دى واخطر مرحله بيمر بيها فى حياته المرحله الحرجه دى وفى العمر ده بالذات طبعا انا بتكلم ما بعد صف سادس والحياة فى السودان اختلفت كثير عن زمان ومرحلة المراهقه دى اصعب المراحل وانتى لوحدك ما ح تقدرى عليها ومحتاج لابوهو يكون قدام عينه وتحت المراقبه اللصيقه ومن ناحية المنهج ومستوى الدراسه السعوديه تطورت وفاتتنا بمراحل بعيده ورايئ الذى اؤيده بشدهخليك مع ابو عيالك فى امن وامان وبعد اربعه سنين ان شاء الله نعيد التفكير فى الموضوع من جديد ولكل حادث حديث |
اخي ميرغني سلام من الله عليك
الشكر الكثييير لاهتمامك بهواجسي والرد بما يتماشي مع افكاري ....... سالتني عن راي والده ...نحن مازلنا في مرحلة النقاش ونسال كل من حولنا عن تجاربهم لنخرج بالافضل . فما زال امامنا الصف السادس وبعد ذلك علينا ان نقرر هل يذهب الي المتوسطه في التعليم السعودي ام نحوله الي مدرسه سودانيه وبالتالي سابع وثامن مع الاتفاق غير القابل للنقاش ان يكون الاولاد ونحن معا سواء هنا او في السودان علما بان الولد له راي وهو يرفض تماما التحول لمدرسه سودانية ورغم ما قلته عن المنهج المتطور مازال السودان يصر علي انقاص الكثير من الدرجات عند معادلة الشهادات العربيه لدخول الجامعات السودانيه وهناك محاوله ان تقل من 11 درجه ال 7 درجات وشكرا ومازلت في انتظارك اختي ساره وجميع اعضاء المنتدي |
لك التحية العزيزة هاله..واسفة أتاخرت عليك لكن تجربتي ما بتشبة تجربتك كثيير
لكن من مداخلاتك ..تاكدت ان وجودكم مع اولادكم في السعودية الان (رائ محسوم لانقاش فيه) طيب خطتكم للدراسة الجامعية انشا الله بتفكرو انها تكون في السودان (رائ لا نقاش فيه) ولا في احتمال/أمكانية الاولاد يدرسو في السعودية او اي جهه اخري. لو ح يدرسو في السودان (لعدم ضمان الظروف مستقبلا ..والاقامة في السعوديه ) احسن من اسة وديهم مدارس سودانية..عشان تضمن يمتحن ثامن وبه يمتحن شهادة سودانية.. لكن لو البئية في المدارس السعودية الخاصة مؤهلة اكثر لابات كمبيوتر ولغة انجليزية ومعلمين اكفاء خلاص خليه فيها بس تضحي بانه ح يمتحن شهادة عربية ويج هنا ينقصوها 12 % وماتضمن حكاية انو ح ينزلوها 7% او يلغوها ..البلد دي ما فيها شئ مضمون كل يوم بي رائ وكل سنة بي منهج..خليك علي اسوء الاحتمالات.وهو تنقيص 12 % عن نفسي لاني حسمت رائ (لا رجعة فيه) انو اولادي يدرسو في مدارس سودانية ويمتحنو شهادة سودانيه حتي لو بيئه المدرسة مامتطور مقارنة بالمدراس الاجنبية والمنهج كلوووو حشو (ملبسنا/ماكلنا ) وحاجات بالبديهه عارفنا لكن عاملين ليها قومة وقعدة ومنهج..برضو صبرنا عليها عشان ما عندنا فكرة/ ولا امكانية )نوديهم جامعات اجنبية عشان كده مستحمليين ده كلو.. وفي النهاية (استخيري..واستشيري) والفيو خير ربنا يعملو http://www4.0zz0.com/2012/04/21/07/947547211.jpg |
| الساعة الآن 02:39 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir