:::: منتديات أبو فروع ::::

وآه منك يازمن
زمن الخداع زمن المحن
زمن الببيع حبو بي أبخس تمن
حبيتو جد وكان لي حبيب
قشقش دموعي وبي حنان لي مسحن
أداني حب وكنت فاكراهو الجميل
وخلاني أحلم بالمستحيل
وشال أحلامي وبي ظلم قام جرحن
وأفراحي لوعندك مزاج هاك أضبحن
وشراييني السريت فيها مسرى الدم قطعن
ماأصلو قلبي الحنين بيك إتمحن
وبي خنجر خداعك المسموم إنطعن
لكن وحات ربي العظيم
الخلاني صابرة على الشجن
دموع الشوق من تاني ليك مابنزلن
والقلب لو ليك تاني حن
إنشاءالله دقاتو لي يتوقفن
وأخيرلي من أحبك أموت وأندفن
وماتخاف علي
أفراحي من تاني بيجن
والهموم من جواي بتزحزحن
وإنت يالقلبك غريب
دقاتو للريد مابعرفن
غير الكضب وزيف المشاعر مابحملن
ماأصلو الخداع ده فنون وفن
نسيتك أنا وأيامي معاك إتنسن
وأبقى ألقاها القلوب الليك في يوم لويصدقن
ووين تلقاها العيون الزي عيونا الليك صفن
خليتك أنا للأيام وأكيد الأيام لي بنصفن