|
المعرفة عن قرب..الكرسي الساخن..والخال عبد المنعم سعيد
تحيات طيبات الخال عبد المنعم..
انتظرناك طويلا"...وتلبيه لرغبه الكثرين..نسعد باستضافتك . .لنستفيد .من خبرتك الكثير..ولنتعرف عليك وفي شخصك نقراءفتره طفوله وشباب جيلكم.. وجميل أن يبوح المرأ بما في نفسه....وحجزنا مقاعدنا لنستمع..ونستمتع وتفضل لكرسيك.. http://www.arb-up.com/files/arb-up-2008-6/BHL50747.jpg |
ولنبداء..بنبذه تعرفيه عنكم..
والدعوه الاخوه..لاثراء البوست باسئلتهم.. http://www.arb-up.com/files/arb-up-2008-6/iH550950.jpg |
يسعدني ويُشرفني أن أعرف أهلي و ألكثيرعنهم وخصوصاً عن ألعم ألمنوال عبدألمنعم سعيد ومعرفة ألرجال كنز فياأيُها ألمفضال أحببتُ أن أعلم من أنت وما سيرتك فهل لي ذلك؟؟؟ ولك أعزب حُب |
بسم الله الرحمن الرحيم
جميل جداً أن ننفض الغبار عن الكُرسي بعد طول غياب ، ونسعد ونتشرف بالأخ/ عبد المنعم سعيد ليكون ضيفاً كريماً فمرحباً به وبأسئلة الجميع والتحية لكِ أختنا سارة ،، وبانتظار المُحتفى به |
[b]بسم الله و الصلاة و السلام علي سيدنا محمد و علي اله و صحبه و سلم
طبعا و الله لي فترة مشغول و ده سبب عدم دخولي المنتدي رغما عن انو الينة في الاسم عبد المنعم سعيد محمد احمد الحسين الاعمار بيد الله متزوج و اب لثلاثة ابناء بنتين و و لد مقيم في الامارات مراحل الدراسة الابتداي ابوفروع الوسطي الحصاحيصا المسائية اسبوع واحد في سنة اولي ثم اتمم اولي بمدرسة بيت المال الوسطي ثم الحصاحيصا ب لفترة واحدة سنة ثانية ثم اتممت الوسطي بمدرسة المحيريبة الوسطي الثانوي الحصاحيصا الثانوية الجامعة جامعة الخرطوم كلية الاقتصاد التخرج في 1980 التحقت بوزارة المالية بعد شهرين من التخرج بوزارة المالية و الحمد لله اتاحت لي الوزارة بفضل الله التدريب حيث اني تاهلت في مجالات القروض الخاجية و التمويل و التنمية و التخطيط و دراسان الجدوي في كل من ايطاليا و امريكا و انجلترا و اليابان و اتاح لي التدريب فرص الترقي السريع حيث اصبحت مساعد وكيل بوزارة المالية في الثلاثين من عمري ساواصل ان شاء الله غدا عندي شغل [ /b] |
شكرا الاخت ساره لاستضافتك عمنا عبد المنعم فانتي دائما سباقه لكي الشكر
|
التحية لك اختي سارة على المبادرات الرائعة
والتحية للاخ العزيز عبدالمنعم وهي فرصة للتعارف عن قرب ,,,, |
ألله يكرمك ويحيِك يا عمو ومشكورعلى ألإستجابة ألسريعة ومابنستغنى عنكَ ونمهلك رويداًونُعذب في إنتظارك وتحياتي لأهل بيتك.ولك حُبٌ ممدود. |
اختي سارة لك الف تحية نحن فعلا محتاجين الي قمم مثل العم عبد المنعم لننهل من بحره هذا لو أذن لنا طبعا لك وله جزيل الشكر والعرفان . |
الاعلام ترفع على السوارى والاصل فى جذع الشجر يعنى الثبات والهامات تذكر للرجال لانها الالمع
عبد المنعم علم زاهى الالوان يدخل البهجة لناظره ينقل من ذلك البهاء لوحة تبقى فى الذاكرة على الدوام دون ملل ابوسعيد ثابت ومأصل بجميل خصالة وافعاله التى لا حصر لها لمن يعرف ذلك العلم وهو هامة سامقة لان الكثير يعرفونه فكما ذكر ودضياب كرسى سارة الوثير جاهز ونحن حوارى نستمع لماثر الطيب العمو الطيب |
سلامات للجميع وارحب بالعم عبدالمنعم وربنا اديك الصحه والعافيه ولك كل احترام وتقدير وتحيه خاصه الى الاخت ساره على الاستضافه الطيبه0 |
بسم الله و الصلاة و السلام علي رسول الله
اشكر شكر جزيل الاخوان والابناء الكرام اناثا و ذكورا و طبعا ناس الامين عشرة عمر لا استطيع ان اقول شي و الحمد لله الاخ صديق و الله انا عايز اقعد معاهو عديل و بينا كلام بنتنا سارة و طبعا امها بنت عمتي شفتها و هي صفيرة مع اختها التانية ما متذكر اسمها و كانن بنات خاطفات لونين و من صغار بس كانن بنات فيهم حزم و عزم ما شاء الله هناء بنت الماحي ده ابوها زول قريب مني شديد و انا و الله طولتا منو خالص و من الناس المشتاق ليهم خالص و قدر ما اجي الموقع بقرا ليها و طبعا عنصر الجذب في الموضوع انو هي بنت الماحي الشيخ و يخيل لي انا ما شفتها خالص معتز حسن طبفا في الحسبة ود اختنا و و بتذكروكويس محمود طبعا ود اخونا قرشي ود عمتنا برضو و اولاد قرشي رحمة الله علية انا بعرفهم واحد واحد بس عايز اتعرف اكتر علي سمير و ابو العزايم و يتخيل لي ده بكون شي كويس جدا دي يكون مناسبة نتعرف علي اولادنا و بناتنا الشباب بالمناسبة سعيد ولدي مرات لقيتو بعرف ناس في الحلة انا ما بعرفهم زاتو ان شاء الله اواصل بطاقة التعريف |
عمي ألغالي إليك مني أعطروأسمى تحاياوأنت تعاودماكُلفت به وهذاوفاءسامي وألوفاءلاهل ألوفاءفانت أهلٌ لهُ فاشكرك على هذاألفيض ألفواح بمذوجة ألصراحة وألتواضع ألمعهودألذي يعكس جوهرك. فأنالي عالي ألشرف وأنت تحب أن تعلم من أناوهذامكسبٌ قيم لي ومن أحدألمطالب ألتي دفعتني إلي هذاألصرح. سامرأبايزيدشيخ ألحاج من أبوجويلي غرب ألحصاحيصا مُقيم في ألخارج ألأعماربيدألله/[ألعُمرعلى عمرإسم سامرفي ألسودان. صلتي بابي فروع.بخالي ألشيخ بشيرألشيخ أحمد وزوجته أم ألفقراءألسيدة[فريال].وكل أهل أبوفروع أهلي وحبايبي[أموت عليهم] ولك ألشكرياعمولعكس ألحوار.ومابنستغنى عنك ونحب أن نسمع منك ونسمع وألبوست ملكك فلك حق ألتصرف . وأيضاًحُبٌ أنيق إليك. |
تعرف عرفتا خالك الرجل الطيب شيخ بشير
و خلاص انا عمك يا ياسر اها نمشي كتبتا قبيل و الله لقيت الكتابة اتمحت كثير هي المحطات التي ينبغي ان يقف فيها الفرد في حياته احدي اهم المحطات في حياتي والدي رحمة الله عليه اتذكر و انا في ايام الجامعة كانت لي علاقة قوية بمعظم ابناء جنوب السودان اذا كان الاتحاد الاشتراكي اقرب الي قلوبهم . بعد المصالحة الوطنية و ودخول الترابي و الصادق الي قائمة الحكومة المايوية امتدت جسور الود بين اقصا اليسار ممثلا في الحزب الشيوعي و الجبهة الديمقراطية و علشان كده كانو عندي اصحاب جنوبين كتار في جلسة ود مع الاخوة من الجنوب حاول احد الاخوة من قبيلة الدينكا ادخال كلمة من لغتة المحلية ككلمة انجليزية و بالرغم عن اني لم اكن من المتمكنين من الانجليزي الا اني انتبهت و = و حكيتها لمن جابت الدم= يعين سالتو و جبتا الديكشنري . زولكم هرش و قام قال لي انتو اولاد الماندكرو عندكم اشايء خطيرة بتأثر في تربيتكم و بتخليكم شطار بالرغم من اننو نحنا = يقصد الجنوبين= الكنيسة و منظمات كتيرة بتساعدنا= قلتا ليهو الاشياء شنو قال لي حفظكم للقران بخليكم تتعودو انكم تستوعبو بسرعة و تكونو ازكياء تاني قال لي الصيام بعلمكم الصبر و الصلاة بتعلمكم الانتظام في المواعيد انا شخصيا في شي انضاف لي للاشياء دي يعين بالرغم من يساريتي كنتا بصلي و بصوم و حافظ يس و الواقعة و تبارك مع جزء عم المهم انا ارتباطي بوالدي خلاني واصل لي قناعة انو المهنة الفيها ابوك رباك بيها ما عيب علشان كده كنتا بمشي للحواشات حتي و انا في جامعة الخرطوم في السبعينيات طبعا لمن كنا في بداية السبيعينيات كانو بسوقونا الحواشات اولاد و بنات و اي واحد فينا اكان بنت اكان ولد بكون راكب في ضهر ابوهو بمعنب انو ابوك بكون رابك في السرج و الابن او الابنة راكب وراي ابوهو = بقولو عليهو مردوف = كانت احلي وقت نتمتع فيها بي قفشات و ونسة الكبار المهم انا تلاتة ارباع صبري و احتمالي للعمل اكتسبتو من شغلي مع الوالد رحمة الله عليه في الحواشات من الحاجات البتذكرها بي فرح انو انا انتهيت من الجامعة شهر اغسطس 1980 شهر سبتمبر كنتا قاعد في الحلة و صبت مطرةاتذكر اني كنتا ماشي افطر مع قريبي و ابن اخي و نديدي ميرغني سعيد اها ابوي رحمة الله عليه لاقاني سايق غنمنا الغابة لانو الراعي ما كان بيرعي يوم المطرة اها وقفتا ابوي وقلتا ليهو ماشي وين قال لي ماشي اودي الغنم الغابة الراعي ما راعي علشان ما واحد يقفول لي الغابة بتكون كلها ملانة موية في حتة الهي درب الصداقة كانت الناس بترعي فيها و هي حته عالية المهم انا قلتا ليهو انا بمش انزل ابوي قال لي كيف انتا اسع خريج تمشي ترعي قمتا قلتا ليهو يعين شنو انتا شي ما خجلتا منو انتا ابوي البخجلني انا منو شنو المهم سقتا الغنم و مشيت الراعي و ما زلت اتذكر الشكلة مع الاخ العزيز محجوب حاج عثمان لمن لاقاني سايق عربتو و طلع راسو بي بره و قال لي وين يا الراعي الجامعي في وقت كانت جامعة الخرطوم جامعة الخرطوم المحطة دي انا وقفتا فيها داير اقول للشباب مافي شي بخجل في الشغل و الله انا كنتا بليس بيتنا بالزبالة قبل الخريف يعين بخمر الزبالة و بليس و حاة الله ما اقول بدون مؤاخذة اصلو طيب الاقيكم بكرة سلام |
والله خجلتنا بتواضعك وصراحتك دى بالجد انا افتخر بيك جدا ومواصله معاك علشان اتعرف عليك اكتر وتسلم لينا انشاءلله |
وألله ياعموإنت لزيز[عسل]فنرجوك بقدرألإمكان أن لاتغيب عناوألأمرلله لكي نتلززبكَ كثيراً. ولك ألشُكرمع أغلى ألحُب. |
http://www.arb-up.com/files/arb-up-2008-6/s0r29386.gif
استوقفني مقال لاستاذ يتحدث عن الامهات في فتره الاربعينات.وكيف كن (المرق)للبيت..مقال ثر سابحث عنه.لاحقا كل التوثيق في المنتدي كان عن اعلام في ابوفروع رجالا"..اين حواء ابوفروع من التوثيق..؟ الم تكن في حياه حبوباتنا (امهات الزمن الجميل) شئ يستحق التوثيق..؟ نتمني من الخال ان زكر لنا مواقف من حياتهن وفي سيره احدهن توثيق لهن جميعها" فحياتهن كانت متشابهه كثيرا" |
سلام
طبعا شين جدا انا راجل عجوز زيي و عامل فيها متعلم اغلط غلطات املائية زي دي لاحظت اني ذكي كاتبها زكي اشياء مكتوبة ما عارف كيف المهم و الله مرات وقت مافي أقيف في محطة الشغل اتذكر نحنا من الوسطي و لمن نقول نحنا اقصد اولاد جيلي و اخواني في البيت و هم معاكم هنا في المنتدي كنا بشتغل في الاجازات شغل الاجازات كان مهم جدا علشان الواحد يعتمد علي نفسو في المقام الاول و اقول بي كل صراحة يحس بالتعب و طعم القروش يعين ما يعديها كلها داير داير الواحد كان لازم يحس بانو والدو كان بيعاني كيف علشان يوفر الاكل و الشراب و الملبس و العلاقة الكويسة بالمجتمع لانو المجتمع فيهو مجاملات هي ركن التواصل . كنت في الاجازات بشتغل طلبة في البناء و اشتغلت عدة بيوت و بالمناسبة يا معتز بيت ناس حبوبتك دي انا كنتا فيهو طلبة اساسي بينا البيت و كان اوضة و برندة و الصالون كان المعلم الطيب ابراهيم عطا المنان رحمة الله عليه و كان مساعد المعلم عبد الرحمن علي خضر و كان الطلب عبد المنعم سعيد و عبد المطلب عبد العزيز و مامون احمد الشامي و طبعا عدينا فيهو الاجازة كلها من لان بيناهو من الالف للياء اشتغلت طلبه مع قريبي الجعلي من العمارة اربجي و امو حفيدة الحسين و برضو عديت معاهو اجازة كاملة في بيت عمنا عبد الله حميدة رحمة الله عليه برضو اتذكر اني اشتغلت مع المرحوم الشريف محمد احمد رحمة الله علية بين ناس الوارد كلو و اتذكر كويس انو المسالة دي كانت بعد امتحانات الشهادة . زمان كان الناس المقبولين لجماعة الخرطوم بيذيعوهم عن طريق الراديو اها انا ذاعوني للجامعة و انا بشتغل في بيت ناس الوارد رحمة الله عليها برضو كنتا عندي هواية توسير = اها انمتو بتقول تجليد = العناقريب و اتذكر اني مرة في مدرسة المحيبرية الوسطي عناقريب المدرسة حبالها اتنسلت اها جابو ليك مقاول قاول العناقريب للوسارة اظن العنقريب بي 10 قروش = و الله ما بتذكر بي كم = اها انا بقيت كل يوم بطلع لي ريال مصاريف= لمن جيت الحلة حدثتا ابوي و ما زعل مني في نقطة مهمة جدا اهلنا كانو لازم يعرفو اذا جبنا اي قروش زيادة يعرفو جات من وين يعين لو زول اداك قروش ابوك لازم يعرف طبعا بعد الواحد بقا يشتغل دي ادتو امكانية انو يكون لحدما ما يرفع التقرير المالي الداير انا اصل ليهو معاكم في الحكي دي و هو و الله واقع و حقيقة الشغل يا شباب ما عيب بعدين العزة و الكبرياء لله فقط و لا يحقن للعبد مطلقا يعين النعمة ما دايمة في كمية من الشاب لافي ساكت و جامعات بتخرج بدون او بي مؤهل طيب الناس تقعد ترجي شنو تحويلات المغتربين يا شباب الواحد مهم جدا يمشي في الخط بتاع تخصخو ده لو لقا شغل ما لقا تخصصو يشتغل في اي شي لانو انا شايف الواحد بيتخرج في 23 لي 26 طيب مفروض في العمر ده لغاية بداية ال تلاتينات اتزوج لو ده ما حصل الواحد بضيع عمرو و عمر اولادو يعين في كلمة لقيتها بستعملوها في السودان الواحد يقول ليك البخارجك طيب انتو شوفو البخارجكم = يعني يعرس ليكم و يسوي ليك حياة اواصل ان شاء الله بكرة |
سارة الحبوبات دي قصة كبيرة
انا طبعا توفت والدتي و انا عمري اظن 6 سنة و محمد احمد اربعة و الطيب اتنين طبعا جدتي لوالدتي من الشرق غريقانة و ما كانت معانا في الحلة و جات بعدما كبرت توفت و دفنت في ابوفروع خمس شخصيات نسائية اثرت فينا اختنا فاطمة سعيد خالتي ام نفل عبد الدافع عمتي بشيرة محمد احمد خالتي النعمة بنت عبد الدافع عمتي بشة محمد احمد و كمان نزوجات الوالد كان ليهم اثر ايضا من قريباتنا ايضا كانت هنالك قرب من العمات حسينة بنت الجلي و بخيتة بنت فاطمة و زوجة خالي قمر ده للتويق المهم في الامر فاطمة كانت اخت و ام و بنعاملها مرات كتيرة بي ندية خالاتي و عماتي كانن قراب لي درجة علشان كده انا شهادتي ممكن تكون مجروحة بس اقول من اكثر النساء تاثيرا بعد فاطمة كانت ام نفل لانها كانت قوية و مؤمنة و ما زلت و ساظل اعتبرها انها من النساء الائي خصهن الله بالولاية المخفية مش لانو خالتي لاساب عدة اولا بالرغم من انها انجبت بنت واحدة توفيت و لم تنجب بعدها كانت حنينة و تهتم بي اهلها لدرجة انها كانت تتعب و تعمل كي توفر احتياجات اهلها و جيرانها خالتي كانت تتلقي دعم سخي من اخوانها و اهلها لكن المحير يجيها الدعم اليوم بكرة تعريفها ما عندها اقدر اقول انها كانت متوكله مية المية كانت عندها حاجات ما بقدرو عليها حتي الرجال = سخية= يعني اتذكر انو مرو جابو ليها توب جديد و سمح و انا الوصلتو ليها بعد ايام جات مناسبة و سالتها وين توبك الجديد ابت ترد زعلتا و قلتا ليهو وينو عرفتا انو في امراة في الفريق ولدت و ما عندي توب اديتها توبها برضو لانو عندها الغنم كانت اي امراة في الفريق بتلد اربعين يوم بتديها لوجه الله برضو لاحظتا انها كانت تهتم بنظافة المواعين التي تقدم فيها الطعام و الشراب للحيوانات و الطيور النسوان زمان بيشتغلن يعين كلو في الزراعة اولا بتربن= التيراب = يعين يا حناكيش الزمن ده بيرمن البذور في الحفرة البعملها الزراع البكون دايما راجل عن طريف الزراعة البتكون يما جنكابة او سلوكة = و بعد داك بكون حش الحشائيش و د عمل رجالي لكن النسوان العندهن بلدات = مزارع للذرة تعتمد علي الري المطري = و الله بتوقع انو يكون فيكم حناكيش ما بعرفو الكلام ده = المهم النسوزان بعد داك بشلخن = و الشلخ هو عملية بتاعة انو لو البذور كانت كتير النباتات بتنمو كتيرة في حفرة واحدة و كمية الغذاء بتاعها في المساحة المحددة بتكون ما كفاية و ده بيؤدي الي فشل الحصاد = غايتو لو ما شرحتا صاح اكون زاتي متحنكش = المهم النسوان بيترب و بشلخن و بلقطن القطن و بقعن العيش و بيكنسن بعد قطع القطن و بلمن القصب الرجال بزرعو و بزيلو الحشائيش و بدقو العيش و بقلعو القطن طبعا لقيط القطن كانت شغلة حريمية اللقيط كان موسم عمل البنات الغير متزوجات كانن في معظم الاحوال بلمن فيهو قروش يحضرن بيها اشايهم بعد العرس و كانت الاهتما بنصب في شراء العدة الصيني طقوم السشاي طقم موية عدة ما زي عدتكم انتو اسع يعني دستة شاء مع براد نصف دستة كبابي موية مع جق جقين صواني صحانة كم حلة كم مفراكة = كنش كم معلقة دي المسالة المهمة اما باقي الشغلانة فتتلم شوية شوية كان موسم اللقيك برضو موسم بلمن فيهو النسوان المزوجات قطن علشان يترن بيهو = مترار= و هو عمل الغزل التقليدي= حكاية مهارات الطبخ دي بالمناسبة ناس ابوفروع كانو مشهورين ما عارف لسع محتفظين بالمسالة دي بانهم ناس طباخين جدا و طبعا عمتي بشيرة و عمتي حسينة كانن من اطبخ النسوان في اهلنا كانن رحمة الله عليهم لمن يكون عندنا عرس لا طباخين لا غيرو العمة بشير مسئولة عن المللحات و العمة حسينة رحمهم الله و جعل عملهم في ميزان حسناتهم تخصص ضلع و كان ضلعها ليهو طعم خاص و طبعا انا كنتا دقيق الملاحظة لمن كنتا صغير في كل شي و اتذكر كويس انها هي الوحيد الكانت بتخلط في خلطتها بتاع طعام الضلع زبادي او لبن رايب . اها يا سارة قصرتا معاك لسع حا اتكلم عن عماتي و خالاتي و طبعا ديل اهلي يعين ما بقول غير عن اهلي بالرغم من انو في توثيق كتير ممكن يتقال لي نساء عصاميات و نقيات و تقيات في الحلة لانو معظمهن لو ما قلنا كلهن كانن من هذه الشاكلة و الله في حسن ظني بالله الناس الشفتهم و انا صغير ديل نسوان و رجال في ابوفروع ما اظن واحد و لا واحدة فيهم ما يمونو في اعلي عليين حسن ظني فيهم و في الله كلهم ناس جنة يا اخي ديل اكلهم شربهم اهتمامهم عارف زمان المريسة و التمبارة و غيبرو و غيرو لكن شوف الدين المعاملة لو عاينت لي تعاملهم ملائكة بس بعيدن في حسن ظني بالله الناس ديل معظمهم كان حسن الخاتمة سلام |
http://www.arb-up.com/files/arb-up-2008-6/s0r29386.gif
اوفيت...ووفيت..لهن الرحمه.. كلامك عنهن يفترض ان ينفل لمنتدي (شخصيات واعلام من ابوفروع) لاهميتها...ولانه يوجد توثيق..لهن في المنتدي غيرالذي ذكرته الان لك التحيه...ولهن الرحمه والمغفره بقدر عطاؤهن. |
ياعموأحلى وأغلى تحاياإليك وأنت كل يوم تُعطرناوتسامرناوتذكرنابألذي كِدناأن ندنسهُ تجاهلاًوخجلاًونسياناًوهذابسب نظرتناإلي ألحاضرببصيرةٍ عمياتاركين مبدانا. /[شطحة]/ إنتَ عارف ياعموأجمل عبارة بينشرح إليهاصدري عندماأرأهاهي[أها]هههه وألله لزيز ونعم ألأعماربيدألله ولكن إبنك مُسجل إليك كُل تاريخ تُوثقهُ لكي يُكشف عُمرُكَ فلاتتكرس في توثيق ألتواريخ هههههه. ولك لزيزألحُب. |
ذكرت تاثرك بافكار اليسار في المرحله الجامعيه..وتاثير قراءه القران في حياتك..
وفي خواطرك..نلاحظ اهتمامك..والمامك.. بقراءه السيره. فكيف كانت النقله..من اليسار للسيره) ام اجتمعت قراءت السيره..واراء اليسار.. |
الغالي عبد المنعم سعيد شرفتنا فى الكرسى الساخن , لكن كلماتك العطره وحكاويك تزكرنا بحبوباتنا زمان
زمن انعدمت فيه الحنيه كلمات كلهاعطف و حنيه وسردك للخواطر وقصصك وطرائفك جد بستمتع بكتابتك , وانا الحين بقراء فى سردك للخواطربعد ما اخلص منها , اعدك باسئله ما ليها حد , واخيرا تحياتى لك بدون حدود, بس ياريت تفضى لينا نفسك فى هذه الايام |
سلام
سارة نحنا خرجنا للدنيا و في طفولتنا كان الدين دين ما تجارة بالواضح كانت السماحة و صلة الارحام و التراحم و التوادد حاجات كانت تجييك براها انتا ما بتمشي ليها العم اب و الخالة ام و الجار عم و ابن الجيران اخو كانت الحريم بينا بتعرف منو الما شدت ملاحها و بالحيطة تديها الملاح و العجين علشان تأكل اولاها بس طبعا الرجال رجال و ما كانو بياكلو من الحلة و البجيبها بي ضراعو بياكلها المهم واحد من مداخل اليسار كانت الاحوال الاقتصادية كان بيقولو لينا انو المشكلة هي قفة الملاح مصاريف الاولاد للمدرسة العلاج و لمن تجي للحل يقول ليك رنامج الثورة الوطنية الديقراطية و ده السرقو منو ناس مايو تحالف القوي العاملة يعين بالواضح العامين فيها ناس دين ما كان عندهم برنامج غير ده كافر و ده بس شغالين في خلق اليسار كان عندهو برامج وطنية الاشكالية الكبيرة انو اليسار ما بقدر علي شغلانة الروح ممكن جدا ينظر في مسائل الدنيا بس القضية مناهج التصوف بتتكلم عن التربية و التربية في التصوف هي تربية النفس درجاتها السبعة الامارة بالسوء اللوامة الملهم المطمئنة الراضية المرضية ثم بعد ذلك تجي معالجة سيد الوجود من الخواطر القلبية و بعدها تتوالها يد القدرة ده فهم التصوف ما يسمي بالاسلام السياسي و انا اسميها الحركات السياسية اللبست توب الدين لا عالجت التربية لا عالجت السياسة بالمناسبة المسالة دي في تنظيم الاخوان المسلمين من بدايتو كانت محور بتاع صراع كان اول شي بين مجموعات ناس الصادق عبد الله عبد الماجد و بايكر كرار و ناصر السيد و زكريا بتاع اللجان الثورية و تاني ظهر الصراع بين مجموعة جعفر شيخ ادريس و محمد صالع عمر= بالمناسبة كان اول حاجة حزب امة = و الترابي المهم العايز اصل ليهو الشغلانة بتاعة التربية عايزه وقت نحنا كنا بنصلي و نصوم و نخاف الله و الله انا كمان كنتا بنده الشيخ القرشي ود الزين بس حكاية انو تدرس الاحتياج للتغير و تقرا مخطوطات ثورية بدياة تتكلم عن الاضهاد البتعرضو ليهو العمال و المزارعين و تقرا نظرية فائض القيمة و ترسخ في ذهنك انو في طبقات مستغلة و طبقات مستغلة و تجي تقرأ لسيدنا علي انو = ما افتقر به فقير الا بما اغتني به غني و تقرا لسيدنا اباذر عجبي لرجل بات جائعا و لم يشهر سيفه امام الناس و تشوف العدل الكانو بمارسوها الصحابة رضوان الله عليهم في حكم الخلفاء الراشيدين و كيف انو الخلفاء رضوان الله عليهم كانو بطبقو العدل في بيوتهم يجيك مالك بن نبي في اقتصادنا و يكون همو التبرير للااقتصاد الراسمالي و ماهجمة اي شي يقولوهو الاشيوعين حتي لو كان اصل اصولو في الاسلام و تاني زول زي القرضاوي بكل هيلولة = الكلام ده في السبعينات يا شباب يكتب الملكية الخاصة في الاسلام= كانما دولة الاسلام خلقت للملكية و ليس حكم الله دي بطلع زيتك مش كده و بس الان عاينو الدولة هل الاقتصد فيها اقتصاد الدولة و لا اقتصاد التنظيم يعين من البداية التنظير كان لمجموعة محددة النظرية كانت لحاكمية محددة بالواضح انا قريت و الله كنتا مشروع اخو مسلم بحكم انو ابناء اعمامي الكبار كانو في الوقت داك اخوان لكن شعرتا كانو عايزني ابقا و انا قريت الوساس الخناس و دعوتنا و تاني كتاب لمحمد قطب الكلام ده في الوسطي يعين مستوي سادسة اسع قريت بس حست بانو كتبهم فشنك عديل كده كتبهم فشنك يعين تنظير في التربية طيب ما تبقو صوفية؟؟؟؟؟؟؟؟؟؟؟؟ وين تنظير الدولة البتدعو ليها المهم تفكيري في الحتة دي ثبت بانو صااااااااااااااااااااااااااااح و الدليل انو الجماعة لغايتو ما مسكو الحكومة تنظير بي قرش ما عندهم لمن اسع بقوها جنازة بحر لا قدرو يخلوها لا قدرو هم يستروها رغما منو انو الناس البتعرف بتستر جنازة البحر ما عندها في الروح نصيب و لا اجر من البدياة الشي الواضح انو المفهوم قايم ا بس المشكلة انا مشيت لحته غلط يعين اهتميت بشغل الدنيا بس = نورة تحلم بي عوالم زي رؤي الاطفال حوالم و الشغلانة داير شغل روح يراعي دنية الناس يعين الاسلام كلو بني علي مكارم الاخلاق و مكارم الاخلاق ما بتم الا باحترام حقوق الغير اليسار نضالو كلو في حقوق الغير دي الجماعة جماعة الخير من وجه نظري و من البداية ناس دنيا بس اها ضيعو علينا زمناو زمنهم نحارب في طواحين الهواء يعين لمن تعرف انو الله سبحانه و تعالي حق و امرهو نافذ يجي نميري و لا غيرو الدنيا ماشيه و الواحد يشوفو البخارجو اقصد بالخارجو من هول ام لهيب يا اخي جاء اجتماع زو بدون اراجع برسل المشاركة و اجيك بكرة عادل جاييك |
تحيات إليك ياعموألغالي. أرى أن ألكُرسي صارحامياًلأن ساخن قليلة في حقهِ. أناماسألتَ أنافقط بعاين. ولك ألشُكرمع ألحُب. |
بسم ألله ألرحمن ألرحيم[ياجامع يارغيب]. هلي بِعُربٍ بأكناف ألحِمى نزلوا مُخبِرعنهُم أوأنهُم رحلوا فُراقهُم قدشوى جِسمى وأنحلهُ بِداءِعِشقٍ بهِ ألعينان تنهملُ... |
تحايا للاخوه سامر وعادل
ومتظرين المحتفي به...ومداخلاتكم كتب علينا السفر والترحال...وان نقضي اجمل سنوات العمر بين المطارات وانت مقيم خارج الوطن...كيف تصف لنا الغربه؟ وهل فخامت الامكنه هنا...عوضتكم ..شئ.عن اهل عموديتكم...هناك.. http://www.arb-up.com/files/arb-up-2008-6/TGd49681.jpg |
تعرفي يا سارة مرات بفكر انو نحنا احفاد الشباك بنت ود الخدر اورثتنا شي صعب
العناد عنيدين و لمن نقوم عليها مافي شي برجعنا الشباك بنت ود الخدر هي ام حبوبتك السارة بنت ابراهيم ام امك حسينة كانت قوية الشخصية و ما بتتراجع لي وراء حتي ما بتمشي الجاب السيرة دي شنو؟ بالواضح حتي السفر كان عناد مني السفر ما حبابو السفر انا بديتو مجبور و كان السفر لي اورباو كنتا عارف اني راجع اهلي حيا او ميتا في سنة بداية عام 1984 سافرتا لي ايطاليا عن طريق القاهرة و اثينا كنتا مبعوث و عمري حوالي كم و عشرين و جيبي فيهو اربعة الف دولار بالتمام و الكمال كنتا بدفع لزملائي زي ما بندفع في السودان بي حليفتها و النية الدفع مش كراع وراء و كراع قدام في ايطاليا قعدتا في نابلي زرتا اوبرا سان كارلوس و المتحاحف الفي كل كورنة تهت في الكنائس فن نحت و بناء و زخرفة تحسست مواقع المافيا و ابتعدتا او ابعدتا قسرا بي كرام اهل عن الدنايا سكنتا فنادق درجة اولي و شفت تكنلوجيا و وفن وذوق و جمال تحسست الموسيقي الفن النحت الشعر السياسة و التاريخ بعد عام مشيت امريكا و شفتا النقض و النقيض الابيض و الاسود الغني والفقر الجمال الانساني و القبح و الظلم كل شي و نقيضو شفتا ناطحات السحاب شفت معرض الفضاء مشيت بلتمور للاحياء المائية الريف نيويورك بكل زخمها و كان جيبي ملان من حكومة السودان و من موائد البنك الدولي بعد سنين جيت انجلترا و كنتا زهجان لانو بديت انضج و حسيت بي الطعم المر لي قروش الاستعمار الحديث و فروش المنظمات الاقليمية و الدولية و عرفتا انو اهل اليسار علي حق بخصوص ناس البنك الدولي و صندوق النقد الدولي حسيت بمرارة انك تكون اداء في يد غيرك ضد بلدك رغما عن انفك و كان موسم التمرد الاكبر بعد سنين مشيت اليابان طلعتا من غربة اليابان بانو اليابانين بنظرو للعالم بي منظار ضيق قدر عيوينهم الزي قدود الجلد ديل اليابان صناعة امريكية حتي مصانع السايرات اهم الناس فيها امريكان زرتا مصانع عربات الملازدا و صناعة الحديد و الصلب اليابانين محرشين بس بياكلو من فتات امريكا و الله عرض علي في اليابان اني اعمل مع العرب ابيت و جيت بلدي و كنتا بخت نفسي مع اي خليجي في مرتبة واحد و الحمد لله و وبدون غرور كنتا كسوداني بشوف نفسي احسن منهم مهنيا جيت لقيت و بدون حساسية ناس الحكومة الجداد رافدني من شغلي دي مرحلة مرحلة عزة النفس في بلدك و منظورك للترحال انو ترحال من اجل اكتساب خبرة و معرفة تنمي فيك ذاتية تستعملها و تمنهجا علشان تتطوعها لي بلدك للاسف البلد لقينها عدمانه المنهجية و اول شي في عدم المنهجية تشريد الخبرات و الكفاءاة حرسنا البلد سنة سنتين قلنا يغيرو رايهم او يتغيرو هم لا ده حصل لا غيرو حصل قلنا احسن نتخارج و اصلو القناعات زاتها اتغيرت و الواحد بقا داب يحل مشكلتو قلنا نرحل من بلدنا البنطلع منها زمان ننمي خبراتنا و نطرها منهاج و منهج نجيها راجعين بي شوق للتنفيذ اها بعدما انطردنا من شغلنا قلنا نمشي نستر حال اهلنا و نتمنهج بالحل الفردي نمشي لي دارا ماها دارنا بس تحل مشكلتنا نلم القروش يا حفيدة اجدادي و اماتي مالك داير ا تفتحي الجرح القديم نورا شافت في رؤاها طيرة تاكل في جناها حيطة تتمطا و تفلح في قفا الزول البناه = مقاطع شعر لي حميد بواصل ان شاء الله بعد الصلاة |
اجي راجع
الغربة الجديدة لم قروش و لم القروش بالرغم منو انو فيهو تضحية لمن الزول يعاين لي اسرتو الكبيرة و لي الممكن يقدمو لكن انا = اعود بالله من الانا اكرر من وجهة نظري انو الاغتلراب بطريقتو دي بعلم الجبن يعني الهم قرش العلاقة قرش العلاقات سريعة تجاور زول كمين سنة يرحل او يتفنش تعاين لي علاقة جديدة انا ما بقول الناس كعبة لكن الظروف الجيرة ما مستقرة و ما ليك خيار كبير فيها كل شي ما مستقر غايتو نتلاقا بكرة |
تسجيل حضور..ومتابعه..
ونواصل بكره..انشاء الله[/ http://www.arb-up.com/files/arb-up-2008-6/NOb82166.gif |
اخي العزيز عبدالمنعم
متابعين باهتمام ,,, وطال غيابك عنا ,, ارجو الا اكون سبباً في عدم طلتك ولك ودي واحترامي |
أللهُّمَ أرحم ألشُباك إبنت بنِ ألخدروجنب عمي ألغالي ألعنا د وأحفظه لنا ومتعهُ بصحة جيدة. تحيات طيبات إلي ألعم وألخالة ألعُزازولكم ماترونه يُسعِدُكُم ونأسف على ألذي أذعجكُم عموماً ألكُرسي صار لايُلمس إلا بتدقيق وليسَ لديهِ وجيع إذاً زيدواألنجيع وأسعدوا ألجميع وفرجوا ألضيق وألله إوفق حا ج ألصديق. ولكم مني حُب دقيق. |
اجمل التحايا الي العم عبد المنعم وإلي كل من ساهم من الأعضاء في هذا الكرسي التي اطلقت عليه الأستاذة سارة الكرسي الساخن اولا ياعم عبد المنعم ح اجاوب علي سؤالك الذي ذكرت فيه انك تريد معرفة ابو العزائم الاسم ابوالعزائم احمد الطيب البشير الميلاد والنشأة قرية ودحميدان جنوب غرب مدينة ودمدني وما زلت انتمي إليها السكن -الخرطوم الشجرة - متزوج والحمد لله ولدي ثلاثة أبناء وهم علي واحمد ومحمود أقيم الآن في العصمة المقدسة {مكة المكرمة } أعمل محاسب في إحدي المؤسسات بالمملكة قصة دخولي هذا المنتدي أتت من بحثي حول شي يخص تلك البلدة السادلة علي ضفاف خزان سنار ألا وهي ودحميدان وقادني البحث إلي منتديات ابوفروع وكان ذالك في قصة سالم ودالسما التي سردها احد أعضاء المنتدي وحين قراءتي الي تلك القصة وجد ذكر قرية ودحميدان جاءني إحساس بأنني مواطن او لدي علاقة جذابه الي تلك البقة السادله علي ضفاف النيل الازرق وهي قريتكم بلا شك ما شعرت إلا وانا عضو في هذا المنتدي الرائع والخلاب بمشاركاتكم وإبدعاتكم التي يعجز القلم عن التعبير عنها هذا بإختصار شديد بما يخص ابوالعزائم وأتمني أن اكون عضو فعال في منتداكم العامر ولك وله ولها ولكم جميعا الشكر والعرفان علي إستضافتي وترحيبكم بي ولنا لقاء ياعم وهذا رقمي للتواصل معك 0541344239 {تخريمة} ولدي أبن خاله متزوج من عندكم بنت خالة العضو الرائعة هناء الماحي وهي ادري مني بذكر ابنة من تكون زوجة إبن خالتي |
صدق الاخ ابوالعزائم فعلا لهو ابن خاله وهو راشد طه البشير من قريه( ودايومه) بالقرب من ودمدنى ومتزوج من بنت خالتى غاليه على محمد زين وامها احلام يوسف شاهين بت(اسكم) ومتابعين معاك يا عمو وتسلم لينا انشاءالله |
بسم ألله ألرحمن ألرحيم
|
لكم الشكر اجذله علي مداخلاتكم الثره..الاخوه الاعذاء كما لجميع الاخوه حريه الاسئله...لضيفنا حريه الاجابه.. اطفال زمان اكثربراءه...واطفال الديجتال اكثروعيا" هل الزمن الرقمي سرقت براءه.اطفالنا اقترح لنا حلا"...يجمع بين الوعي الديجتالي...وبراءه زمان |
سلام
يا جماعة و الله ما زايغ و جاي راجع و الصديق قريت اسلتك بس مشغول و بالرغم من مشغولتي كتبتا الرد تلاتة مرات و لمن اعمل المشاركة ما تدخل ما عارف الحاصل كتبتا الرد ما دخل و الان بكتب بس اتمني الرد يدخل |
سلام
اها جيتكم المرة دي كتبتا الرد في الورد و بعمل ليهو لصق الكمبيوتر عامل مشاكل المهم و الله كنتا مشغول شغل شديد بعد كم يوم كتبتا تلاتة ردود و ابت تنزل و اتمسحت و الكلام ده في عقيدتي انو فيهو حكمة لانو في التلات مرات قمتا علي الكيزان قومة شديدة و تالت و رابع بقوم عليهم اها رايكم شنو؟ المهم ارجع لي موضوع انهيار الماركسية و انو النظرية بتاعتهم غلط طيب نجي بي صوت العقل نحاكم النظرية الماركسية اولا و بدون تردد الماركسية غلط للطيش و الدليل انهيار الاتحاد السوفيتي بس الشغلانة فيها ايجابيات كتيرة للتفكر و التجربة الانسانية في العلوم الاجتماعية زي سياسة و فلسفة و اقتصاد و اجتماع و منطق و غيرو شغلانة الدين دي هم زاتهم ما محل محاكمة لانو الفكرة غلط و ما بني علي الغلط غلط الماركسية في جانبها الفلسفي مبنية علي فكر النصرانية و لانو النصرانية كدين جبت اي انتهت بظهور الاسلام الا انو في ناس بدوعي انتهازية جدا بعتبرو انو راي الماركسية في النصرانية راي في الدين و ده كلام 100% غلط كيف طيب سيدنا المسيح عليه السلام كان موحد و دي في ايات كتيرة بتتكلم عن الكلام ده لانو سيدنا المسيح لم يقل بانه ابن الله طيب النصاري و اليهود و الذين لم يكتب الله لهم الهدي . هم عارفين انو سوف ياتي نبي اسمه احمد اليهود عسكرو في الحجاز علشان يجي اخر نبي منهم لانو عارفنو بجي من بلاد العرب و هم طبعا في و عيهم الداخلي اتخيلو بانو لو مشوا الحجاز ممكن يحصل نسب مع العرب و الرسول يجي منهم و لي البعرفو هم حاولو من قبل يختو يوحنا المعمدان نبي يسد مكانة سيدنا سيد الوجود صلي الله عليه و سلم و نسوا انو يوحنا المعمدان العندنا سيدنا الخضر رضي الله عنه شغلو تاني و مستمر وهو شغلو كلو باطن المهم النصاري جاؤو بي كلام الثالوث الاعظم و هو الله سبحانه و تعالي = في اللاهوت و ودي طبعا بعد الملكوت و الجبروت السيدة العزراء = الناسوت سيدنا المسح عليه السلام = الروح القدس طيب الفكرة حولها هيجيل لي مفهوم فلسفي للشي و نقيضو و مركب النقيضين ماركس حول الفكرة لطريقة التفكير و للواقع الاجتماعي يعني فكرة و نقيض الفكرة و مركب النقيضين الشي و وضده و توحد المتضادات علي الاساس ده ماركس بنا فكرتو في استقراء التاريخ و وزع تاريخ الانسان لمشاعة بدائية = المجتمع الشيوعي البدائي = المجتمع العبودي المجتمع الاقطاعي المجتمع الراسمالي المجتمع الاشتراكي المجتمع الشيوعي طيب اساس الفكرة عند ماركس بناها علي فكرة الثالوث المعظم كما يسميه النصاري انا عندي بعدما ما اخدتا الطريق و حضرتا محاضرات عن الاشياء دي انو الشيوعية زيها زي البروستانتية هي وليدة طبيعية لللمارسة الغلط اللدين بواسطة النصاري سوال لمن تاكل حاجة تاريخ صلاحيتها انتهي بحصل ليك شنو؟ رضينا ام ابينا و وده من اساس الدين النصارانية انتهت يوم بعث سيد الوجود صلي الله عليه و سلم طيب في ظل العلاقات الاقتصادية السئية الكانت سايدة في اوربا و نسبة لدور القساوسة و الرهبان الكان بقيف مع الاقطاعيين و الراسمالين و الببيع ليهو صكوك غفران تغفر اي ذنب يسوهو في الغلابة عايزين ماركس يقول الشغل ده صاح و حتي لو قال صاح انتو كمسلمين بتقولو صاح مجرد سؤال ما برئ ارجع للموضوع ماركس بني فكرة علي شي غلط طيب هو اخد من الواقعاشياء اقتصادية و اجتماعة حلل بيها عدم العدالة و سؤ التوزيع الحاجات دي عندي انا علي الاقل فيها اشياء صاح السؤال هو هل علشان قالها ماركس تصبح غلط؟؟؟؟؟؟؟؟؟؟؟؟؟؟؟ طيب ما معظم الاكشافات في اعلوم الفيزياء و الكيمياء و الطب و العلوم التانية عملوها يهود هل في واحد اب ياخد ليهو حبة علاج اكتشفها يهودي عليكم الله راجعو الاجهزة الطبية و شوف االاخترعها منو تهبش تلاتة ارباع البنوك و المجهورات في العالم اشيادها يهود صناعة الطائرات و السلاح الكلام ده ما يفهم غلط. اليهود ربنا في مواضع مسخرهم لينا و في بعض المواضع مسلطهم علينا و ده ما بتفهم الا في اطار فهم سيرة و مسيرة المسيخ الدجال و ده موضوع تاني خالص بس في حكم الدنيا هنا بنلقا انشتانين يهودي مكتشف البنسلين و لا في واحد ابا يركب الطيارة الصنعوها النصاري ما ياهو ده اي واحد يمرض جري علي اوربا و امريكا البلاد دي رافعة راية اسلامية ما همنا نحنا عندنا علم الباطن و الله و تالله علومهم دي عند اهل العلم ما تسوي شي لكن اهل العلم ملزمين بالصمت المهم الماركسية دين غلط فيها اشياء صاح بعيدن انا عندي سؤال الماركسية اللينية نظرت للثورة و الدولة لمن لينين كون الدولة كانت دولة قوية بس المشكلة نحنا العندنا الشي كلة كتاب الله و السنة او كتاب الله و العترة طبعا وردن راويتين ليه ما بحثنا في اصول الدين و نظرنا لي حاكمية الدولة بدل ما ننظر لحاكمية التنظيم زي ما سوا الكيزان و بدل نشوف حاكمية الدولة المسلمة شفنا حاكمية التنظيم الانقلب علي شيخو او شيخو انقلب عليهو و الشيخ طلع الجماعة ما مسلمين و لا عندهم شهداء استغفر الله العظيم الذي لا اله الا هو و اتوب اليه جاييكم الموضوع ده انفتح و يظهر انا كنتا عايزو ينفتح لانو فيهو كلام كتير عن الفلط الحاصل في التفكير |
نرجع لي موضوع فائض القيمة فائض القيمة طبعا التعريف بتاع القيمة عند اهلنا القدام هو:
العمل الاجتماعي الضروري اللازم لانتاج السلعة اهم شي في الماركسية انها ما بتخت قوة العمل مع ادوات الانتاج بل بتخت ادوت الانتاج و علاقات الانتاج في كفة و الحاصل بينها بتقيم بيهو تطور المجتمع يعين بتخت القوي المنتجة في اطار حركة ده ما قمة البشرية و الانسانية و ده كلام جميل بشبهنا نحنا المسلمين لانو الاسلام في اطاراتو الاقتصادية كلها ايات و لا احاديث ما تكلم عن الملكية الخاصة بل اتكلم عن الانسان في الايات و الاحاديث عن العدالة و اعطاء الاجر قبل ان يجف العرق ما تاكلم عن مراهي ناس ما تجي تلاتة شهور و الجماعة سفر من بلد لي بلد بس دايرين ليهم عسكري حركة في الجو من كترة السفر المهم انو قيمة العمل بتقسم لي جزء بيعكي للعامل و جزء باقي يدفع للتكلفة بي هلاكها و الباقي بيكون فائض عمل من عرق العامل طيب ما ده توزيع بس رضينا و لا ابينا دي فكرة جيدة مع امكانية نقاشها لكن ده ما بيعني انها حرام و لا كفر طيب نمشي اكتر في الطبقات المستغلة و الطبقات المستغلة الراي شنو في كلام سيدنا علي انو ما اغتني به غني الا بما افتقر به فقير يا جماعة حقو نستفيد من تجارب غيرنا الماركسية فيها كلام عن الاقتصاد مهم الكلام ده روح النص الاسلامي شاملو بس في غياب تدقيق و معرفة يعين كلام كتير بتاع تنظيم اقتصاد موجود عندنا في اصول الاسلام عايز اقول حاجة مهمة جدا التجربة الايراينة بالمناسبة استفادت جدا من التجربة الاشتلااكية و بالرغم من رايي الواضح في الشيعة الا انو تنظيمهم للدولة روحو روح اسلامية مهم جدا اسع النظر في تقدم الدولة للتخطيط و التخطيط الاستراتيجي و د ما بيتم الا بالاقتصاد المختلط في شي مهم جدا الازمة المالية العالمية الحالية وضحت بطريقة مباشرة حتي في المجتمعات الغربية البرجماتية الراسمالية انو تدخل الدولة المباشرة في كتير من اوجه السياسة المالية و النقدية و الاقتصادية واجب اكرر واجب طيب ما المشكلة كانت بين المعسكر الغربي و الاشتراكي هي تدخل الدولة و عدم تدخلها المهم يا الصديق انا الكلام ده حارقني للطيش لانو واحدة من الاسباب الادت للانهيار الحاصل في السودان هو انو الادارة السياسة للبلاد دخلت في سياسة اقتصادية ما اسلامية خالص راسمالية للنخاع و ادت الي ما ادت اليه الكلام علشان ما يكون بدون ادلة اولا الدولة اول شي عاينت ليهو التخصيص و التخصيص ادي الي سياسة البيع عاينو براكم باعو ملك الحكومة لي تجار قريبين جدا من السلطة او مشاكنهم تفريق الخدمة المدنية و الجيش و البوليس الا من الموالي ليهم ادراة الاقتصاد بناء علي الولاء الحصل شنو؟ جووووووووووووووووووووووووطة يا اخي و الله الواحد يلف و يدور و بطنو طامة الحاصل في البلد انهييييييييييييييييييار عديل السبب فيهو كل ما هو اشتراكي ما اسلامي و النتيجة لا لمو في اسلام لا حكم غايتو اواصل |
شوفو كلام المحبوب عبد السلام
لقيتو بعدما كتبتا كلامي و شوفو كيف شهد شاهد من اهلهم بس الواحد يفتح الرابط ده http://www.sudaneseonline.com/ar2/pu...ws_A1300.shtml |
| الساعة الآن 10:00 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir