|
هل هذا الموقف طريف ؟
موقف مر بى ولا أدرى اهو طريف أم محزن :
كنت قائدا لمعسكر السليت للخدمة الوطنية 1995تم إحضار دفعة للتدريب (كشـّة) وبعد الغداء دخلنا لصلاة العصر فبرز احد المستجدين( اسمه صافى الدين ) فقال لى : ياجنابو داير اتكلم مع اخوانى ديل كلام الخير والإيمان . قلت ليه أتفضل . فتحدث عن القضاء والقدر الذي يجب أن يقتنعوا به والرزق الذي ساقه الله لهم ليتناولوه بالمعسكر( وجبة الغداء ) وتحدث حديثا لايملك السامع إلا أن يستمع له . واستأذن أيضا في صلاة المغرب فأمرته أن يتحدث بعد كل صلاة على راحته لأنه كان لبقا ( كلّمنجى جنس كلام ) يحيّر .نظيف الملابس رغم ضغط التدريب . وفى صباح اليوم الثالث صباحا أخبرت المجندين المستجدين باني سأدفع لهم مبلغا لشراء مساويك للجميع ومعجون لكل عشرة أفراد وسأخصمها عندما تستلمو ا الماهية ،قالوا أحسن والله . قلت ليهم ترشحوا ليكم لجنة للشراء وكانوا 1600مستجد فاختاروا جميعا صافى الدين . فقلت ليهم الحمد لله جاءت منكم أنا ذاتي دابر أرشحوا ليكم . واختاروا معه 3 آخرون وأرسلت معهم الملازم نبيل وأربعة عساكر حراسة بالعربة البد فورد حقت المعسكر وقلت للطابور لو عندكم اى وصية توصوها للجنة الشراء عدا الصعوت والسجاير فدفع له الجميع ما عندهم من مال لإحضار السكر والطحنية والبلح (غرام المستجدين) . وأخبرت الملازم أن يترك المبلغ مع لجنة المستجدين ليقوموا بالشراء لتفادى الشوشرة وسوء الظن فتحركوا من المعسكر وعند وصولهم للمحطة الوسطى بحري للقيام بالشراء اقترح عليهم صافى الدين الذهاب للشهداء أم درمان لأنه يعرف احد التجار هناك ( صدّقوه بالاجماع السكوتى)وعند وصولهم الشهداء أوقفهم عند جبل مساويك وبدءوا في الحساب عشرة عشرين مائة، مائه وسبعين طبعا دايرين 1600مسواك وقبل المائتين رفعوا رأسهم لقوا أخونا صافى الدين اختفى في الزحمة ، فتشوه ما لقوا ليهو ريحة . . جاءوا للمعسكر حزانى غاضبين لان أخونا سنبكهم ( غشّـاهم جت ) . وعندما اخبروني أرسلت على الفور الملازم نبيل لعنوان المستجد بار كويت ومعه قوة لإحضار المستجد صافى الدين من البيت . وعند وصولهم للعنوان استقبلهم رجل ملتحي كبير السن يبدو عليه الوقار فقال لهم تفضلوا لى جوه .قالوا ليه ياخى نحن بدون اى إزعاج دايرين صافى الدين يرجع معانا المعسكر هسسسسسع...... قال ليهم يا اولادى أنا صافى الدين ذاتو .. قال له نبيل ياخ ما انت, نحن بنعرفوا كويس ده واحد شاب شكله كذا وكذا . حينها قال الرجل صاحب المنزل ايوااااااااااااااااا . يا دوب عرفتوا .يا اولادى نحن عزابة أنصار سنة والولد جانا هنا وقال مقطوع ما عندو اهل فى الخرطوم مسكناهو معانا اكثر من شهرين في البيت وعلمناه كويس ،توسمنا فيه الخير والصلاح وفى يوم طلعنا وخليناه في البيت سرق اى حاجة بيققدر عليها وباع الكثير من العفش والشردة الياها لى هسع ما لقينا ليهو اثر. اعتذر له نبيل . فعاد الملازم نبيل يحمل لخبر المضحك المبكى المخيّب للآمال . أن المستجد تلاشى تبخّر بمال المستجدين ومال المعسكر . بالله عليكم اعذرونى على الركاكة والتعابير ثم افيدونى إذا كنتم مكاني ما ذا كنتم فاعلون أتضحكون أم تبكون ؟ |
الاثنين...ببكي اول..(بعد افش مغصتي)..بضحك..هههه
عزرا للكلام قبل السلام.(سلامات) لكنه جد موقف محيير.. |
اولا شكرا لك مجدي علي هذا البوست البديع والله انا الي الان بضحك جد جد وفي نظري الموقف بالجد مضحك ولو عرفت انو انا كنت في يوم من الايام كنت مجند في الخدمه الوطنية زي ((صافي الدين التايواني)) ما ح تستغرب الراجل لذيذ والله مع انو(( السواها اكبر من محراو)) انا اتكيفة منو بالواضح وانا عارف العسكريه ((تصرف )) وما سرقه ربنا يتوب عليهو وانا بهديهو الجلالة البتقول
<او او يامريم سمبلم ماهية مافي الواسطه خربت دوله بقي سمبلم>> |
سلام سلام عليكم يدوم
اشكركم اختى الفضلى سارة كمال واخى العزيز احمد دياب على آراءكم المقدرة وعلى المرور والنجدة. |
الاخ العزيز
مجدى الطيب تحياتى لك ولاسرتك ولناس الامارات جميعا فى ابوفروع موقف مشابهة حصل لحاتم عبد الرحمن العمرابى قبضوا علية ناس الخدمة الالزامية قال انا لازم اتخارج منهم وبعد دخولة المعسكر وفى الصباح بدا يرفع فى الاذان قام قائد المعسكر قال ليهم جيبتولى واحد مجنون وقام طلع حاتم من المعسكر . اذا الظروف جمعتك بهذا الاخ (صافى الدين ) فى الامارات اليوم وبعد تركك للخدمة فىالجيش ماذا تقول لة؟؟؟؟؟؟؟؟؟؟؟؟؟ |
ضربت معلم مؤسس وانا مبسوط منو شديد وزعلان ليكم اكتر، في زمنا ده اتوقع اي شئ ،اخي مجدي وعاجزين عن الشكر وسلامي وتحياتي ليك قبل الختام ودمت.
|
واله يا كمندان الموقف صراحة مخجل جد.....والمستجدين قالين القبة تحتها فكي....
|
:D العسكرية تصرُّف:p
والله بالجد كده تصرف يحيّر وعرف المستجد من أين تؤكل المساويك |
السلام عليكم استاذى الدكتور الطيب سعيد والله متمنى أشوف خليقته بس . واخوتى الاماجد عادل والسباعى ومعتز دياب لكم التحية بوركتم على المرور العزاء
|
ابدااااااع ومبالغه ..... ده زول غريب
بعدين معلم عرف يخطط وطبق الخطه 100% بعدين يا جنابو .... القروش خصمتها من المجندين ... وله منو العوض |
لك التجلي يا أبو أصطفاء
قبل كل حاجة والله وأحشنا جد والله ياأستاز مجدي كل زول بخش العسكرية بحاول أتصرف لكن بحيهو علي زكاؤ ولفت أنتباه الناس ليهو لكن جد قصة مشوقة |
الاستاز المتألق مجدي دوما لك مني كل الاحترام والتقدير والله يعلم اني بضحك الان
ربنا يخليك تعلي المنتدي بي طرايفك وحكاويك طبعا ياشباب ابو البنيه عندو الغاز مبالغة وحكاوي جد قيمة ياريت تتحفن الله يخليك |
اولا السلام عليكم ورحمة الله ثم التحية والتجلة للاخ العزيز محمد يوسف محمد سعيد طبعا اتخصم من ميزانية المعسكر والوصاه لى حاجة منو العوض وعليه العوض ومشكور على مرورك
الابناء الاخوة بشير عمر وعبد الخالق محجوب وين انتو ؟ما تقطعوا اخباركم واخبار الدراسة معاكم ولكم تحيتى تقديرى |
حكاوي الزمن الجميــــل
|
بسم الله الرحمن الرحيم
السلام عليكم و رحمة الله تعالى و بركاته الشكر الجزيل للاخ معتز الذي ارتاد كبسولة الزمن و عاد بنا الى أجمله و السلام و الشكر الجزيل للاخ مجدي الطيب كاتب المواضيع الشيقة / نسأل الله ان نرى مشاركاتكم و مشاركات كل الرواد بلا انقطاع. زمنٌ جَميلٌ فرَّ منا مُسرِعاً وَأبى الزمانُ بِطَبْعِهِ أنْ يُرْجِعَا لَهَفِي عَلى الأيَّامِ عنا قد مضتْ كاللصِّ فَرَّ مُطَارَدَاً وَمُرَوَّعَا للهِ مَا أحْلى الشبابَ وَطَيْشَهُ كمْ سَاقنا لِحَماقةٍ وَترَاجَعَا كمْ أمْسِ ضَاحَكْنَا عُهوداً عذبةً واليومَ ذِكرَاها تُثيرُ الأدْمُعَا وَأوَدُّ لوْ أمْضِي إليْها سَاعةً فالقلبُ أشْعَلَهُ المَشيبُ وَلَذَّعَا أيْنَ الذينَ نَمَا رُبوعِيَ حُبُّهُمْ فَقَدِ اسْتحالتْ مُذْ تَناءَوْا بَلقعَا أَوَّاهُ كَمْ دار القضا بكؤوسه وَشَرِبْتُ كَأسِي بِالمَرارَةِ مُتْرَعَا يا مُوْغِلاً كالطِّفْلِ فِي أحلامِهِ هيهاتَ، أيامُ الصِّبا لنْ تَرْجِعَا يا ليتَ شِعري كيفَ حَالُ أحِبَّتِي مِنْ بَعدِ ما عنهمْ مَشَيْتُ مُوَدِّعَا أهُمو على قيدِ الحياةِ بِحارَتي أمْ أنَّ ناعِيَهُمْ بلا عِلمِي نَعَى يا سَامِعِي سَلِّمْ على مَنْ بُعْدُهُمْ أبْرَى فؤادي حَسْرةً وَتَصَدُّعَا قَبِّلْ صَديقَ العُمْرِعَنِّي قُبْلَةً خَبِّرْهُ أني لا أزالُ مُوَجَّعَا وَبأنني ما زلتُ تَوَّاقَاً لَهُ وَلِحَارَةٍ كُنَّا مَشَيْنَاها مَعَا |
| الساعة الآن 07:26 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir