|
الشيخ محمد الأمين القرشي
[align=right]السلام عليكم ورحمة الله وبركاته
لقد تم نشر هذه المادة وفقدت بالمنتدى السابق، حيث كتب الأستاذ/ خالد محمد الأمين القرشي عن والده بهذا المنتدى وايضا كتب حفيده المعز أبراهيم الهادي بمنتدي أبناء منطقة الحلاوين ونعيد نشر هذه المادة مرة أخري للمهتمين بمثل هذه المواضيع التوثيقية. ما كتبه المعز أبراهيم عن جده الشيخ محمد الأمين القرشي (نقلاً عن منتدى الحلاوين) http://www.l22l.com/l22l-up-3/9b665fb197.jpg غير ميّال او مايل لحديث بلا عبرة عن حياة الشيخ القرشى، لذا سأحاول قدر امكانيتى المتواضعة جداً ان اجاوب على ربطة اسئلة: هل كان فى حياة الشيخ القرشى عبرة؟ إن كانت، فما هى؟ وكيف نعتبر بها ونستفيد منها ونبنى عليها؟ او كيف نقومها بأخذ المفيد منها وطرح ما لا يفيد؟ والكلام بشجاعة عن الشيخ القرشى مهم لأنه كان رجلاً شجاعاً حتى فى كلامه عن نفسه فكان لا يخاف، هدفه واضح وطريقه بائنة، لكنى بادئ بما قال هو عن نفسه في الحديث الذى دار بينه والدكتور أحمد عبدالرحيم نصر والأستاذ الطيب محمد الطيب وكانا زاره فى أبوفروع فى 3.10.1971. جرى الحوار باللغة الدارجة وسأكتب بعضه كما جاء فى شريطى التسجيل بالرقم م.د.أ.أ (277) والرقم م.د.أ.أ (278) والموجودة نسختهما بجامعة الخرطوم على ان يكون هذا جزءاً اولاً من عرض الموضوع. أنا ولدونى فى رفاعة. أبوى القرشى ود البصير من الحلاوين. النسب منظوم منى لحد النبى عليه الصلاة والسلام. أنا محمد الأمين. محمد إسمى والأمين لقب. والأب القرشى بن البصير الحلاوى. والدتى من رفاعة لأنو ابوى كان يقرأ العلم فى التركية السابقة على علماء رفاعة. وكان قرأ على جدى ابو امى. جدى ابو امى قاضى رفاعة. إسمو محمد إبراهيم. اهلو عمراب. وخالى إسمو حامد ود القاضى، كان صديق ابوى. وبعدين جات المهدية وابوى بقى امير رفاعة فى المهدية فقام تزوج بت القاضى محمد ابراهيم وولدت انا فى رفاعة يوم الأربعاء 12 ربيع اول سنة 1308هجرية. وبعدين ابوى جاب امى سكنا فى هذه القرية (ابوفروع). اهلنا الحلاوين ورانا هنا لكن ابوى سكن هنا لأسباب لأن البحر وفيها السواقى وفيها الخضار. وابوى بصفتو امير، خيل المهدية بتجى من الخرتوم ومن امدرمان هناك وتجى مارة وحلاّلنا فوقها آبار، لما يجو اربعين خمسين حصان ما ساهل يسقوهم من البير. عشان كدى سكنا هنا فى البحر. المعيشة ساهلة. نشأنا على هذه الحالة وما تغيرنا من سكانها. اما تعليمى قريت فى الخلوة حسب ما ابوى جابنى ووالدى توفى وانا عمرى سنتين. امى كانت غنية. كملت فى خلوة الشيخ القرشى وكانت عامرة فيها سبعين تمانين طالب. بعد ذلك اكملت القرآن ومشيت لناس رفاعة اقرأ العلم شوية شوية على العلماء زى الفكى يوسف ود نعمة. بعد كده احببت امشى الكلية لأنو ناس عبدالله ود البنا واولاد اخوالى ناس رفاعة واولاد ناس شيخ لطفى مشوا. قلت لشيخ لطفى انا عايز امشى الكلية شفت اولاد رفاعة مشوا. قال لى طيب امتحن وسألنى فى النحو وسألنى فى كدى قال لى انت بتنقبل فى الكلية لكن فى الحساب لقانى ما بنفع قال لى فى الحساب ضعيف ما بقبلوك. قال لى لو تجى تقعد معاى بوريك الحساب. قلت ليه انا ما بقدر اقعد معاك عندى اولاد خالى بقروا فى مدرسة رفاعة بقعد مع اولاد المدرسة ديل اتعلم الحساب وقلت ليه كتر خيرك. مشى قال ليه يا بابكر دا ود القرشى، قال لى انت ود فاطمة قلت ليه آآى... فى شهرين تلاتة بقيت فى الحساب فايتم. جا ميعاد الكلية قمنا مشينا، لطفى معلمنا القبيل مشينا معاهو. نزلنا عند ود البنا قريبنا. إمتحنونا طلعت الاول ودخلت الكلية وكنت مبسوط من الحكاية دى. بعدين ارادوا يقسّمونا قلت ليهم الا تسوونى قاضى او بفوت امشى اهلى، ده كان سنة ثمانية. بعدين كنت انا مدرّس فى علوم القضاء. بقونى قاضى، عرفت المسألة، وبعدين اتعينت عامل قضائى للدويم وحبب الى العلم. فى الدويم فى رجل عالم مالكى فقيه درست عليه وبعد كده صرت كلما امشى فى بلد ادرس. ما قطعت الدراسة ، طالب علم لى يوم الليلة [/align] |
[align=right]انا افادتنى قراية العلم بره. طلعت من الكلية عندى استعداد لطلب العلم. قريت على الشناقيط، على العلماء ولذلك مشيت فى العلوم اكتر بهذه الطريقة قريت على الشيخ احمد الجداوى والشيخ عبدالعزيز سلام والشيخ محمد مالك. سنة 17 افرنجى كنت قاضى فى الدلنج انظر قضايا العرب وتركاتهم ورأيت احوال النوبة العريانين ورأيت اعمال القسيسيين معاهم. فمن ذلك الزمن قلت: إن ربنا خرجنى من الخدمة بالسلامة ودخلت المعاش إن شاء الله أجى اقعد فى هذه البلاد وادعو الناس الى الله لأنى قريت فى صحيح البخارى النبى عليه الصلاة والسلام قال للإمام على "لأن يهدى الله بك رجلاً واحداً خير لك من حمر النعم" وقلت اذا خرجت من الخدمة اجى هنا اكون مبشر للإسلام ولا يهمنى. وفعلاً فى سنة 46 خرجت للمعاش وبعد ذلك اخذتنى الكلية لأكون مدرس للشريعة بها فذهبت. فى سنة 48 كنت مدرساً للشريعة فى الكلية وتذكرت تلك الكلمات التى عاهدت الله بها فى جبال النوبة وصارت يعنى تجول فى خاطرى كثيراً واخيراً قدمت للكلية الاستقالة. الناس لامونى كتير. قالوا يا فلان انت بتاخد معاش وتاخد ماهية مدرس فى الكلية. قلت ليهم عندى أمُـر. فلما تمت إستقالتى كتبت للحاكم العام فى ذلك الوقت وقلت ليهو انتو ناس طيبين وعندكم حرية الديان مكفولة وانا رجل من بلاد السودان والجبال والجنوب كلو تبعى وفى كثير من القسيسيين يبشرون بدينهم، فأنا اريد ان تسمحوا لى ابشر بديانة محمد (صلى الله عليه وسلم)
الحاكم العام رسل خطابى هذا للسكرتير الإدارى واظن اسمو روبتسون. كان مفتش عندنا هنا. فروبتسون رأى هذا الكلام ما معقول فى نظرهم. منطقة مقفولة للمسيحيين يجى رجل من السودان يقول يمشى يبشر فيها بالاسلام؟! هذا بعيد. وتلك المنطقة اذا كان عربى مسلم ضاع ليهو فيها جمل او تور لا يمكن يدخلها الا بعد ياخد اذن من المفتش. المدير روبتسون ابى يرد على. انتظرت ايام ومشيت ليه وقلت ليه: لماذا لا ترد على؟ قال: هذا عمل كبير جداً وانت لا تقدر القيام بشئ ونحن لا نصدق ولا نرد عليك. كلام ناشف من هذا القبيل فكلمته بمثل ما قال واكثر وقلت: البلد بلدى وانا ابن السودان جبتم قساسيس من بلاد متعددة ينشروا دين المسيح وانا واحد سودانى تمنعونى انشر دين محمد (عليه الصلاة والسلام)؟ سأشتكيكم الى الحكام فى البلاد الإسلامية. قال: افعل ما شئت. وهنا ارادوا ياخدوا فرصة ويسلطوا على واحد. بعضاً من السادة والناس الكبار ليعيدونى للخدمة ويجعلونى مفتى السودان. أبـيـت. جاء القدال، راجل اسمو القدال وزير فى حضرموت واتفقوا معاه على ان يجعلونى قاضى قضاة حضرموت وانو ده طلب ملك حضرموت ووسطوا لى السيد عبدالرحمن. وقالوا لى انك رجل طيب وخدمت القضاء فاذهب الى حضرموت لتكون قاضى القضاة هناك. وفلان (..........) يريد ان يقابلك فى هذا الشأن وبعطيك ميتين جنيه فرفضت ذلك وابيت. بعد ذلك كتبت للجمعية التشريعية، جواب طويل للرئيس الشنقيطى – عليه رحمة الله – والجمعية التشريعية كان فيها نحو 64 عضو كلو واحد كتبتلو جواب واخبرتهم انو الحكومة منعتنى من التبشير الإسلامى وانتم اهل الحل والعقد إما ان تصدقوا لى بالتبشير الاسلامى فى الجبال او اخرجوا جميع القسيسيين من بلاد السودان واتركوا النوبة والشلك والدينكا على عوائدهم. ولو ما عملتو كدى انتو كذابين وسأنزل الى مصر واصدر شكوى شرعية وامضّى عليها عشرين عالم درجة اولى يكفركم لانكم منعتم الإسلام ينتشر فى تلك البلاد. بعض رجال الجمعية ذهبوا قابلوا الإنجليزى الذي هو روبتسون وقالوا هذا الرجل محق، إما تتركوه يذهب او تخرجوا المبشرين وهذا الرجل روبتسون عمل وسائل كثيرة سرية وعلنية ولم تنجح ومع هذا الضغط من الجمعية ومنى .. تلغرافات وجوابات .. قالوا صدقنا ليك. واخدتها منهم التصريح كتابة .. من روبتسون وقريته فى جامع ام درمان وظنوا انى فاشل لا محالة . توكلت على الله وقلت إن الله ينصر الدين.[/align] |
[align=right]كونت لجنة فى امدرمان كانت هى الاساس وكان الناس متخاذلين وخايفين وبعدين عملنا بعض الضروريات وبعد ذلك ذهبت للأبيض والدلنج وهى بلدة اقمت فيها قبل ذلك خمسة شهور قاضياً وسنتين مدرساً واهلها لى بهم صلة كبيرة. نعم قلت ليك انا كنت قاضى الدلنج وبعرف بعض المكوك وعشت مدة فى هذه البلاد. ولما وصلت الدلنج جمعت الجلابة الهناك فى الجامع وخطبت فيهم. كانوا شرذمة قليلة لانو البلد ما بلد تجارة. الناس عريانين كلهم وكان اذا واحد من النوبة لبس ليهك سروال والمفتش الانجليزى شافو يشرطو ويدقو. واذا اشتراه من الدلنج يقول ليهو اشتريتو من منو؟ يقول ليهو من الجلابى فلان. الجلابى ده يطردوه ويعاقبوه. انا مشيت هناك وعملت لجنة للجماعة الموجودين وكانوا خايفين اللجنو فيها سيد مكى إبراهيم الكبيدة ومحمد احمد الصديق والتجانى الصديق وغيرهم ناس اساءهم راحت. انا لما علمت اللجنة دى وكان معاى قروش وهدوم جبتها من ام درمان. وكان هناك ضابط اسمه كنده كربوس وكان عسكرى راح مدنى والقلابات ولمن نزل المعاش جه سكن فى بلدو هنا وعملوا مك، هذا الرجل كان يتحدث عربى كويس وساعدنى وقام معاى وكان عضو فى لجنتى مع الجماعة ديك. وبعدين دخلت نوبة آخرين، الناس الدخلوا ورا. صديق تيامى من النيمانج وسالم سبيل وآخرين كتيرين نسيت اسماهم. الناس الاسلموا ما بتذكر اسماهم. الواحد يجينا يسلم علينا، يجيب لينا الشاى ما بنعرفوا. من الضمن كان فى واحد اسموا صديق. كان اسموا ابخلو ده من النيمانج. اسلم قبل ما انا امشى. لما اسلم اهلوا طردوه وقالوا ليه تانى ما تقعد معانا، اقعد مع العرب. بعد كده قعد مع العرب ولما جيت إتصل بى وكان إسموا ابخلوا انا سميتو صديق زى ابوبكر الصديق. ده اول من اسلم من النوبة. فالرجل ده طيب وخيّر وديّن وعلمناهو فرائض الصلاة وكدى .. حتى بقى متعبد عبادة كتيرة وعملتو مؤذن فى جامعى وعملت ليهو ماهية 18 جنيه ياخدها من الحكومة. الناس ابو لى الاّ بعد كلام كتير وتلغرافات صادقوا 18 جنيه ماهية ياخدها. والراجل ده عندو صنعة غريبة. مما عرف الإسلام ما ممكن راجل اجنبى يدخل حوشو ابداً ولا يمكن بناتو يشوفوهن الناس ولا بتو تلبس جلابية قصيرة. مشدد بالحيل وعظم قدرو عند النيمانج حتى اعتبروه راجل عظيم بناتهم يجيبوهن عندو. المسافر للخرتوم يجيب بنتو عند صديق دا لانو ما ممكن يخش فى بيتو راجل. وصديق هذا حج وكتير من النوبة حجوا. حجوا منهم تمانية ناس. العرب الحوازمة والمسيرية هناك ابداً ابداً ولا قرش ما ادونى ياه. والنوبة صاروا ادين من العرب وعرفوهم بالدين. والله اولاد النوبة بكونوا يدرسوا العرب الدين الإسلامى لانو ديل قروا وديك ما قروا.[/align]
|
[align=right]عملنا اللجنة وذهبت اول مرة فى جبل يقال له كرمتى. ده جبل كبير وفى ناس بيتكلمو عربى وفيه تلاتة اربعة عساكر بيساعدونى ما بتذكر اسماهم. فى واحد كان اسمو نصارى انا سميتو نصرالله وكان عضو فى البرلمان. ومشينا نتـل وكانت فى الوقت داك صغيرة جداً، كندة لما سكن فيها عمّرها، عمرت بسببه. البلد الكبيرة كانت كرمتى. معاى كندة مشينا كرمتى وانا كنت عامل بوارق مكتوب عليها "التبشير الإسلامى" وبها مكتوب "لا إله الا الله محمد رسول الله" ومعاى جماعة من الجلابة مشوا بعدين قاموا نزلوا لينا اهل الجبل نساء ورجال عرايـا الا قليل منهم لابس وتكلمت انا فيهم بالعربى: تدخلوا فى الدين الإسلامى وحببتهم فيهو. فالمك كنده كربوس طلع فى راس الجبل وترجم ليهم كلامى. قلت ليهم الانجليز يخلوكم عريانين نحن عايزين نكسيكم ونعلمكم ونعلم اولادكم فدخل الكلام ده عندهم وبعدين إبتدينا فى الإسلام وصرنا نوقفهم صفوف لا اله الا الله ... اول انا صحت فيهم مرة واحدة لا اله الا الله ...... قالوا محمدُُ ُ رسول الله .....قالوا بعدين كلوا واحد نديه الشهادة ونكتب إسمو، واحد يكتب الرجال واحد مسك النسوان، واحد مسك الوليدات واحد مسك البنات. وكان كنده الله يرحمو نافعنا فى هذا الموضوع. اسلمو عندنا كتيرين وحبيت اقعد مع هؤلاء الناس. حالاً طلبت منهم يـبنو لى راكوبة. بنو لى راكوبة فى سفح الجبل وعندى السكر وعندى الشاى وعندى التمر والرغيف واى حاجة. قسمت ليهم الهدوم وفى نفس اليوم تمت الراكوبة وقعدت. فكانت معاى إمرأة زوجتى مشت معاى من هنا عشان تخدم الموضوع ده. سكنا هناك وحالاً فتحنا خلوة للقرآن جبنا اولاد الحلة نقريهم "بسم الله الرحمن الرحيم الحمد لله رب العالمين" والكبار برضو نعلمم والنسوان نعلمم الحمد لله رب العالمين حلقات حلقات. رسلت جبت جماعة فقراء من الدلنج وفيهم واحدين فلاتة واحدين برقو. ما لينا زمن الا محلتنا عمرت خلاص واستقرينا هناك وصرنا نأذن ونصلى جماعة واول ما اسلمو جاتنا صلاة الضهر فأمرت واحد من رفاقى التجانى الصديق طلع فى راس الجبل واذن "اشهد الا اله الا الله واشهد ان محمداً رسول الله" وكان اول مرة فى تاريخهم يسمعون هذه الكلمة. لذلك كانت كرمتى هى المحطة الاولى للإسلام وفيها اقول
كرمتى اهلا وسهلا كنت للإسلام اهلا اسلم الشيخ الكبير فيك والطفل الرضيع فلهم اجر كبير فى جنان عاليات[/align] |
[align=right]قريب لينا فى مدرسة مسيحية إسمها سـلارا عندها مبانى وعندها قسيسيين وعندها اطباء ونحن ما نا قادرين نهاجمهم ناخد الساهلة ساهلة. انا بذهب للجبال وبتونس مع الناس فى الجبل واحبونى واسلمو عندى كتير. اقوم اقول ليهم انتو عندكم اولاد فى مدرسة النصارى؟ يقولو ايوه. الجبل ده فيه خمسة اولاد، نادو لى ابواتم كلو واحد اديهو قميص اديهو عمة اديهو ريالين اديهو حاجة. اقول ليهو ولدكم ده فى المدرسة دى بطالة يبقى نصرانى جيبهو لى بعلمو اقريهو وبعدين اوديهو مصر هناك ويبقو علماء يبقو مفتشين واحسن. والمكوك والكجور اسلمو عندى كتيرين بقو اصحابى فالمكوك يرددوا هذا الكلام فى قفاى. والله انا استغرب فى شجاعة ذلك الرجل المك (كندة كربوس) اولاً هو ضابط وكان عسكرى فى شندى.... ثم هو غيور على اهلو وشايفم عريانين وتعبانين وشاف انا جيت لهذا الامر وساعدنى عشان ما يدخل الناس فى الدين. الإنجليز وبخوه .... ترك المحكمة وسافر معاى انا للتبشير. باكر الإنجليزى ناداه قالو: إزاى انت تسيب المحكمة وتسافر؟ قال ليهو ده امُـر دينى اهم من المحكمة وانا ما عايز اشتغل معاك، انا عايز اشتغل مع الراجل ده اشيل ليهو رايتو اصلى وراه لما اموت. وكانت شجاعة منو وفعلاً جانى باكر قال لى انا عايز اقدم استقالة ما اشتغل مك انا بشتغل معاك فى الدين بس. قلت ليهو وجودك انت مك يفيدنى آى قلت ليهو وجودك مك يفيد عمليتى خليك.
لمل رايت الحالة زى ده فى كرمتى وكترو الاولاد وهى جبل يبعد من الدلنج وطريق المعيشة فيهو قاسية احببت ان اذهب للدلنج واعمل مدرستى هناك واباشر التدريس فيها وادع فى كرمتى خلوة صغيرة امر عليها بعض الاحيان. وفعلاً فى الدلنج كان عندى ارض هناك اخدتها اعطانى اياها المفتش بجواب من المدير وبنيت فيها خلوات وبيوت وصرت اعلم الاولاد وعملت ليهم داخلية فيها اكثر من تمانين ولد واتيت بفقرا فلاتة وبرقو يساعدونى فى التدريس وكذلك بعض الفقراء العرب كانوا يساعدونى. وعمرت الناحية وكانت بعيدة فى الخلا. كانت خلا وقطعت الشجر وبنيت هناك. المفتش علم انو فى ناس جو من الجبال وسكنو معاى وصرنا نصلى جميعاً وجا بالليل يتجسس ورانا وكنا نصلى فى التراويح وبعدين بعد التراويح نشرب الشاى وناكل العشا. بعد داك شاف الحالة دى ياكر طلبنى كشيت عندو قال لى انا مريت عليكم ولقيتكم بتصلو ومعاك نوبة كتيرين وبيوت اتبنت معاها ولذلك المحل ده الاهالى بيسكنوه نغيرك منو نديك محل تانى. ابيت قلت ليهو انت اديتنى ليهو اول وعجبنى اختيارك انا ما بقوم منو. وشكانى وقتلو ما بقوم ابداً العايزو فوقى سويه وكان بشتكينى يشتكينى. شكيت للحاكم العام ولمدير كردفان وكان عندى لجنة فى كردفان شكيت للجنة. الجنة قابلت المدير واخيراً جاء تلغراف من المدير قالولو خليه.[/align] |
[align=right]اللجنة الفى الابيض فيها محمد بخيت والفاتح النور والشيخ السمانى والشيخ الطيب ومحمد طه التيجانى ومحمد النور. سلارا احببت امشى فيها وكتيت للمك بتاعها انا جاييك باكر. فالمدرسة مسيحية والقسيس موجود فالظاهر تنو المك خاف. رسل لى ولدو وقال لى ما تجى باكر لمن ندورك بنديك خبر. هنا انا عملت حلجة احببت المسألة دى ادخلها ى السياسة عشان تدينى قوة والايام ديك المصريين والانجليز دايرننا. الانجليز قالوا ما تسمعوا كلام ناس مصر وناس مصر قالوا نحن اخوانكم والدين واحد واللغة واحدة ونشرب موية واحدة من النيل ابقوا معانا. وصلاح سالم يمشى ويجى وبعدين انا كلمت صلاح وقالى اكتب لى تقرير كتبتو وكا عمل فايدة.
وقرأت فى الجرايد إنو النبك فاروق جابو ليهو ولد وراح يعمل احسانات وكرامات عشان هذا الولد كتبت جواب دا قبال صلاح سالم. كتبت للملك فاروق قلت ليهو انا راجل طيب وانا عندى مسلمين وداير ليهم هدوم وكسوة ماشين عريانين وانا عايز تجيب ليهم كسوة بالنسبة لميلاد ولدك والكسوة البتناسبم الدمورية دحين اكتب لى جماعتك هنا فى الخرتوم يساعدونا. كتبت لكبير الامناء. كبير الامناء ودى جوابى للملك بعدين كتبوا للخرتوم قالوا ادوا الراجل الشى اللعاوزو. الخرتوم كتبت للابيض وبعدين اتفقوا على انهم يدونى الدمزرية ويدونى خيت من النوع الازرق وخيت قرمصيص والحراير وقلت ليهم دى بتحبب النوبة فيكم. وفعلاً جابو لى لورى ملان ومعاهو ضابط. الضابط خاف ادانى خبر قال لى انا جاى قابلتو ونزلتو باكر المفتش مشى خوفو انا لحقتو قلت ليهو يا زول يا مفتش اسألنى انا انا الكتبت. قال لى لكن انت تكتب بدون وساطتنا قلت ليهو وساطة المفتش؟ قال لى كنت تقول للمدير قتلو ياخى كم مدير ووزير .. ان مسلم كتبت لمسلم. وبعدين المفتش قال تدينى نص القماش دا اوزعو على الكواليب قت ليهو ولا ضراع ما بديك اياهو. بعدين خلانى اخدت الضايك المصرى دا واخدنا اللورى ومشينا للجبال قسمنا الهدوم دى وقلنالم الملك فاروق جاب ليهو ولد ويسلم عليكم وقال ليكم انتو اهلى وانتو متلى اديتكم الهدوم دى وتانى بجيب ليكم ودحين انتو يعنى الملك ده بسوى ليكم المدارس كان الانجليز رفضوا اولادكم انا بسوق اولادكم بوديهم مصر اسويهم يعنى ناس موظفين كبار. انبسطو النوبة والانجليز زعلو وكتبو عنى تقارير طوبلة عريضة. ومشيت تنديه. تنديه دى امرها عجيب, تنديه مشيت فيها ومن اول مرة اسلم مئات من الناس. وقالوا نحنا خايفين من المفتش قت ليهم ما بقدر يسويلكم حاجة ولما علمو الانجليز رايحين والمفتش ما ليهو قيمة رسلو لى قالوا عايزنك تجى عشان نسلم كلمت لجنتى بتاعت الجلابة وقمنا شلنا الرغيف والهدوم مشينا تنديه. يوم واحد اسلمو عندو 936 نفر وكان هناك عساكر مرفودين ساعدونى واحد منهم اسمه محمد فلان نسيت ابوه. كان ده الساعد الاكبر لينا والعسكرى محمد وقف لى الناس صفوف ومشوا معاى لجنتى بتاعت الدلنج. وزعنا الناس . اسلم .. اسلم .. لا اله الا الله محمد رسول الله. اسلمو ده كان سنة 53 ونحن عمليتنا دى بديناها سنه 50. وبذلك مئات الاولاد اتعلمو القراءة والكتابة وفى القرآن قريناهم جزء عمّ وواحدين استمرو معانا ومنهم ناس حفظو القرآن من اولو لى آخرو وبالتجويد قريتهم انا براى.[/align] |
[align=right]ســـــلارا الجـميـلة (7)
سلارا .. قلت ليكم المك رسل لى قال لى ما تجى وهو خايف من القسيس الموجود هناك والمدرسة قديمة ليها 25 سنة وانا عملت ترتيب خاص عشان الاولاد يسلمو. كلمت الكوك والكجرة وابواتهم وفعلاً كلموهم وذات يوم شدو حيلهم فى هذا الكلام قالوا يوم الاحد تعلنو اسلامكم قدام القسيس. وفعلاً يوم الاحد الاولاد وقفوا طابور ضربو جرس الصلاة بتاع الكنيسة القسيس قال ليهم تعالو للصلاة بالكنيسة قالوا نحن ما بنصلى صلاة النصارى نحن مسلمين. بعدين صرخو .. لا اله الا الله محمد رسول الله .. القسيس وقع شالوه بى عربية جابوه للحكيم. وده جوه فى الدلنج وجانى انا الخبر، انا من امس عندى خبر بهذه العملية. جيت من الدلنج قعدت فى كرمتى افتش على المسلمين واقرى عبالهم عشان انف1 الحكاية دى. وفعلاً هذه كانت مسألة كبيرة جداً القسيس مشى كلم المفتش و المفتش كلم المدير والمدير كلم الخرتوم. قالوا الراجل صاحب التبشير ده خسرنا مدرسة ليها 25 سنةز وبعدين الخرتوم تور وزير المعارف ........... ومعه مدير المعارف ما بعرف أسمه إنجليزى. وصلتنى اخبار بذلكز وجا المدير والوزير وكنت قاعد فى ضل شدرة ومعاى بعض النوبة اعلم فيهم. المدير والوزير مروا على قريب منى. الوزير اخوى وصاحبى وود عمى ......... الله يرحمه ، والله ما قال لى سلام عليك. فات مر متل الحيطة دى. ذهبوا وضربو الجرس للاولاد وقفوا. عبدالرحمن قال ليهم انتوا اسلمتو؟ والاولاد نحن موصينهم كويس. قالولو انت اول مسلم ولا كافر؟ قال انا مسلم. قالولو تسألنا السؤال ده عشان شنو؟ قال عشان افهم المسلمين. قالولو اسمك شنو؟ قال اسمى عبدالرحمن. قالولو انت سودانى زينا؟ سكت. سودانى؟ قال نعم. قال طيب قال ليهم اسلمتو ليه؟ قالولو يا عبدالرحمن الاسلام تعيس؟ قال ما تعيس. قالولو تسألنا ليه اذ ما تعيس. قال عشان اعرفكم. دحين اولاد المسلمين يطلعوا من جاى والما مسلمين يطلعوا من جاى. ابتدا المدير يتكلم قالولو ما تتكلم انت نصرانى ود عم القسيس، اسكت. المدرسة 149 ولد طلعو 142 ولد فى صف المسلمين، فضل سبعة فى صف القسيس اخوانهم رطنو ليهم رطانة النيمانج انضمو عليهم والباقى صفر. وقع القسيس ايوه. قالوا لعبدالرحمن اكتب نحن مسلمين خلاص محم ما عايزين قسيس يدرسنا ولا نصرانى يا عبدالرحمن تجيب لينا تسويها مدرسة اسلامية ةتجيب لينا القرانين. القرانين عبدالرحمن ماعرفها هم ديل بتكلمو على وزن اناجيل يقصدون القرآن فجمعوها قرانين على وزن اناجيل وبعدين قالولو اما تجيب لينا القرانين ديل كلنا وتجيب مدرسين مسلمين ولا محم نمشى للفكى هناك فى كرمتى للشيخ يودينا مصر. عبدالرحمن فال ليهم بجيب ليكم وجه فايت فوقى رجع بخفى حنين. وخلاص ياكر المدرسين جوه شايلين جزء عمّ ولقونى فى الشجرة ورونى الاجزاء وقالو نحن جينا ندرس. قلنالم يوم الجمعة بنجيكم. يوم الجمعة سوقنا تور ضبحناه وشلنا شوال رغيف وشيلنا السكر وشلنا بوارقنا ومشينا حيناهم .. لا اله الا الله محمد رسول الله .. وانشدنا لهم قصيدة اسمها سلار الجميلة تقدم يا اخى واسلم واهلك كلهم اعلم وقل إنى فتى مسلم دخلت الدين لم احجم جبال النوبة انشرحت الى الاسلام وانفرحت ترى سكانها خرجت لدين الله وابتهلت لا اله الا الله محمد رسول الله جبالك كلها تشهد بتوحيد العلى الاوحد ولولا فضله تنهد ولم يبق بهن احد لا اله الا الله محمد رسول الله ....... فكان مشهد عظيم هناك وهنينا الاولاد....[/align] |
[align=right]بعد سلارا رحلنا كواليب. فى كواليب ما حصل حاجة مهمة اولاً ناس عريانين نكسيهم ونديهم وفى كل قرية من قراهم عندنا ناس لكن ما كان عندى امكانات افعل معاهم كما فعلت فى الجبال. قروش مافى، هدوم مافى ما لقيت واحد يساعدنى. بعد الكواليب ركزت فى الدلنج مكثت سنتين اشتغل واعلم وبعدين خطر ببالى ان اروح للدينكا. قبل الدينكا مشيت كادوقلى لكن العمل ما كان شديد زى جهة الدلنج لقلة ذات اليد وقلة من يعاونى. اذهب للجبال آتيهم لا اله الا الله .. القى فلاتى اقول ليه بديك ماهية قرى الناس ديل. القى برقاوى اقول ليه قريهم اقعد معاهم. فما كان يعنى عملى هناك ناضج ومحقق زى الجهة ديك لانى قمت وقوتى ضعيفة وما معاى رجال يعاونونى فما قدرت اعمل زى ما عملت فى جبال النوبة. الهيئة الموجودة فى الابيض ما تستطيع ادت بعض الشئ وما حبيت ازنق عليهم واكتر الطلب. هم ما يستطيعوا يسافروا معاى ناس اهل دكاكين وتجار ما يسافروا. الناس الاسلمو اولاً مذاكراتنا معاهم ما كانت كتيرة حتى ندخل يشاشة الايمان فى قلوبهم، ثم هم اعاجم الكلام الكتير ذاتو ما بيفهموه لكن وقع فى نفسهم انو الراجل ده جه من بلدو وجانا هنا والدين بتاعو كويس دين الجلابة. شايفين الجلابة نضيفين والدين كويس ندخلو. وبعدين بشوفو نحن بنكسى ونعمل فوايد وندى الرغيف وندى التمر وندى القروش. دى على دى خلتهم يميلو لينا.
الغريبة الكجرة وافقونى جداً واسلم كتير منهم ونحن احسنا ليهم وصاروا دعاة يدعوا لينا. واحد فيهم اسمو اسماعيل ده اسمو سلطان الكجرة فى جبل كاركو اول مرة ابى يسلم. اسلم كتير من الناس ومنعهم لكن ابوا يمتنعو وبعد اسبوع رسل لى ولد كان راكب حصان قال ليه اجرى للدلنج وتكلم الشيخ يجينى هسع انا عايز اسلم. الولد جانى قال لى ما تمشى اجرى قلت ليه طيب. قمت انا واخدت معاى جماعة من الجلابة واخدنا ليه تمر وعيش وقميص وهدوم. اخدنا للكجور الكبير ده، سلطان الكجرة دا يعنى اشبه انو يكون زى شيخ الاسلام. وبعدين كسينا وهللنا وكبرنا واولادنا معانا ومرق وحيانا وضبح لينا تور وبعدين دعيتو للاسلام، بيتكلم عربى شوية ومعاهو عساكر يكلمونى بكلامو. عندو بيت.. يعنى ده بيت التكجير .. الخلوة بتاعت الشياطين بتاعتو وامورو كلها هناك. دخلنى فيهو وقال لى: عايز اسلم اقول ايه؟ تقول لا اله الا الله محمد رسول الله. مسكت ايدو نطق هذه الكلمة ومن العجيب ارتجف شديد حتى كاد يقع ويرمينى معاه من العنقريب. وبعد كده مرقنا بره وقلت ليهو قدام الناس انشر الاسلام. قال طيب. قال ليهو يا ولد جيب البندق. قدام الناس انا شهدتو لقنتو وتشهد وضربو البنادق والنساء زغرتن. وبعد كده اخدتو معاى للدلنج كسيتو وعملت ليهو حاجات كويسة. وبعدين جاهو خبر قال ليه المرة ولدت جابت ولد. قال سموه محمد ود الامين ود القرشى. وفعلاً سموه محمد ود الامين ود القرشى. وهذا الولد اصبح محترم فى القبيلة ونحن دايماً نوديلو الهدايا وامو تجينا وهو يجينا. ودخلناه اسع المدرسة.[/align] |
[align=right]السيد عبدالرحمن المهدى – عليه الرحمه – لى به صلة من قديم الزمان واولها تلمذة الامام المهدى الرجل العظيم على جدى الشيخ القرشى. وبعدين لما الشيخ القرشى توفى جاء المهدى بى حيرانو وتلاميذو ضربو الطوب هنا فى الشجرة قريبة لينا فوق البنية وبنى البنية ومشى فصلتنا متينة بيهو. لكن السيد عبدالرحمن الانجليز وسطوهو اترك تذا العمل ليعطونى المال. فأبيت ولما اسلم عندى نحو ثلاثة او اربعة الالف سألنى السيد قال كيف حالك؟ قلت الحمد لله بخير. وبعد كده ارسل لى محمد حماد ناظر قبيلة الحوازمة وسأله عن امرى فقال ليه الرجل نجح نجاح منقطع النظير والنوبة كلهم وافقوه اسلم عنده عدد. سألنى السيد قالى: المسألة دى كبيرة ما انت بتقدر ودحين التبشير ده اجعلو باسمنا ونديك المال الكتير. قلتلو لا اجعله ليك. قال انت ما تستطيع وانا عندى المال. قلتلو ما عايز مالك. واخيراً قال لى يعنى نختلف معاك فى هذا الموضوع. قتلو لا يهمنى وذهبت. ما اشعر علا يوم من الايام شباب الانصار شاياين بوارقم فى الدلنج ومارين بالشارع بتاعى بتاع الجامع وينشدو قصائدهم ويلوحو ببوارقم وفاتونى. ولما كنت مدرس فى الجزيرة اباعندى طلبة قرو على العلم وفى جماعة كبار من الجزيرة باب بعرفهم. الطلبة قالوا داك شيخنا نحن نمشى نسلم عليه. جوا سلمو علىز مالكم؟ قالوا ارسلنا سيدى عشان نكون مبشرين بالاسلام. نسيت .. انو السيد طلب المكوك. يمكن عشرة من المكوك وداهم الجزيرة ابا شافو الاحوال وداهم الخرتوم وقالهم محمد الامين هذا اخونا لمن ما بقدر عليكم وانا عندى الاموال وبعمل ليكم الشغل كتير. جوا كلمونى قالوا سيدى قالّنا. قلت ليهم طيب ننتظر. فجو الجماعة ديل قالو مبشرين.
والسيد على جماعتو فى الدلنج سمعو قالو ناس المهدية جونى هناك وبعض الناس بقولو الشيد عبدالرحمن هو البيساعدنى ومتورنى على الاسلام دا. وقالوا الرجل دا زول مهدية ومن ناس المهدية وادى اسيد عبدالرحمن جبال فنحن ناخد شيلتنا فيهو كمان. السياسة ضاربة. راحو كلمو السيد على. كلمنى الشيد على براهو بنفسو. قالو الجبال دى ما يمرقو منها هم كمان. مشو جو اتلملمو ناس الابيض وجابو ناسم ما نشعر الا جو ببوارقم "شئ لله يا حسن" "بالصلاة بالصلاة بالصلاة" شنو؟ قال: ديل مبشرين. اعوذ بالله. السيدين ديل كانو وين زمان؟[/align] |
[align=right]أسع المقصود الحكاية خربت. فانا كتبت جواب للسيد على قت ليهو يعنى ما يليق انت شريف وانا عملت كذا وكذا وتجيب ناس ينافسونى. ودواب للسيد عبدالرحمن ذكرت العلاقة القديمة وكذا وكذا وقتلو لنت جبت ناس للتبشير والسيد على سمع بيك جاب ناس. خـربتوها واى عمل ما بنفع كدى. انت كنت وين لما انا قمت بالعمل ده؟ ..... فارجوك خلو لى بلدى وامشى لى بلد تانية. انت ليك قوة انا بركب حمار بركب تور. السيد عبدالرحمن جاب لى جواب قال لى انا حولت جوابك للحزب ليرد عليه. قتلو انا كتبتو ليك خصوصى. الحزب جاب لى جواب كبير شتيمة كاتبو ...... وماضى عليه ....... انا كتبتلو جواب وقتلو نحن مرقنا من حزبهم. انا واهلى الحلاوين وبدخلهم حزب الازهرى. مرقنا من حزب المهدية.
انا جيت هنا وذهبت للسيد على وقتلو انت والسيد عبدالرحمن اكبر منى سناً لماذا ما قمتم بامر التبشير فلما انا مشيت تمشو تعاكسونى حتى فى جبل واحد يبقى تلاتة اديان. هذا خراب فى الدين. السيد على قال لى انا كا كنت اعرف انهم ماشين الجهات الدخلتها انت. اصحابك وتلاميذك جونى هنا وقالو نودى وفود للجبال ما ياخدها السيد عبدالرحمن. قال لى لكن ما عارف انهم جايين فى بلدك انت. اكتفيت بكلام السيد على هذا غابتو عذر على العموم. وقال لى الآن بقومو ناس فى قطار المساء ويذهبو للابيض ويخرجو جميع ناسنا الراحو بلدك وبعد كده ان عايز تسـّاعد بيهك ينزلو ضيفان عندك ياكلو عندك ويصلو عندك وترسلم انت المحلات. شكرتو على هذا. وجيت هنا كلمت اهلى ولميت كتير من اهلنا الحلاوين والشباب والشياب عملتهم وفد عشان السيد عبدالرحمن عاكسنا واحتقرنا نحن نمشى للسيد على نعمل بيهو صلة.. وانا اخرج من حزبو وادخل فى حزب الازهرى. والحلاوين كانت منطقة مقفولة زى الجزيرة ابا فانا فتحت هذه المنطقة عشان زعلى من السيد عبدالرحمن. كلمت اهلى وقمنا وفد للسيد على واديناهم تلغراف رحنا قابلنا السيد ولملمنا ناس كتير من اهلنا هناك وقلنا وفد الحلاوين جا عشان ما يشكرك على حسن معاملتك لى وقلت ليه عايز الناس ديل ياخدو الطريقة الختمية وانا بمشيها فى الحلاوين. انـا ما عايز طريقة لكن ديل ياخدو الختمية. ادانا الطريقة وادانا شاويش يعلم اولادنا الطريقة الختمية وادانا حزامات خـدر. وقلبنا الحكاية خليناها ايه؟ ختمية[/align] |
[align=right]الشيخ محمد البرناورى .. بعرفو حق المعرفة، آى قادرى لكن مسألتو هو ضعيفة. اصلو راجل عجوز مية سنة وزيادة اظنو. وبعدين فى البلاد ديك مشى داعية للاسلام، داعى للطريقة القادرية. بيدى الناس الطريقة يدقو النوبة ويذكرو فيها ويجيبولو الهدايا. انا قابلتو هناك احترمنى ونزلنى فى بيتو سوالى حلقة ذكر وذكرنا فيها وبعدين ادانى الجبة بتاعت الدراويش والجبة المرقعة دى اهداها لى وبعدين قام بحركة للدعوة لا بأس بها. مات .. لا نوعو هو ما فى وهو كان انسان طاهر.
فى جهة كادوقلى وهيبان فى اولاد الفكى على الميراوى. اولاد الفكى على الميراوى ساعدونى قدموا هدايا وقروش عشان اديها للناس وبقدمو لى شوالات كانت مجاعة اقسمها للناس ملوة ملوة. الكلام ده الانجليز قاعدين. ناس كادوقلى لما وقفت خطبت فى الجامع طلبت منهم المساعدة ساعدونى. جنيه جنيهين خمسين قرش كونا مبلغ ما هو كتير. الهيئة الكونتها هنا فى ام درمان فى جمع التبرعات زول واحد ما مشى اتبرة ولا مشى بورسودان. طلبت امشو معاى. ابـو. مشيت انا براى. انا البشجعنى امشى اتبرة براى وامشى بورسودان براى انا بورسودان كنت قاضيهم ومدرسهم. الناس اهل لهم صلة شديدة بى. واتبرة قعدت فيها اربعة سنين قاضى ومدرس. فقط واحد اسمو على محمد صالح كان قاضى راح معاى. اما مصلحة الشئون الدينية طريقها الماشية بيه غير طريقنا. بعد جبال النوبة مشيت ملكال ... ونزلت عند احد قضاة المحاكم الشرعية هناك، تاج عمر اخو عوض عمر. وجدت لجنة الجلابة عملو ليهم حكاية كتبو للمفتش انو فى ناس مسلمين دينكا بجونا هنا عريانين تسمح لينا البجونا عريانين نحنا نكسيهم والجعان نوكلو. خدمة إنسانية. المدير قال طيب. لكن دى مى ياها القاصدها انا. هذه جمعية المؤلفة قلوبهم ما ليها قيمة.خليتها. خطبت فى الجمعة وقلت ليهم انا جيتكم للإسلام تكونو مسلمين. الناس كوركو ووافقونى وقالو لى طيب. وانا عندى قروش قدر كدى وعندى هدوم قدر كدى نعمل كيف؟ نكون لجنة نعمل ليك بيت. كونا لجنة فلان فلان فلان. اهه اسوى شنو انا؟ قالو لى يعنى الناس بجونا هنا نجيبهم ليك فى بيتك تكسيهم وتديهم. قلت ليهم لا دى ما خدمة للإسلام. ما كفاية. انا امشى بره اشوف المحلات الهامة اسكن فيها. قالو البلد باعوضة ومافى اكل وما فى غذاء. قلت ليهم لا يهمنى وفعلاً رحت حتة اسمها اكوكا وفيها حفير وفيها موية قلت ليهم دى البتنفع معاى. وفعلاً فى جلابى هناك ادانى بيت اسكن فيهو وصرت اشيل الرغيف واشيل التمر والسكر وهناى وفى حلال قريبة قريبة تجى ترد فيها. سويت لى راكوبة اسقى الناس الشاى واديهم القروش والبس العريانين كلهم بأساميهم عندى دفاتر اكتب فيها. الجلابة هنا بقو يساعدونى. الخبر شاع انو فلان الفكى فى الحفير بكسى الناس وبديهم، البلد كلو بجونى. القـنم الشهادة واكسيهم وحلال قريبة قريبة بلقى لى هناى .. حمار بمشى بيها. ابيت فيها اضبح ليهم تور اضبح كبش. بالحكاية دى يعنى صاروا احباب واصدقاء لى. فأسلمو عندى عدد كبير وعملت لى هناك مسجد للصلاة نأذن ونصلى وانا اقرى العيال. جبت الاولاد سويت ليهم داخلية والواطة كانت غلا. نديهم عصيدة الصباح عصيدة العشية والشاى يشربو فى النهار مرتين. وفتحت الخلوة واستمرينا. القروش الجايبها انا شايلها من قروش الدلنج. حساب الدلنج داك انا شايل منو وبكتب لى لجنتى انا شلت كذا كذا ضمن حساب جارى. نحن مقرنا فى ام درمان. واخيراً اللجنة اختلفت معاى قالو لى انت بتجيب الهدوم توديها هناك حقك تجيبها هنا فى ام درمان عاوز ليك عشرين تلاتين قميص اكتب لينا نصدق ليك. جبت الزنك من بورسودان ابنى بيهو هنا قالو لا تجيبو ام درمان ونحن نصدق ليك. قلت ليهم: انا الجـبتكم، رفـدتكم، انتهى البيان. المالية ما كتيرة وهناك عملت اكتتاب فى ملكال ذاتها ثم عملو لجنة واللجنة دى ماسكة القروش. عاوز هدوم تاخد لى. عاوز سكر تجيب لى. حاج عمر ابكر اهه دا رئيس اللجنة وعثمان ود اخوه. عثمان مبروك والبشير ابراهيم عندو عربيات كتيرة وحاجات وحاج وداعة آى. اهه ديل كلهم ناس ملكال وواحد تاجر قريب ناس عثمان صالح نسيت اسمو. انا قعدت فى ملكال مدة يمكن سنتين. عبد الله خليل مشى. حسن بشير كان بساعدنى دائماً بدينى عيش وهدوم. وطلعت فريد كان بساعدنى. بعد ما قضيت السنتين فى الجنوب رجعت للنوبة وقعدت اشتغل معاهم زى عادتى دى. بنيت مسجد هناك فى الدلنج بره من الدلنج كدى شوية فى الرديف. سموها الرديف لكن اسع دى نحن نقول حلة الاسلام. قعدت هناك. بعدين تاقت نفسى ان امشى مكة وما لاقى وجهة تدينى إتساع فى العمل. قروش ما لاقيهم والناس بمشى بيهم مرة مرتين تانى ما بمشى ليهم. باخد منهم القروش تانى ما بمشى. ما كتبت لى ناس بره. ناس سعـود ظنهم فى السودان ذاتو ما حسن. آى ومع ذلك ما لى معرفة بيهم انا حبيت امشى قلت كفاية العمل السويتو دا فاحسن انا امشى مكة. السفير السعودى اسمو محمد العبيكان بعرفو من زمان مشيت مرة مرتين قلت ليه سهّل لى الحكاية دى. قال لى انت ماشى تحج وتجى؟ قلت ليه لا. عايز اقعد فى مكة ..اقعد ادرّس. قال لى تجيب لى شهادة القضا وشهادة التدريس. رحت جبت شهادة القضا وشهادة التدريس قال لى انا الملك قريبى وما بخالف كلامى انا بكتب اسويك قاضى. قلت ليه ما بنفع ما عاوز. طيب اسويك مدرس فى الرياض فى الجامعة. قلت ليه ما بدور. قلت ليه انا داير اكون مدرس فى مكة بس. اصوم واشرب موية زمزم واصلى الصلاة كدى كدى. قال لى فى مكة ما بتلقى ليك ماهية كبيرة. قلت ليه رضيان رضيت. فعلاً قال لى انت عندك كتب مؤلفة؟ قلت ليه آى. جبت ليه الكتب رسلها للملك. الملك كتب لشيخ الحرم. عالم من السودان اشير عليكم تعملوه مدرس فى الحرم. شيخ الحرم ده راجل متشدد بلحيل. قام كتب للسفير قال ليه جيب لى كتبو اشوفها يمكن راجل مخرف ولاّ مش عارف. السفير قال لى الراجل ده غلطان الملك قال يقبلوك ما بنودى ليه الكتب. قلت ليه ما من صالحى. جبت ليه المؤلفات بتاعتى. كتاب فى علم الاصول "سفينة الأصول" وكتاب فى علم المصطلح الحديث "تحفة الآثار فى مختلف حديث النبى المختار" وهناك كم كتاب ارسلتهم قروهم. عملو لجنة براهم كونو لجنة قالو لى تعال. قالو الراجل ده يجى. قمت مشيت مكة قعدت فيها تلاتة سنين مدرس فى الحرم. ادونى مرتب مية وخمسين جنيه ادرس واقوم اطوف واشرب زمزم واصلى وراضى بالحكاية دى وما كان عندى فكرة اجى. قلت انا كفاية التبشير كفاية استمر فى دى. لكن علمنا انو اسرائيل جايبة القسيسين المرقوهم ناس عبود. ديل قسيسين جايباهم بواسطة الحبش تدخلم فى السودان، جنوب السودان. انا خفت القسيسين ديل يجو لى ناسى ويكفروهم فأنا اقعد فى مكة انا بشرب زمزم واصلى ويدونى ماهية. لا هذا حرام انا اترك مكة واجى احارب. استفتيت العلماء هناك قالو لى اذن وجب عليك تمشى لانك انت تعبت فى الناس ديل. استقلت من هناك وجيت. اهه جا مدير الشئون الدينية السودانية محمد ........ هناك كلمتو قلت ليهو الامر كذا وكذا هل بتعمل لى مساعدة ان اكون هناك؟ قال لى بعملها ليك. سألتو تدينى كم عشان استقيل؟ قال لى بديك سبعين جنيه. قتليهو بارك الله فيك. استقلت جيت. لما جيت قال لى الميزانية ما وافقت وما بديك الا خمسين قلت ليه بمشى واحافظ على اولئك الناس من القسيسين ما يكفروهم. ها دى الجابتنى.[/align] |
[align=right]المقال المرفق كتبه د. الطيب زين العايدين فى الصحافة فى 19/03/2007 وفيه اشارة لما قام الشيخ محمد الأمين القرشى به فى جبال النوبة.
جنوب كردفان نموذجاً للصراع وللتعايش أتيحت لنا في الأيام الفائتة أن نزور كلا من كادقلي، عاصمة جنوب كردفان، ومدينة الدلنج التي هي أكثر مدن الولاية عمراناً وتقدماً بسبب التعليم والحركة الاقتصادية والقرب من مراكز العمران في الشمال والوسط. كانت الزيارة باسم مجلس التعايش الديني بقصد تأسيس جمعية دينية لدعم السلام في الولاية، تجمع بين المسلمين والمسيحيين، وتوعية المواطنين باتفاقية السلام الشامل وما تضمنتها من حقوق وحريات تتعلق بالأمور الدينية في مجالات العبادة وممارسة الشعائر وقوانين الأسرة والتعليم وتطبيق العقوبات الدينية وتنصيب القيادات الدينية والوضعية الخاصة للعاصمة القومية. وسبق لمجلس التعايش أن نفَّذ مثل هذا البرنامج في كل من الفاشر ونيالا وبورتسودان وكسلا والدمازين، وسينتقل من جنوب كردفان إلى كل من أعالي النيل وبحر الغزال والاستوائية، وكلها مناطق شهدت قدراً عالياً من الصراع في السنوات الماضية. ويهدف مجلس التعايش إلى تفعيل دور رجال الدين للقيام بواجبهم الديني والوطني في بناء ودعم السلام والاستقرار في مناطقهم وفي أوساط أتباعهم. أدهشني في جنوب كردفان حدة الصراع السياسي بين المؤتمر الوطني والحركة الشعبية والصراع المستتر والمعلن بين القبائل النوبية والعربية حول المياه والمرعى والزراعة، وفي نفس الوقت وجدت مستوىً من التعايش الديني المتسامح بين المسلمين والمسيحيين ومعتنقي العقائد الأفريقية غير مسبوق في مناطق السودان الأخرى. وشجعني هذا التعايش الفريد أن أطلب من القيادات الدينية التي التقيت بهم أن يأخذوا المبادرة في بناء السلام ودعم الاستقرار وتحقيق الوحدة الوطنية، ووجدت استجابة مبدئية إلا أنهم في حاجة إلى قدر من التدريب وبناء القدرات وتمويل مشروعات النشاط التي يمكن أن يقوموا بها. وليت حكومة الولاية والمنظمات الطوعية تساعدهم في اكمال ذلك النقص، ومما يؤسف له أن الشركات والبنوك ورجال الأعمال في السودان لم يلتفتوا بعد لدعم الهيئات المدنية العاملة في مجالات السلام والتنمية وحقوق الإنسان وتركوا ذلك النشاط المهم لقمة سائغة للحكومات الأجنبية والمنظمات العالمية تجيرها لأهداف نبيلة وغير نبيلة. ومن أمثلة الصراع السياسي الحاد أن ولاية جنوب كردفان كانت آخر ولاية شمالية تجيز دستورها إذ لم يعتمد إلا قبل أسابيع قليلة، وذلك بسبب الخلاف حول منصب رئيس المجلس التشريعي هل يكون متداولاً بين الحزبين الشريكين كما هو الحال في منصب الوالي أم سيكون وقفاً لحزب المؤتمر الوطني الذي يحوز على (55%) من عضوية المجلس، وهي الولاية الوحيدة التي تكونت حكومتها قبل إجازة الدستور. وتطلَّب الأمر أن ترحَّل قيادات الحزبين بصورة جماعية إلى الخرطوم لمعالجة المشكلة تحت مظلة رئاسة الجمهورية. وكأنما تلك العقبة لم تكن كافية حتى تعطَّلت جلسات المجلس التشريعي للمرة الثانية بسبب إقالة الوالي خميس جلاب (حركة شعبية) لإثنين من أعضاء الحركة، وطعن النائبان في الاقالة بأنها غير دستورية ووجدا (تحميساً للطار) من جانب نواب المؤتمر الوطني، وستتوقف جلسات المجلس إلى أن تبت المحكمة الدستورية في طعن العضوين. وفي ظل المشاكسة والصراع الدائر حول حدود أبيي وإدارتها وتكوين القوات المشتركة وانسحاب قوات الحركة من الولاية، أدى كل ذلك إلى تعطيل الخدمات تماماً في المنطقة بل وعجزت الحكومة عن دفع مرتبات المعلمين، مما أثار طلاب المدارس الثانوية الذين كانوا على وشك الجلوس لامتحان الشهادة الثانوية، ونتج عن ذلك حريق وتدمير لبعض الممتلكات الحكومية واشتبكت الشرطة مع الطلاب بالقنابل المسيلة للدموع والذخيرة الحيَّة مما أدى إلى إصابة وقتل عدد من المتظاهرين. ولم تستطع حكومة الولاية أن تكشف عن الأوجه التي صرفت فيها مبالغ طائلة استلمتها من الحكومة المركزية زادت على العشرين مليون دولار، حتى قال بعض الناس إن الحكومة مختلفة على كل شئ إلا في توزيع الأموال! وكان الصراع السياسى معدياً لطلاب جامعة الدلنج الذين تظاهروا في العام الماضي بسبب نتائج انتخابات اتحاد الطلبة، وأدى ذلك إلى حرق المكاتب والمعامل التي كلَّفت حوالى المليار جنيه. وأثناء زيارتنا أصرَّ فريق من الطلاب على عقد انتخابات الاتحاد الآن بالرغم من أن عدداً كبيراً من الطلاب سافر مباشرة إلى مناطقهم عقب أداء الامتحانات، وكانوا أكثر تعقلاً هذه المرة فلم يعتدوا على ممتلكات الجامعة. ومن الناحية الأخرى فإن القصص التي سمعناها عن التعايش الديني مدهشة إلى حدٍّ كبير. قال لنا وزير الزراعة بالولاية، خميس كجو، إن من الأمور العادية بين أهالي المنطقة أن يكون في الأسرة الواحدة المسلم والمسيحي ومعتنق الديانة التقليدية دون أدنى حساسية بينهم، وأن يحتفظ غير المسلم بمصلاية وإبريق للوضوء في داره حتى يقدمها لضيفه الزائر من المسلمين، وأنه شخصياً يعيش في بيته مع أسقف مسيحي، وكثيراً ما ينبهه الأسقف إلى دعاء السفر حين يركبان العربة إلى خارج كادقلي. وقال لنا الأستاذ جمعة بحر (حركة شعبية وأنصار سنة في نفس الوقت!) في اجتماعنا مع الجمعيات الطوعية إن الكنيسة الكاثوليكية بنت لهم مسجداً في إحدى القرى التي كانت تسيطر عليها الحركة، وقال لنا إنهم أفتوا النساء المسلمات معهم بأنه يجوز لهن الزواج من المسيحيين إذا رغبون في ذلك، ولكن بشرط أن لا يجبر الأطفال على دين الزوج. ليس الترابي وحده ينفرد بالفتوى يا شيخ الهدية! وبالمناسبة هناك وحدة مقاتلة مع جيش الحركة الشعبية يطلق عليها (الجيش الشعبى قطاع أنصار السنة)، وهي من أشرس الوحدات في القتال. هل يفسر ذلك الود الذي أظهره الراحل جون قرنق تجاه الشيخ الهدية (متعه الله بالعافية) إلى درجة أن يطلب مقابلته في نيفاشا؟ وقالت لنا عروس كادقلي الحسناء في ذلك الاجتماع إنها عاشت في كاودا التي تعتبر رئاسة الحركة الشعبية في جبال النوبة لثلاث سنوات دون أن تشعر بأدنى تفرقة بين المسلمين والمسيحيين، وأن المسلمين يصلون في مسجد كاودا يوم الجمعة والمسيحيين يصلون فيه يوم الأحد! ولا عجب في هذا التعايش المتسامح في منطقة الجبال فهؤلاء القوم هم من تلامذة وحيران الشيخ محمد الأمين القرشي الذي ترك وظيفة القضاء حتى يتفرَّغ للدعوة وسط أصقاع الجبال، والشيخ محمد عبد الله البرناوي الذي كان يجذب أهالي الجبال إلى الإسلام بالإشتراك معهم في الذكر وترديد لا إله إلا الله محمد رسول الله، ويقول للذي يشترك معهم من وثنيي الجبل إنكم دخلتم الإسلام بقولكم هذا. وعندما اعترض أحد المتفيقهين على أسلوبه هذا في الدعوة، ردَّ عليه الشيخ البرناوي بقول حكيم: نحن بندرش تعالوا انتو دققوا! ودون أن أخوض في فتاوى فقهية حول هذه القضايا حتى لا يقطع رقبتي بها بعض المتنطعين، أقول إن السودان يحتاج إلى قدر كبير من التسامح بين الثقافات والأديان والأعراق حتى نستطيع أن نعيش معاً في وحدة وسلام وانسجام. والحشاش اليملأ شبكتو.[/align] |
تشكر وجزاك الله خيرا
|
[align=right]الأخ/ هيثم عبدالرازق
تحياتي شكرا مجددا على المرور، ولنا أجر المناولة زي ما بقولوا .. وسأضيف ما كتبه الأستاذ/ خالد بالاضافة إلى صورة الشيخ محمد الأمين القرشي والتي أرسلوها لنا في العام الماضي مع الأخ هيثم على خضر عندما كان في الديار.[/align] |
[size=5]صور للشيخ محمد الأمين القرشي :[/size]
http://www.l22l.com/l22l-up-3/9b665fb197.jpghttp://www.l22l.com/l22l-up-3/9b665fb197.jpg http://www.l22l.com/l22l-up-3/9b665fb197.jpghttp://www.l22l.com/l22l-up-3/9b665fb197.jpg |
[متشكررين ومقدرين .وان قلناها متاخرين
فقد اوفيت وكفيت مليون شكرe] |
شكرا لبنتنا سارة واخواننا في المنتدي لمواصلة كتابتهم عن هذا العالم العلامة وبحر العلم. فقط اود ان الفت انتباهكم الي ان هذه المادة المنشورة عبارة عن تفريغ لعدة أشرطة سجلها الدكتور احمد عبد الرحيم نصر مع الشيخ القرشي في ابي فروع. وكانت تحوي ذكر لاسماء سياسيين كبار ولم يتم كتابة اسماء هؤلاء السياسيين في الكتاب المطبوع لحساسية الموقف السياسي السوداني في ذلك الوقت (عشان كده تجدون نقاط في محل الاسم) ولكن لمن اراد ان يعرف هذه الاسماء فيمكنه الرجوع لمكتبة معهد الدراسات الاسيوية والافريقية بجامعة الخرطوم ويمكن الاطلاع عليها. مع العلم بان الشيخ القرشي ذكرههم بصريح العبارة لانه وكما قال د. معز كان شجاعا لا يتهيب المواقف ( ومن أراد الاستزادة من هذه المواقف فليراجع كتاب الدكتور عثمان عوض الكريم الذي صدر حديثا عن الشيخ محمد الامين القرشي)
|
التحيه لك اخي الفاتح عبد الله احمد ومعذره مروري اتى متاخرا وكنت مستمتع بالمقال الذي يتحدث عن جدنا الشيخ محمد الامين القرشي طيب الله ثراه
ونقلك كان جميلا ولك الاجر انشاء الله ونحن نفتقد لمثل هذه الكتابات عن الاباء والاجداد تحديدا الذين سطروا اسماءهم في التاريخ الوطني والاسلامي والدعوي التعليمي وتقبل فائق احترامي ..... ودمتم في امان الله |
الشيخ محمدالأمين القرشي وجهوده في الدعوة إلى الله في السودان التاريخ: 2011-09-13 معد الرسالة : أحمد ساتي عبد الرحمن شيخ محمد المشرف عليها : د. عبد الله عبد الحي أبوبكر الدرجة العلمية : دكتوراه ... الجامعة: جامعة القرآن الكريم والعلوم الإسلامية الكلية : كلية اصول الدين الدائرة / الشعبة: القسم : دائرة الدعوة والإعلام شعبة الدعوة والثقافة الإسلامية رقم الرسالة: 677 العام : 1423هـ ـ 2002م الدولة/ الجنسية: السودان ملخص الدراسة:ـ يتكون هذا البحث من مقدمة وتمهيد وثلاثة فصول وخاتمة المقدمة تتكون من:ـ التوطئة وأهمية وأسباب اختيار الموضوع الصعوبات التى واجهت الباحث والدراسات السابقة. التمهيد: وتناول فيه أثر الهجرات العربية انتشار الإسلام في السودان والاستعمار وأثره في السياسة التنصيرية ثم مواجهة التنصير ودور العلماء في هذه الواجهة الفصل الأول: ينقسم الى مبحثين: المبحث الأول يتناول حياة الشيخ محمد الأمين مولدة ونسبه ونشأته وطلبة العلم وشيوخه وتلاميذه وأداءه ومصنفاته ووفاته. وتناول المبحث الثاني: لعدة ويتضمن الجانب الإجتماعي والعلمي والسياسي الفصل الثاني يحتوى على ثلاث مباحث الأول جهوده التعليمية عامة. في المبحث الثاني جهودة التعليمية في جنوب كردفان والجنوب خاصة المبحث الثالث: جهوده في إنشاء الخلاوى والفصل الرابع: يتناول جهوده في الدعوة الخاتمة وتتضمن أهم النتائج والتوصيات الشيخ محمد الأمين كابد وجاهد ضد المستعمر ومن ثماره مجاهدته على الرغم من قلة الإمكانات تلك الأعداد الهائلة من المواطنين الذين أسلموا علي يديه وتلك الخلاوي والمساجد والمعاهد التى قام بإنشائها وتعميرها لتعليم القرآن الكريم وعلومه ومن أهمها معهد الدلنج الذي تطور حتى أصبح الأن جامعة الدلنج الشيخ محمد الأمين لا يعير الجانب السياسي أهمية كثيرة إلا بالقدر المعين الذي يتعلق بالدعوة أو أى مصلحة من مصالحها فقد كانت أسر كبار الأنصار بل أن أباه وعمه كان كل منهما أمير من أمراء المهدية التوصيات :ـ ارجو من الدعاة أن لا يتأثروا بالجانب السياسي في مجال دعوتهم حتى لا يكون هذا الجانب سبباً يوقف أو يقوض دعوتهم بل العكس أوصيهم أن يستفيدوا لنصرة دعوتهم بكل ما هو متاح وأن لا يجعلوا هناك شقة تقف عقبة بينهم وبين من يريد إعانتهم بقدر المستطاع http://www7.0zz0.com/2012/03/05/07/331916147.jpg |
• Alsahafa التاريخ: 4-مارس-2011 العدد:6331 (الأرشيف
محمد الأمين القرشي شيخ أضاء الجبال أمين باما جمونه: ان التاريخ الانساني هو من اكثر فروع العالم ارتباطا بالانسان واقترابا منه لأنه قد شارك الانسان عبر رحلته التي لم تكتب نهايتها حتى الآن. وقد تأثر التاريخ بما يقدمه الانسان من تضحيات في كل النواحي الدينية والاجتماعية ويظل الانسان بعقله مخلوقا راقيا يختلف عن غيره من المخلوقات لأنه قادر علي هندسة حياته وتوظيف قدرته العقلية التوظيف الصحيح في أي مجتمع انساني يستطيع ان يعيش بطريقة سلمية رشيدة، وقد تلعب العواطف والمشاعر والاحاسيس الانسانية الدور الاساسي والاعمق في هندسة العلاقات الانسانية بين الناس، وكل انسان نمت قدرته على حسن التعاون مع هذه الثلاثة عوامل يستطيع ان يغزو قلوب الآخرين والتأثير فيهم. ... الشيخ محمد الامين القرشي الذي كان نبراسا اضاء قمة سفوح جبال النوبة لأنه كان له الدور الاكبر في نشر الدعوة الاسلامية في المنطقة الغربية بجبال النوبة سنة 1953م، بعد ان كانت هذه المناطق مقفولة من قبل الانجليز، عكس الجبال الشرقية في مملكة تقلي الاسلامية التي سبقت الجبال الغربية في الاسلام منذ 1560 بواسطة الشيخ الجليل محمد الجعلي الرباطابي. جاء الشيخ محمد الامين القرشي الى جبال النوبة (الدلنج) سنة 1950م، وكان قاضيا وفي حضوره قد اجتمع مع ناظر الدلنج آنذاك كندة كربوس ومحمد الامين ناظر الاجانج. ومحمد حماد اسوسة ناظر الحوازمة لنشر الدعوة الاسلامية في المناطق الغربية سلارا، الكاركو، الفندا، الكجورية، المندل، الشفر، الوالي ، الغلفان، جلد، وكان هؤلاء النظار هم الترجمانة الى اهلهم النوبة فقد كان الشيخ محمد الامين القرشي فقيها وعالما يفتي في كل المذاهب وكان يعيش مع ابناء النوبة كواحد منهم، وكان يستغل كل الاوقات لتعليم امور دينهم ودرج على اعتلاء المنابر عقب كل صلاة جمعة - فقد ولد الشيخ الامين القرشي بمدينة رفاع ابو سن سنة 1887م، وهو حفيد الشيخ القرشي ود الزين استاذ/ الامام محمد أحمد المهدي وقد تخرج من كلية غردون قسم الشريعة والقانون تخرج قاضيا سنة 1910م، وقام بتأسيس الهيئة التبشرية الاسلامية بجبال النوبة وأسس خلاوي القرآن الكريم، في عدة مناطق وتدريس علومه، وكان التعليم هدفا سعى اليه الشيخ القرشي كما ذكر لنا عمنا الراحل في منطقة الملكية رجل البر والاحسان اسماعيل خريف والاستاذ/ الراحل عكاشة رمضان سكين استاذ الاجيال وعبدالرحمن تيبر وشيخ الكاركو الجليل ازرق جابوري قادم. حتى بنات الجبال في ذلك العهد ألّفن له اغنية تراثية من شعر الجبال .. محمد الامين قلباً بريدو ٭٭ شباب بلدنا الغالية ركب اللوري انا ماش وين جبال النوبة ٭٭ انا ماش وين جبال النوبة سيظل تاريخ جبال النوبة يذكر الشيخ الامين القرشي لأنه نبراس اضاء سفوح الجبال لأنه بجهده قام بنشر واحد من اعظم الديانات السماوية وانه كان من سلالة الاتقياء الطاهرين الصادقين في الدعوة فقد توفى الشيخ الجليل في 13/6/1976م، بعد عمر 89 عاما.اللهم احفظ ابناءه واجعل البركة في ذريته اللهم احسن عزاء اهله وعشيرته . . والحمد لله رب العالمين.e http://www7.0zz0.com/thumbs/2012/03/05/07/467772087.jpg |
• تحفة الآثار للشيخ محمد الأمين بن القرشي رحمه الله
الحمد لله العظيم الشأن *** الواحد المهيمن الديان الخالق العباد للعبادة *** الباعث الهداة للافادة ... صلى عليهم ربنا دواما *** وزاد مع صلاته سلاما وخص طه المصطفى ذا اللطف *** في كل لحظة بألف ألف وهكذا الى قيام الساعه *** والحشر والنشور والشفاعه مع صحبه والال والاولاد *** في سائر الاقطار والبلاد وبعد فالعبد الفقير القرشي *** محمد الامين نجل القرشي اراد سبحا فوق هذا البحر *** محتسبا يرجوجزيل الاجر ولم اكن بالماهر العوام *** وانني من اجهل الانام اغوص في القاع الى الدراري *** ما بين تطويل مع اختصار وجيئتكم يا اخوتي بالطاقه *** وواجب الانسان ما اطاقه سميتها بتحفة الاثار *** هذبتها من كتب الاخبار ضمنتها المهم في الدرايه *** وجل ما يلزم في الروايه فالله يجزي كل خيرمن دعا *** ومن يقل في عثرتي لعا لعا (وحقوق البحث والتنقيب لاخونا منتصر ابراهيم الهادي) http://www7.0zz0.com/2012/03/05/07/467772087.jpg |
| الساعة الآن 04:05 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir