|
دار شايق ** كلماتهم لينا حايق
الإخوة الكرام بعد التحية والإحترام،،،
ندعوا الجميع جعل هذا البوست خاص بعمالقة شعراء أهلنا الشايقية. والأولى مهداه للأخ/ عبد السلام. الشاعر الفذ الفريد أبراهيم ود أبنعوف .. أحد كبار شعراء أغنية الطمبور .. إمتاز بجمال الكلمة وغلب على شعره بعض الحزن .. وهو ممن يستحقون تخليد كلماتهم لكل الأجيال .. بكتب ليك مالى أنا كل ما أقول فى نفسى إتلمينا ألقى أقدارى تضحك .. لى تقول كضِّاب وكل ما أعمل حساب لظروفى زى الما عملت حساب مالو فراقنا مترقبنا .. دون خلق الله واقف ديمة عند الباب وأعمل إيه .. عشان يختانا جاى أو جاى وبينَّا وبينو يبقى حجاب ونشوف الدنيا موكب فرحة لينا تغنى بى ترحاب وتدنى عليِّا آمالن .. بشوفا سراب ويهل سعدى .. ونجم سعدى .. بعد ما منِّى طوَّل غاب وأقيف خاشع .. وأقول يا الله كل النَّاس يكونوا أحباب *************** بكتب ليك وأطوِّل فى كتاباتى يفيض إحساسى وأملا الدنيا بى كلمات خطاباتى بجمع ليك لغات الدنيا وأكتب ليك بى لغة العجم مرات .. وبالعربى الشديد وفصيح .. وبى لغة الملايكة أحيان .. وبالسريانى والتسبيح .. وفوق كل ذرة فى ها الكون .. بكتبا ليكى وارسلا فوق بساط الريح بكتب ليك على الأشجار .. وفى الأنهار .. ومحل ما تمشى قدامك تلاقى حروف رسالاتى لأنك إنتى من ذاتى .. وفى ذاتى .. يا ذاتى ومهما كتبت ما بقدر أعبر ليك عن الجوايا مهما طاوعت أقلامى كلماتى وليه ما أكتب وإنتى الماضى بى أحزانو بى أفراحو والمستقبل الآتى كتاباتك شوية خلاص .. ورسالاتك شوية خلاص علىَّ الفى منامى أحلام .. علىّ الفى صحاى وسواس وأنا الراجيكى تكتبى لىَّ .. كم دفتر وكم كرَّاس منَّها داير أفصِّل جبة وانْدروشْ .. وكمان طاقيِّى فوق الراس ومن كلماتا أسوى السبحى والبخرات وكم حجبات أداريبن عيون النَّاس كمان تقروقة .. وفى محراب هواكى اجلس مع الجُلاّس واخلى الباقى واتغتابو .. لو بعدك غشانى نُعاس أنا الراجيكى تكتبى لى .. كتاباتك تكون فى الظلمة لى نبراس أنا العايش فراقك لى .. بشوفك فى عيون النَّاس وعازرك لو كتبتى قليل ..رضيان بيهو ما دام بى وفا وإخلاص أريت يومن فرقنى معاك .. يكون محذوف من التاريخ .. وتبقى أيامنا ستة .. ونبقى فيها قراب أريت بلدن تحرمك منى .. لو ما إنتى تبقى خراب يسكن فى خرابا البوم .. ويتصايح عليها غراب تولِّع فيها نار الله .. وتصبح كوم رماد وهباب وتمرقى إنتى والنَّاس المعاكى قراب.. |
للفنان القامة عبد القيوم محمد الشريف عشرات الكلمات التي لم يصدرها في البوم ومن هذه الكلمات اختار هذه القصيدة التي تغنى بها في البوم خاص جداً ( قعدة في الحي ) في القرير والكلمات تقول:ـ
شايل هُمومك ماشي وين لمتين حتوصل لي متين يا الفـُته من دارك حـزين داير الفـرح تلــقاه ويـن من غربة الرُوح والوطن ضيّعت من عُمرك سنين لا ليك أماني أتحققت لا ضي صباحك دار يبين آهات نوازعك والمحن جرحن قليبك مرتين الأولى من غربة وشجن والتانية من عشقاً دفين ********* ضيّع صباك في غفلتك لملم شعاع نجمُو وأفل ساعة تلاحق غربتك ترحاله في كل القِبل عشماً مُودر ليك صباك لا دق بابك لا وصل وأصعب من الحال العليك إنك حتحيى بلا أمل ********* باري السراب تبكي وتنُوح بين هم وغم عائش غريب تشكيهو حالك لي بشر مخنوقة بى عبرة ونحيب معقولة تشكي مٌذلّتك لي ناس هوايتك في النصيب مشغولة بي هم الحياة وبالحال العصيب ********** ما أجملك في موطنك بين الحبائب والأهل صدرك يزيح كل الهموم بى ضحكة مخضرة أمل ليشِن تفارق جنتك تأكل وظيف شجراً أضل تشفق علي الرزق البجيك ومتين في رزقاً كان أفل ********** يا زول حبيبتك مشتهاك لامتين يوهدبك السفر ماك طاري يوم فرحة لقاك لحظاتو فوق قيف البحر ساعة تزفكم الطُيور في المغربية بلا قفر لي شاطي مزدان بالزهور ريحة دُعاشُو رزاز مطر |
ا لشاعر المبدع/ ابراهيم ابنعوف
( المِن الله واصل) أبكي إِِنِتِ وأنـا الإتبكى .. المـن الله واصـل إيه في إيدنا غير ما نبكي .. نحكي البينا حاصـل تعذبني وتهيَّـج ناري .. قولـة مـاك مواصـل إنتي ما عارفة السبب من أهلك .. الباقين عـوازل كاسوا فراقنا وبس دايرني .. أحيا غريـب وهامـل وأنا أرحم ليْ فراق الدنيا .. من عينيهـو ساهـل أريتن عرفوا روحي بلاكي .. روضاً زهرو زابـل من تلقـاك تفرهـد تانـى .. زى الصابـا وابـل تلاقى الفرحة فى عينيكـي .. للأشـواق تغـازل فوق جدول أمل يتجارى .. يروي الريـد مشاتـل تسألي بالبسيمـة التايهـا .. كيـف بالله عامـل أخاف حزنك وأخبي البي .. معاكي أضحك وأجامل عُمرِي العشتو كلوا وراكي .. بي أحزانـو حافـل لكن الصبـر يـا روحي .. كـل الفيهـا زايـل زى ما إنتي تسألي عنِّي .. عنِّـك برضـو سائـل وصورتك عايشة فى وجداني .. طالع وبيها نـازل ألقاك في الصبَّاح وإشراقو .. في نغـم البلابـل في كلمات كتبتها ليكـي .. تـب مـا قـالا قايـل لو بقدر أسيبك وأمشى .. ما أصبح جسمى ناحـل ولا باريتَّ درب الريـد .. ودرب الريـدة قاتـل ولا شقَّتْ مراكب آمالي .. بقيدا أنـا لسـة واحـل ولا أمسيتَّ أنادي دموعي .. والليل نجمو راحـل هم دايرين يفرقو قليبي .. شافـو عليكـي مايـل منو الفيهم يفرق النسمة .. مـن زهـر الخمايـل مهما أشقى أضـوق المُـرَّة .. وللأهـوال أقابـل أبداً يا كتاب حُبي المقدس عندي ما بيقراكا جاهـل |
الشاعر/ إبراهيم ود أبنعوف
السحيبات أبكن يا سحيبات ما كفاية بكيت واديك إن روا .. وأنا بالدموع ما رويت ترا الفيهم حنين يبكي ويبكي باكي وحدين قالوا يا ود أبنعوف جنيت كان جنيت كتير من جن ماني براي دي المكتوبة لي وأنا بي قسمتي رضيت من فارقت واديك قلت تميت حول .. كيف يبقى العلي وأنا للسنين عديت أنا صابر يا سحاب حولاً وراهو الحول وعارف يوم وقع في حُبو ما سميت تراك وسط الدموع تضحك بريقك شال . أما أنا يا حليلي العُمري ما فريت روح يا سحاب فلل عليك الليل وبلغ لي السلام لي داروا إن مريت كلمُو بالحصل لو تاني ليّ يعود وأوعة تعاتبوا شان يزعل يقولك أبيت وبعد الحول تعال غاشيني برجاك في محلي دا أنا بقيت حييت وإن بقى ما لقيتني أبكي عليّ ونُوح . وأعرف إني مُت بي شوقوا و إتفكيت |
عابرة (في حضرة عيونك)
للشاعر/ محمد أحمد الحبيب لحظة في حضرة عيونـك وحاجبة المرسوم هـلال ياها آخر أمنياتـــــي في حياتي ولا تـــزال ذكرياتك يا أمانـــــي باقي رغم الماضـي زال باقي نبراس الأغانـــي لما ليل الفرقة طـــال لسة بتذكر وصالــــك آهة ما أحلى الوصــال الزمان يا عابرة شالـــك من دنايا بلا قتــــال سابني ما قادر أقــــارن بين حقايقك والخيـــال قلبي في قلب المدايـــن وإيدي في إيد الشمــال عابرة يا عطش القوافــي لما شديت الرحــــال لي ديارك وإنت جافــي شاردة زي بحر الغـزال عابرة يا ظبية فيافــــي سارحة بينات الجبــال فرصة لي لقياها مافــي مافي حتى ولا احتمــال يسألوني عن القصائـــد وإنت في دنياي ســؤال في الضحى المنشور قصائد والغد المأمول محـــال عابرة ديناصور غرام يا عابرة تظهر من خـلال إعترافاتي وكلامــــي ماضي كان موجود وزال عابرة من دون الرسائــل ليه رسالاتك قــــلال حالتي من يوم جيت قايـل تبقى بيناتنا اتصــــال كم زرعنا الريد دوالــي أزهرت أغصانو شــال عتقت خمر الليالــــي بينا عند اللُقيا مــــال واللي كان يا عابرة وينــو ما الزمن ما عندو حـــال مرة يسقـيك بي إيدينــو ومرة يديك بالنعـــال عابرة مشتاق لي عيونـك وحاجبة المرسوم هـلال عابرة كل الدنيا دونــك تافهة والأيام تقــــال |
الشاعر/ محمد أحمد الحبيب
عـابرة ( مشتاق للبلد ) يا عابــــــــــــــــــــرة .. مشتاق للبــــلد شوق الغفار الجافة لي صوت الرعــــــــــد للروعة في أيام زمان وشليل وشــــــــــــد للوقفة فوق درب الورود والصيــد ورد لي زول يدودر للشراك في قينقـــــــــــــرد يدعوها يابت الملوك بحرك شـــــــــــــرد لي صوت حنون بينادي في صبح السعــــــــد ما تصحا يا زين الجنيات شايك بــــــــــرد حبل الصلات البينا أقوى من المســـــــــد لولا مناشير المشايخ والعُمـــــــــــــــــــــد فجعوني في ريدي القديم لما إتفقـــــــــــــد يوم فقدو كان يوماً عجيب هزاني جـــــــد باعوهو لي زولاً غريب شالو وشــــــــــرد خلاني في غمرة شقاي بلا سنـــــــــــــــــــــد حسيت إني فقد هنايا إلى الأبـــــــــــــــد في لحظة عِن ساعة الصفاح لُمان عَقــــــــــــد طارت سحايب أحزاني بالشوق والكمـــد غطت سماي الفيهو نجمات بالعـــــــــــدد الحالة يا ست العيون ما بتنشرح مهما ســـــرد يعلمبها الرافع سماهو بلا عَمــــــــــــــــــد عالم الغيوب الخمسة بي جاهو الإتفـــــــــرد الباسط الباري البديع صادق الوعـــــــد قلبي الوراك أنفق سنين ماليها حــــــــــــد رحالة فوق جمل الهجين طالبو الأمــــــــــد وآخر كلام يا عابرة قدامك ولـــــــــــــد راييو الأخير الموت ولا العيشي النكــــــد |
مناسبة القصيدة..
في القرير وتحديدا في حي القلعة التقي الشاعر حاتم حسن الدابي عن طريق صدفة الأسبوع الثقافي المقام بنفس الحي بإحدى الحسناوات فكتب: ذكريات أيامنا القبيل في النفوس ساكن هاجسا الجميل السمح الطباع منه اتجاهلنا ونسا خمسة يوم متعت العيون في السماحة المتجانسة وصدفة ما صدقت الظروف بيها تجمعني وأجالسا هادية بي طبعها ما حصل مرة قابلتها عابسة أما لو بسمت يا لطيف كل خلق الله تجرسا للشباب صبحت مغنطيس كلو جنب الباب حارسا وهزت القلعة يمين شمال بي عبيدابا ودونقسا امتطيت صهوات القصيد قلت أنا الكلمات فارسا ما قدرت أوصف سماحة إنت كملتي مدارسا العيون في الظبا ماها في واسعة تتحدي مؤانسا الرموش الفوق فاترات للتحت دايري تلامسا شوقن انو يقالدن بعض والوصال بيناتن قسا ماها لابسة تياب للسماح السماح ياهو اللابسة الوجيه زي ضي الصباح بي ورا الظلمات دامسة لا الظلام يطغى على الصباح ولا الصباح يخترق المسا خطوة خطوة مشيها التقيل ترفع أقدامى تحنسا والخدود شبعانات نضار فتحت يادوب نرجسا مرة يا ود كارة إن مشيت بالعلي قلها حدثا ما تخادع خليك حريص ما تلم فيك مباحثا قلها إن فتشنا الشمال ليكي ما بنلقى منافسة وحتى تاجوج لو شافتك ليكي أعلاما تنكسا |
الشاعر/ حسن الدابي
يا خلايق لى جاره يا خلايق لي جاره البرتكان تقليد صفاره فرهدت في عز عماره ما بجيبو حرام خباره حابكة بالمليون تجاره نهار وليل قاعدين حياره سيدا قال ليهم صغاره ما استوت دفيق ثماره مرة ليها مشيت زياره عاكسوني أهل الغفاره قالوا زي شوفتك خساره يا خي سيبنا بلا عواره في الفؤاد موقودة ناره وقلبي مجروح بي حساره زاد شراييني انفجاره إلا وقفت لي الجباره رحت استفسر كباره هدوني قالوا غراق بحاره العقلة فايتي من الحدارة والخدود زاد ازدهاره جبينة يشهد بالنضارة عبيرها منو الناس سكارى تبتسم يغريك هزاره رموش عيونا أخد حذاره شوفو عقليتي وجساره بقت تجيد لحن العذارى لو تعود تسكن دياره بودي للفقرا المزارة ما لقيت لي طريق بصاره دابة روحي قرب وداره |
الشاعر/ احمد محمد الحسن عثمان
شايقية ثلاتة خدود على الخدين شلوخ جذابة سحرية عيون مقرونة الحاجب حادة النظرة عسلية شعر نازل على النهدين تتمناه هندية نظرت ليا وابتسمت ابتسمت بكل ما فِيّ حتى عواطفي ابتسمت وحتى مفاصل إيديّ وحتى عروقي من جووووووه وحتى مضافر أصابعيّ سالتها إنتي من كسلا ؟ قالت لا الشمالية قلت تكوني من شندي ؟ قالت ماني جعلية قلت تكونى من دلقو ؟ قالت يعنى محسية ؟ قلت إذاً من القو لد ؟ وجنسك دنقلاوية قالت ما عرفتو أحشا نسيت تقول ليّ شايقية |
الشاعر عوض علي حامد
عازر حبيبي عاذر حبيبي أنا لو جفا سيبوني يا عزال كفى مالكن على قلبي الحنين طريتو أحزان السنين رجعتوا لي قلبي الأنين بعد الأنين راح اختفى عارفين حياة الناس ظروف فرحة واسى أحلام وخوف طول عمري بوزن في الحروف لا من موازيني إنكفى وسألتو ما قادر أجيب كان الجواب صمتي الرهيب ونظرت لي وجهي الكئيب ضاعت ملامحي البعرفه خلوها ينبت ليها ريش واسكن مع حُبي العشيش سيبوني يا عزال أعيش في الدنيا لو لحظة صفا ما قبلي قيس زينة الشباب خليتو مجنوناً مصاب ما ليلى كم عانت صعاب مين الآواها وأنصفا يمكن أجي وفي يوم أعيد ذكرت هواي الإنطفى حلفتكن بعدي السكون بي الله خالق المصطفى سيبوني يا عزال أموت انسل من دنياي أفوت خلوني ارحل للبعيد للغربة للوهم السعيد |
الشاعر/ خالد الباشا
طول الليل طول الليل مانمت بفكر .. فيك والنيل وأنين الساقي وجدول شوقنا الطالع منك .. ودالق فينا حنينو وساقي .. **** طول الليل بيناتك راحل .. لا مليت لا قلبك ضاق .. إتكلمت معاك عن بكرة .. وإتونسنا كتييير ودقاااق .. وكان الليل من جوة عيونك .. دالق حنو عليّ العشاق .. إتمنيت ما تشرق شمسو .. ويفضل دفئو .. حنو وهمسو .. ويفضل ضي إشراقك باق .. ولامن شمس اليوم التاني ..إنتي أماني ..إتجزرتي وطي الأعماق .. وإستوطنتي مداخل قلبي .. ومهما طال في دربك دربي .. الأشـــــــــــــــــواق ياها الأشـــــــــــــــــــــــواق ... **** طول الليل الفات بالذات ..كنتي معايا وكنا رهااااف .. شلنا غناوي اللهفة مشينا .. وحُمنا الدنيا أرياف أرياف .. إتواعدنا تحت تمرايا ..إنتي معايا .. صورتك واااضحة وما بتنشاف إتعانقنا عناقاً حااار .. وإتواثقنا من الأطراف .. وإتعاهدنا عقاب أيامنا .. تبقي عليا وأبقى عليكي .. آلاف آلاف .. **** طول الليل وعيونك تنده .. يا أحضان ضميني عليك .. وفيض الشوق المني مُدفق .. طالع مني وداخل ليك .. يملا بيوت الدنيا أماني ويظهر سرو على عينيك ... **** طول اليل يا بت نتناجا .. والعينين فايضه ورقراقه .. ميتي قلوب بي شوق عينيكي .. وميتي عيونك بي أشواقا .. يا أيام وريني صباحك .. عز الشوق يا بت نتلاقا .. |
الشاعر/ جاد الله عثمان
في غرامك لي شريك ما كنت قايل في غرامك لي شريك لكن عرفتَ وتاني ما برجع إليك والله كل ما إتذكرك إتذكر إنو معاي شريك زي ما قليبي أنا إشتهاك تلقيهو أيضاً مُشتهيك قولي لي ذنبي وذنبو إيه ما الناس جميع مفتونة بيك طماعة يا ست الجمال كيفن تطيري مع جريك ما كل غرام بيظل غرام .. ما كل بريق سن إبتسام ما كُل خطوة إلى الأمام أحيان بيتعثر مشيك قولي لي كيف قلبك سمح يجرح قليب ليك إنشرح ودرتي زول كايس الفرح عيشتيهو في دنيا الترح مُستني كان تبقيلو غيمة تظلي من حراً لفح لكن بقيتيلو الهجير في وادي منو الغيم نزح لو قيس سِمِع ما كان بِجن كان يرثى لي حالي ويحِن كان يبكي زين دمعاتو تهطل فوق عيونو وتغسِلن ما بيرضى إنو الغرام يصبح سلع نتبادلِِِن ورغم الحصل... قلبي الأمين ... لا راضي لي نفسو الخِداع لا راضي لي غيرو الأنين وإحساسو يا ست الجمال ما بيرضى غيرو يعيش حزين وأنا أصلي من ريدتك قنعت وآخر وصية بقولها ليك أبقِي عشرة على البريدك لا تخيِّبي ظنو فيك أبقِي زي ليلى وبثينة الغرور لا يعتريك قالو عاقب الريد عداوة وأنا من عداوتو بخاف عليك |
الشاعر/ علاء الدين أبو سير
اتحداك أتحداك لو تنسيني أو لي حُبي تلقى بديل أنا الدرب الخطاي تمشيهو تعجز عن مشيهو الخيل حبك ليا لو تخفيهو يظهر في وشيك عديل تبدأ ملامحو في عينيك يقراها الكفيف بالليل *** ما أتولد البسير فوق دربي والبخبر دروبي قليل والدرب التطول أيامو بوصل ميسو في فد ليل *** مابتنسينى مهما كان لأظنك تلاقى سبيل والضاق الظلال فد مرة ما بيرويهو حتى النيل *** ما بحزن عليك والله لو سالت دموعك سيل جافة عيوني مما قُمته ما بتعرف عناق منديل *** لو راجني ارجع ليكى ما ترجينى مِدي حبل رجاك طويل أموت والله مليون مرة أفضل من أجيك ذليل *** برفض أطرا زول ناسيني مهما كان فراقو تقيل لمن أريد بريد بالجد لمن انسي بنسى عديل *** ما بحزن على موت ريدنا بى أيدك كان أغتيل والموت في بعض مرات يكون أفضل من العلعيل *** لو كان الجمال غاريك بي إحساسي ببقى جميل لو معتادة يجرو وراك ما بتلقيني من نوع ديل *** حترجعي يوم براك تكتشفي انو هواي مالو مثيل حترجعي لي حماي تكوسي في جنة غرامي ضليل *** والبهدي لي لحن مثالي أبادلو جميع غناهو هديل والحاول يمازح قلبي بلعب بي قليبو شليل *** متأسف على إحساس إتخيلتي انو جميل متأسف على أوهام سميناها عشق جميل *** متأسف على أحلام بيني وبينا مليون ميل متأسف لأني أهديت مشاعر ضوقتني الويل *** متأسف على شتلات زرعتها في الصحارى قبيل أتخيلتا أنها تبقى واحة ريد ثمار ونخيل *** ارتاح في ربوعا أنجما واحد من ثمارا أكيل لكن يا خسارة زراعتي كانت جوه مجرى السيل |
الاخ البلبل الغريد لقد اثريت المنتدي ولك منا الشكر اجزله كما اننا في انتظا ر المذيد منكم بس لينا طلب صغير ونرجوا منكم تلبيته وهو انزال قصيدة ( عوض ) لحاتم حسن الدابي لان هذا العوض هو كل مغترب سوداني .:(
|
مشكور البلبل الغريد وانت تضفى على منتدانا ومنتداك نكهة جديدة من الادب السودانى والشايقى خاصة لك التحية والتقدير ودمت عضوا واخا مقدرا
|
جميلة جدا القصائد التي اثريت بها المنتدي واعطيت الشباب فرصة لمعرفة هذا الضرب من الشعر. ويمتاز شعر الشايقية بجزالة العبارة والبديهية في رسم الصور والمواقف.
مشكولر ولنا طلب عاوزين قصيدة حاتم حسن الدابي في اوكامبو مع انها حديثة |
الأخوان/ عبد السلام عبد الله ومجدي أبو فروع
لكم الشكر والتقدير على مُروركم الذي أثلج صدري. الشاعر الكبير/ حاتم حسن الدابي ساري الليل يا ساري الليل : ما شفت عوض تابع النجمات فات لي قدام ؟؟ يا ساري الليل لقد ذهب عوض في ليلة من فيضان 1988م من يوم البحر الجانا وتسب وقام يوم دخل الحلة وهدم بيوتنا ترا وهدام صبحنا ضيوف ما خلاّ وراهو صلة أرحام يوم داكا عوض خلاها مرق سفره طويل مع الأيام درويشاً صغير عشرة أعوام الزول زول الله من الصلاح الرفعت عنهم الأقلام من غرس الرسل الدارو الآخرة أم خيراً دام التركو نعيم الدنيا الزايل للعبدوها وللحكام متجلبب بي تيبان الرحمة غتا وهندام متنعلت بي أرض الله الواسعة خطى الأقدام متزود شايل خير الزاد تقى وإلهام يا ساري الليل ما شفت جناح جبريل غتاهو بقالو مظلة جلوس وقيام يا ساري الليل أين ذهب عوض يبقالي نجع متوجه قاصد أرض الشام ما شفتو هناك مع الحجاج لابس الإحرام بين يثرب ومكة وفي بيت الله المكسي رخام يبقالي هناك يكون مندسي مع الخدام فتشنا سما أرض ما شفنا منام في التمر الشايل تكا سبيطو مدلول خام في الجرف الأخضر في لوبيهو وفي النجام في جدول جاري تسرسر مويتو نعيماً دام يا ساري الليل أنا داير أوصيك وأديك كلام الروح إن صعدت لي باريها وفي جنات الخلد مقام لو لاقيتو في إي مكان في إي زحام روح كلمو قولو الحلة بكت من شوقا إليك تغريك سلام |
الشاعر/ حاتم حسن الدابي
الرواسي بدر مدر يا رواسي نحن بعاد لحقنا القيفة أنت مدبج ونحن نقاسي في برد أُمشير والموج والزيفة مركبك الماليها مطارق تمشي تقيف تسرح بي كيفه مرة مغارب ومرة مشارق وانت تخاف الريح وحفيفه ساوها زينة وفوقها بيارق وانت مدبج توب وقطيفة فيها المات والضاربه الفالق والسالمين في حالة مخيفة كل الناس ترزح في كفة وانت وناسك فوق الدفة الدايشين والراسهم لفة والشاخصين في المدى للضفة صوف افضالك فوقهم جوة فوق الموية وريقهم جفة من العطش النص اتوفى وباقي النص الفضل جيفة .... ضاقوا المر والحال استعصى الشغال واللاحق الحصة الوصال للرحم اتقصة والهداي مو لاقي الفرصة الرساي سافر ما وصى خلى محمد واحمد وحفصة الاطفال العرفو القصة سدت جوة حلوقهم غصة من الجوع الدم اتمصة وأصبح كل الحلم رغيفة ..... كل الراكب شاف احلامه دون احساس ماتت قدامه فنُ كتابه وكسر اقلامه لا الوالدين لا جار ما لامه ناس الحلة القعدوا وقاموا أصر وألح يمشي كلامه هزموهو اخوانه البي الجوع نامو وكم خريج ما لاقى وظيفة ....... يا الفكيتها وقلت لها سيرى وعارف انه الدنيا دميري لا فى ضفاف لا شفنا جزيرى لا فى الحيرى ولا في الطيري كسرت جناحها وقلت لها طيرى اتملكت الكانت ميري يا السودت الناصع وجيري ايد الحق صابوني وليفة ...... قبلك كم متعلم وقاري عكس الريح فكولو الصاري مشدوهين متعشى وحارى ريسها شلته والبحاري كم سنوات علام الباري واقفي وهم شايفنها جاري بقينا هلاك والقيف متضاري لا حجار لا دوحة وريفة ..... حسك عينك ما تتمادى وتنسى الراكب عنده ارادة الأهوال الشافها وخاضها كان في مدرسة وألا عيادة شفنا الإيد الكان اجوادة يا مبتورة يا شحادة وياما رقاب كانت سدادة علمت الله من التعريفة ...... يا ريسنا قدر مديرك فك الدفة وادها غيرك أحفظ نفسك ترضى ضميرك وقف اوع تواصل سيرك كان طاوعتني شن بيضيرك عرض اكتافك وفك البيرك لا هنا شكرا وكتر خيرك وكل إنسان في الأرض خليفة |
يا طير روح أمش وتعــــــــال لـى أشرح قول لـى إيه أخبـــــــــاروا
للشاعر الرائع محمد سعيد دفع الله يا طير روح أمش وتعال لى اشرح قول لى إيــه أخبــــارو فســراع إنت عارفو قليبــى ولهان لا تزيد لى نــــــــــارو حلــق فــى سمــاك فــــوق عالى لا يهمك رياح وأمطـارو وإتجه الشمال لقريرنا تلقــى مندى زاهــى خــــــــــــدارو من عِند الحفيــر لا فوق تروح بيتـــو وتقيف فى أسوارو وأحكيلـــو العلـــى ِ بأمانــه .. جيب لــى أنــا منو كل أخبارو ذكـــرو كان نســـأهو الماضــى كيف ينســى القليب الــــدارو لا تكتر تزيد فى لـــومو .. معــزور أنا قبلــــت أعـــــــزارو روضـنـا الكان قِبيل فى خضـارو كل ما يوم يزيد فى نضارو قــوللو أصبح خــراب مِن فُــت .. فد يــوم الربيع ما زارو يبــس الكان مُخدر فيهــو ماتـــت ضبلنـــت ازهـــــــــــارو حــــلابو المَــحَـل بعُصـارو .. قّــلـع رَمّـــى كل اشجـــارو حتــى الدوبــو فرهد غصنـــــــو ما إتفتح فتـــق نــــوارو جافـــاهو الربيــــع يا خِـــلى وين زمنو البهب فى أسحارو من بعد النضــاره الفيهو