|
إنتي وصفِك زيّو مافي !!
إنتي ..وصفِك زيّو مافي !!! إنتي روح عصفورة هايمه ساميه تسبح في مداها وديمه تعشق ....لبراحها تنشد الفرح الخرافي تنهر الحزن البيكتف لجناحها وتكسر القيد البيكبل لصراحها وتتلو في تحليقها غنوة فيها ريد والله دافي ماإنتي وصفك زيو مافي إنتي المناره السامقه عاليه وإنتي جد والله غالية !! إنتي الدليل لسفينة تاهت كايسة بس أقرب مرافي و (إنتي وصفك زيّو مافي) إنتي نبضة زول عِشق ديمه هيمان بحبيبو زول ولوف ..مخلص عطوف عمرو ماكان قِسى وعمرو ما كان مجافي ما (إنتي وصفك زيّو مافي) إتي فرحة طفل ..مدهش في يوم حِفظ ..سورة تبارك قام ابوه .. قال ليو عوافي (إنتي وصفك زيّو مافي ) إنتي ..زينتي النجوم اللامعة فوق تضوي السما ديمه تبرق لعلاها وأصبح اللمعان إضافي ( إنتي وصفك زيّو ماااافي ) يا ظريفه ..وياولوفة ماني ناكر ماني جافي وبعدي عنك وإرتحالي كان عشانك يالطيفة !! ياما حبك ..فيني ساكن وياما ريدك ليو كتمت وياما في عشقك نظمت وتهت في دنيا القوافي ما( إنتي وصفك زيّو مافي ) _________ الفاتح الحلاوي ( ود السميح ) جده 2009 |
لا فض الله فاك يا ود السميح
|
مرحباً بعودة شاعرنا المرهف ، قصيدة جميلة وأهو بالمرة طلعت لينا عبد السلام بعد الغياااااااااااااااب فكثر ، كثر الله خيرك .. . |
دائما في القلوب ياود (السميح) ومكانتك بغيابك فارقة وتنتظر ولوج نورك اليها والاخوان ايضا ونتأمل ظهور القمر للم الشمل وقضاء الامسيات ، ونتأرجح معا في تزاكير قديمة جعلت قلوبنا عامرة الي الان بالمحبة وتمسح لنا غبار هذا الزمن اللعين ، ننتظر دائما ونتأمل ونعلم اننا سوف نلتقي قريبا بأذن الله في ساحة عامرة تجمع قلوبا احبت بعضها كثيرا وتعانقت في الزمن الجميل وتواصل العناق ايضا الان بفضل زكريات سابقة رائعة وجميلة
|
اقتباس:
عبد السلام- كيفنك ؟ .وينك ياراجل ياخي والله مشتاقين عديل كده !! أشكرك على مرورك المشرق , ودام وصلك |
اقتباس:
"]معتز يا زول يا طاعم كيفك ؟ واحدفينا كان مسجل غياب يا إنت أو أنا . اشكرك حتى ما بعد حدود الشكر . عارف فرحان قد شنو ما تتصور الخميس الجاي حأكون في ود أبفروع في زياره خاطفة و طلة سريعه . [/color] |
اقتباس:
مرتضى يا قريبي كيفك وكيف أخبارك ؟ ياخي أشكرك على مرورك الباهي , الذكريات وقود لمركبة تصارع وحل ورمال النسيان , جعلنا الله دوماً إخوة متاحبين و أدام الله حبال الوصل بيننا أبناء الجميلة ( أبوفروع ) . دمت أخي . |
| الساعة الآن 07:37 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir