:::: منتديات أبو فروع :::: - متاريس ليك من العسكر

متاريس
بشوفك تبكي ياعازة وماعارف بتبكي منو؟
بتبكي الماتو ولا الفاتو ولا الفيك صمد وإتكتمت أناتو؟
عشيقك عازة مابينساك وكيف ينساك وإنت من القليب دقاتو
عشيقك عازة مابسلاك وكيف يسلاك وفيك كل يوم تزيد آهاتو
عشيقك عازة كيف ينساك وفيك أخواتو فيك خالاتو فيك عماتو
دموع عينيك ياعازة نزيف من قلبو يتقطر
وسواد حزنك بشوفوعليك بياض مرمر
رموش عينيك ياعازة شرار من عينو يتنتر
ولون عينيك ياعازة من الحسرة بشوفو إحمر
سواقيك سايقه ديمة تدور وزرعك مابشوفو إخضر
ولاليلك صباحو يطل ولاسحابك بيسقولومطر
وسفنا تقالب الأمواج ومالاح لي مراسيك بر
ونمير ورقك يحسن صورتو يتقندف ويتعطر
ويصول في دروبك التايهات ويصهل ذي فرس عنتر
وما شايف بحار ريدك بتطفو كتير وتتعكر
وماعارف عشيقاً ليك مجافي النوم عليك بيسهر
عزاك ياعازة للماتو وفاءاً ليك من العسكر
وعزاك ياعازة للصامدين متاريس ليك من العسكر
وعزاك ياعازة للفاتوك محطات ذاد قطار صّفر
زفافنا عليك ياعازة بشوف أيامو تتبحتر
وقريب ياعازة نعطر صدرك المحزون عطر أفراح أريج عنبر
وقريب رياعازة نمسح حزنك المقهور ونقول لي كلاب حواريك جر