وكـــتن كان يغنــى كنـــــــــــارو إنعدم البغرد شـــادى طربـــــــان عازفـــــــا أوتــــــــــارو إتحت الصَــفق من شِــدرو كان للقُمــرى فيـهو أوكـــــارو خــلَ جــناهُو فارق عِــشو حزنـــان يبكــى ينعِــى صغــارو جــار بيهــو الزمن يا خِــلى وإتفزعــت عليهـــو أقـــدارو روضــو معينو قلــت مويتــو وإنعـــدم إنقطــع سرســـارو عاشقــو الكان بيسكـــن فيهــــو رَوح عقلـــو راح مزمارو ساب أنغــامو خَــلَ غٌنــاهــو ودّر بالــــو كل أشعــــارو |
دنيا ياعبدو آخر زمن
للشاعر/ حاتم حسن الدابي -------------------------------------------------------------------------------- تاني ما بندسه الخبر نحن قدام واقع مرير فى البنات زي السوس نقر يا خى دنيا اخر زمن عوانس فى المجتمع ديل بقن للبنوت عبر قبلهن كم الات سماح ضاعن واخير ياخدن الحذر الزواج صح قسمه ونصيب حكمة مما خلقوا البشر بيهو كم عاشقين ضاقوا مر مؤمنين بيهو قضاء وقدر اوعه ما تخدعك الوجوه المندية متل الزهر تبدو مبتسمه فى الصباح وفى الدواخل عدوان وشر السماح ماهو سماح عيون واقعه متمتعه بالحور ماهو عود نادى ومستقيم نامي فوق عز وفوق بطر ما تقول سمحات الشفاه المنديه زى الزهر ما بتأكدوا ليك الكتوف المردم فوق الشعر ما تقول سمحات الشفاه الكلامن يهز الوتر ما بتأكدوا ليك الكتوف المردم فوق الشعر السماح فى العفة والدين القناعه وغض البصر دي القناعه وكنز الزمان واحتمال نكبات الدهر البنات تابعات الهوي مغرمات بالليل والسهر الغرام بقى بس بي الجيوب والبيوت والطين والمتر الواحدة تتعلق بالدروس والمراوغة منذ الصغر تنتظر لن تقضي الدروس وتسهى لمن يفوتها القطر حتي كان قلتا الامهات العرس سونو متجر اصبحن للدنيا العبوس وللقروش سعرانات سعر يا حليل زمن الابهات كانوا غسالين للصقر الزمام صار عند الحريم صار عديل البيع فى المهر فات زمان الحن والحنين الفضيلة وعاها اندثر لا تهم يا اخوي إن سمع قالوا قام شوك للعشر |
شيخ العاشقين المرحوم/ عبد الله محمد خير
المبطر زيـدي مــن لحـظـات الــوداد يــا المُبـطـر وسـيـب العـنـاد إنــت لـيــه إخـتــرت الـبـعـاد وفـــي بـلـدنـا أبـيــت الـقـعـاد القـلـوب شـوقـه علـيـك زاد وبــي وراك أعلـنـت الـحـداد مالو سفرك مـن غيـر ميعـاد بيـهـو شِمـتـو عليـنـا حُـســاد لي مـتــيــن يــنــتــم الـــمـــراد وبكره نسمع بيك جاي صاد كــم وكــم فــي الدنـيـا زهــاد بـيــك ولهـانـيـن يـــا سـعــاد مــا عيـونـي أزاهــا السـهـاد ومـن مشيـت فارقـت الرقـاد الله لـي صـبـري مــن النـفـاد ويـا حليـل قلبـي المـا استفـاد قلـبـي لــو فــي حـبــك يـبــاد يبقي زي المـات فـي الجهـاد داير أوصفو لو شعـري جـاد حاكى فرع البان فرعـو مـاد دُقــو ليـهـو الـكـف يـــا ولاد خـلـو يـبـدع زي مــا اعـتــاد يــا جمـيـل ربـنـا كـــان أراد يـبـقـى حُـبـنـا لـيـهـو امـتــداد قـلـت أسـافـر وأبـقـى شـحـاد وأمشي لـي بيتـن فـي المـزاد عــاد أدق الـبـاب والله عـــاد أسكت امشي أقيف كالجمـاد. |
| الساعة الآن 11:42 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir