|
نرجع لي موضوع فائض القيمة فائض القيمة طبعا التعريف بتاع القيمة عند اهلنا القدام هو:
العمل الاجتماعي الضروري اللازم لانتاج السلعة اهم شي في الماركسية انها ما بتخت قوة العمل مع ادوات الانتاج بل بتخت ادوت الانتاج و علاقات الانتاج في كفة و الحاصل بينها بتقيم بيهو تطور المجتمع يعين بتخت القوي المنتجة في اطار حركة ده ما قمة البشرية و الانسانية و ده كلام جميل بشبهنا نحنا المسلمين لانو الاسلام في اطاراتو الاقتصادية كلها ايات و لا احاديث ما تكلم عن الملكية الخاصة بل اتكلم عن الانسان في الايات و الاحاديث عن العدالة و اعطاء الاجر قبل ان يجف العرق ما تاكلم عن مراهي ناس ما تجي تلاتة شهور و الجماعة سفر من بلد لي بلد بس دايرين ليهم عسكري حركة في الجو من كترة السفر المهم انو قيمة العمل بتقسم لي جزء بيعكي للعامل و جزء باقي يدفع للتكلفة بي هلاكها و الباقي بيكون فائض عمل من عرق العامل طيب ما ده توزيع بس رضينا و لا ابينا دي فكرة جيدة مع امكانية نقاشها لكن ده ما بيعني انها حرام و لا كفر طيب نمشي اكتر في الطبقات المستغلة و الطبقات المستغلة الراي شنو في كلام سيدنا علي انو ما اغتني به غني الا بما افتقر به فقير يا جماعة حقو نستفيد من تجارب غيرنا الماركسية فيها كلام عن الاقتصاد مهم الكلام ده روح النص الاسلامي شاملو بس في غياب تدقيق و معرفة يعين كلام كتير بتاع تنظيم اقتصاد موجود عندنا في اصول الاسلام عايز اقول حاجة مهمة جدا التجربة الايراينة بالمناسبة استفادت جدا من التجربة الاشتلااكية و بالرغم من رايي الواضح في الشيعة الا انو تنظيمهم للدولة روحو روح اسلامية مهم جدا اسع النظر في تقدم الدولة للتخطيط و التخطيط الاستراتيجي و د ما بيتم الا بالاقتصاد المختلط في شي مهم جدا الازمة المالية العالمية الحالية وضحت بطريقة مباشرة حتي في المجتمعات الغربية البرجماتية الراسمالية انو تدخل الدولة المباشرة في كتير من اوجه السياسة المالية و النقدية و الاقتصادية واجب اكرر واجب طيب ما المشكلة كانت بين المعسكر الغربي و الاشتراكي هي تدخل الدولة و عدم تدخلها المهم يا الصديق انا الكلام ده حارقني للطيش لانو واحدة من الاسباب الادت للانهيار الحاصل في السودان هو انو الادارة السياسة للبلاد دخلت في سياسة اقتصادية ما اسلامية خالص راسمالية للنخاع و ادت الي ما ادت اليه الكلام علشان ما يكون بدون ادلة اولا الدولة اول شي عاينت ليهو التخصيص و التخصيص ادي الي سياسة البيع عاينو براكم باعو ملك الحكومة لي تجار قريبين جدا من السلطة او مشاكنهم تفريق الخدمة المدنية و الجيش و البوليس الا من الموالي ليهم ادراة الاقتصاد بناء علي الولاء الحصل شنو؟ جووووووووووووووووووووووووطة يا اخي و الله الواحد يلف و يدور و بطنو طامة الحاصل في البلد انهييييييييييييييييييار عديل السبب فيهو كل ما هو اشتراكي ما اسلامي و النتيجة لا لمو في اسلام لا حكم غايتو اواصل |
الصديق انا ما بزعل خالص في مواضيع السياسة لانو فيها امكانية الصاح و الغلط و حا اواصل
يا سارة انا بفتخر بي جيلي جد و الله جيل بري ايوه بس ديجتال شنو؟ يعين انا عرفتا كمبيوتر سنة 1985 و اتدربتا مع ناس المعونة الامريكية في وزارة المالية سنة 1987 اتدربت مع شركة بيت ماروك في لندن يعني كمبيوترتكم بنعرفها بس المشكلة عربيكم السمح ده ما بنعرفو لانو الجامعة و بعد الجامعة و نصف شغلنا كان بالانجليزي انا معترف انو كنا في الخدمة المدنية بداية عندنا صعوبة التعريب بس لانو العربية لغة الام تجاوزنا المسالة المهم انا شايف انو جيلي جيل زكي و شايف انو عندنا اشايء كويسة و شايف جيل اولادي جيل صعب و بضيع وقتو كلو في التلفزيون و الموبايل يعين نادرا ما تلقي واحد بعرف ليك قابريل قارسيا ماركيز او بابولو نيردو او ناظم حكمت او محمدود درويش قراية مافية القراية مهمة شي مهم جدا نحنا جيل كنا عند مفترق طريق بالواضح انهيار الفكر الشيوعي او الماركس او الاشتراكي من جنب و مقتل محمود محمد طه ادي الي هزة نوعية كان ممكن جدا للناس البفكرو بي عقلهم انهم يكونو في اطار حركات الاسلام السياسي بس للاسف طرح و تنظيم السلطة في السودان كان السودان كان سبب قوي جدا انو البروستريكا تكون صوفية بدل ما كانت اشتراكية مفهوم يا شباب |
تحيات طيبات ياخال
متابعين للسرد السلس...واضاءت مهمه عن النظام الاشتراكي الذي نجهله.. .. http://www.arb-up.com/files/arb-up-2...m_dVH36196.jpg |
سلام اعتذر عن اللهجة الحارة و اوصل بالمناسبة ناس الفكر الماركسي برضو اليبلوهو و يشربو مويتو كانو زمانك لاخمننا علمية علمية و كانو بانين علميتهم علي اشياء رئيسية هي 1. تعريف المادة انها لا تفني و لا تخلق من العدم 2. نظرية دارون في النشؤ و الارتقاء و طبعا نتاج كلام داورن البقاء للاصلح ( البقاق اليفسخ كرعيهم) 3. زي ما قلتا قانون الجدل الشي ونقيضو و مركب النقيضين علميتهم القالو دي لو عاينو لي الضوء و حركتو و مقاس سرعة الزمن و قياسيها بالسنين المحيراهم غربا و شرقا بي مقاس علمهم المادي و لا باقي معرفتهم بالاهوت حيلقو انهم لسع هم بعد ماركس و لينين بقرون هم جهلة ( و ما اوتيتم من العلم الا قليلا ) تانيا المتصوفة جميعهم مقاسهم للحركة الي اعلي كانت بالسنين الضوئية و بتكلمو عن طي زماني و مكاني انا ما عارف لكن الناس ديل عندهم معرفة بالحلقات الدودية و التحكم في المجالات المغنطيسية بمعرفتهم بعلم الكتاب بمكننهم من عمل حاجات العلم ما وصل ليها علشان ما ينط و احد يقول لي الشغلانة دي انتهت بي انتقال سيد الوجود سيدنا محمد صلي الله عليه و سلم بفكر الناس بسارية الجبل = التي نادي بها سيدنا عمر تالتا الان و العايز يغالط يمشي قوقل و يكتب WARM HOLES و يشوف انو الناس بتاعين اكبر جامعات الغرب وصلو لي نتيجة انو معرفتهم بعلوم الفيزياء المادية Material Physicsيعادل حوالي 5% فقط . اها طيب ال WARM HOLES بالمناسبة متاهة لانها بتوري عملية الطي المكاني في الحركة الافقية اما في الحركة الراسية فبتوري الطي المكاني اهم من ده كلو نمشي لي سورة النمل و هو انو لمن سيدنا سليمان جاهو الهدهد و كلمو بي مملكة سبأ و الملكة بلقيس و سيدنا سليمان طلب عرش بلقيس الجني قال ليهو اتيك به قبل ان تقوم من مقامك هذا اما الذي عنده علم الكتاب فقال ليهو اتيك به قبل ان يرتد اليك طرفك العندو علم الكتاب هو سيدنا اصف بن بريخا كما ورد في التفاسير و كان يعلم اسم الله الاعظم الذي اذا دعي به اجاب الشغلانة العلمية هنا كما فسرها العلميين انو سيدنا اصف حول المادة لي طاقة ده طبعا اسع وارد شوفو التلفزيون و التلفون و الراديو و كتير من الذبذبات و الدوائر المغنطيسية البتحول المادة لي طاقة و كمان عاينو لي توليد الكهرباء البتبقا ضوء شغلانة الكهربا من لي مادة في بعض الاحيان عن طريق وسيط بس سيدنا اصف بقدرة الله و علمه اللدني اعاد تحويل الطاقة لي مادة كانت موجود ا= العرش بتاع بلقيس بالمناسبة الشغلانة دي اسع المحيره الغرب و المسيخ الدجال لغاية اليومما قدرو علي الشغلانة دي الهي تحويل الطاقة لي اصل المادة التحولت منها ايوه المسيح الدجال قاعد و بي مملكتو و بي جيشو و مالو قاعد في الدنيا ام قدود ده و الله العظيم انا علي قناعة تامة بالامر ده لكنو الملعون ما قادر يصل لي علم زي ده طيب نرجع لي موضوع الطاقة و علاقتها بالماده لا تفني من العدم الماده زي هم ما بقولو ايون و برتون و بتحولن الاشكال يعين دايرين يتكلمو عن الديمومة = انا طبعا زول ادبي و ممكن اكون غلطان لو في واحد او واحدة فاهمين يجو يقولو انو كلامي ده كلام فارغ= طيب ما ياهو ده الضو بمشي و بيجي و يتختفي بدون ما تتشكل اشكال مادة تانية نمشي لنظرية دارون طيب لمن نربطها بي نظرية ماركس اليهي نفي النفي ليه لمن ترتقي اشكال الحياة للتطور ما ينقرض العنصر الاول يعين ليه ما ينفي الشي ضده طيب نرجع بالدين البسيط بتاع الخلاوي و نقول لانو واحد ماليهو تاني يظل هو كما هو يعين نفي مافي و الشغلانة خلق الشغلانة دي ذكرتني بي حديث سيدنا جابر و هي لمن سال الرسول صلي الله عليه و سلم عن اول الخلق فقال له النبي صلي الله عليه و سلم نور نبيك يا جابر الشغلانة هنا بيتكون واضحة الشغلانة نور في نور لمن يجي الايمان يجي النور و لمن يكون في كفر تجي الظلمة اهل العلم قالو لمن الله خلق الارواح في عالم الذر اي انو لمن اشهدهم علي خلق انفسهم كي لا يكون لهم علي الله حجة سجد ت جزء من الارواح و هولاء هم المؤمنين و جزء اخر لم يسجد و هولاء هم الكفار الجزء الذي سجد تاسف جزء منه علي السجود و هولاء هم من عاشوا مسلمين و ماتوا كفار اما الجزء الذي لم يسجد فقد تاسف جزء من علي عدم السجود فعاش هولاء كفار و ماتو مؤمنين طبعا دي علشان تربطها بالديمومة و الحركة و التحولات عندي انو الشغلانة شغلانة ارواح مش اجساد الاجساد صور بتتغير و ده البخلي الشيطان يصور ليهم الخلق بانو ماده بتتحول اصل الخلق يا شباب النور المحمدي و من النور المحمدي خلقت الارواح في عالم الذر و تجي للحياة و تمشي بعدها للبرزخ زو منها بعد داك يكون الحساب و الميزان و الديمومة الحقيقية اما الثواب و اما العذاب و شغلانة انو هم بتكلمو عن الصورة ده لبعدهم عن حقيقة النور المحمدي لانو نور الايمان يكون في القلوب علشان كده حتي العاصيين من امة محمد لا تاكل النار قلوبهم لانو فيها نور لا اله الا الله و لا افواهم او شفاههم لانو نطقت بالشهاده الصديق العفو يا اخوي بجيكم بكرة و ان شاء الله اكون مركز شوية |
واصل يا بروف متابعين لك التحية
|
معاك في الخط ,,, وحيرتنا بي علمك الغزير ,,,ماشاء الله
انت معاي انه الاشتراكية توجب قلة الانتاج لان الانسان اذا علم ان غيره يأخذ ثمار عمله لايستعد للعمل |
سلام الصديق
الاشتراكية بالعكس فيها عدالة توزيع يعين اسع عليك الله مشروع الجزيرة ده لو عملوهو تعاونيات و خلوهو مزارع قريب و موز و منقة و جوافة للتصدير لي الخليج بدل الحاجات دي تجي من امريكا الجنوبية ما كان حال اهلنا انصلح تعرف نحنا عندنا احسن قريب في العالم المهم يا اخوي الاشتراكية كتنظير اقتصادي صاح بس المشكلة الاقتصاد عند اهل المعرفة لليهود يتمتعون به = ملانين قروش للطيش و طيارات و ملاهي و اي شي فارغ= للنصاري يتزينون به= لبس سينما و غيرو اما للمسلمين = يدخررونة للاخرة = زكاة صدقاة بر والدين اعانة اليتيم و المستاكين و ابن السبيل و في الرقاب و الغارمين و العاملين علي امر المسلمسن= المهم تموها انا بتاع اقتصاد ما بتاع دين. ده تعريف الاقتصاد اللقيتو عند المتصوفة = علشان تدخر للاخرة انفق و اكسب زين الناس القاعدين ديل لو خلو بس مشروع الجزيرة لي التنظير الاشتراكي علشان يعملو منو مزارع تعاونية و الله ممكن يكفي البلد و يغطي الخليج كلو ما تنسي جنوب النيل الازرق برضو لمن نجي للتنمية الريفية و نعمل مناحل عسل و تربية حيوانات و طق صمغ في الغرب برضو ما في زول يلحقنا اها الناس الاسع ديل عاملنها كلها نأكل مما نلهف ما عندهم هم غير انو الموية لو ما جات بي كنارهم ما تسقس غيرهم يعني بالواضح اشتراكية او قول تجربة الاشتراكيين في المزارع الجماعية او التعاونية مهمة امتلاك الدولة لوسائل الانتاج الاستراتيجية مهم بالمناسبة بعد الازمة المالية في دول غربية كتيرة اتدخلت في الؤسسات المالية و الصناعية يعين الناس الكانو ضد الاشتراكية كمسمي لامتلاك الدولة لوسائل الانتاج اليوم بسوي شغل الاشتراكيين علشان يعالجو مشاكل اقتصادهم انا الناس ديل نفضتا ايدي منهم عديل لكن تجربتهم فيها ايجابيات اقتصادية و تحليل اجتماعي لظواهر ممكن تعالج قضايا كتيرة في مجتمعاتنا اها علشان عرفوها و وسوها هم نقول غلط انا علشان كده قلتا ليك لو في دواء اخترعوهو الشيوعين او اليهود نقول حق كفر ما نتعالج بيهو؟ سلام |
[ألبقا ق أليفسخ كرعيهم] هههه/أللهُّمَ أرحم حبوبتنا ألشُبا ك بنت إبن ألخضر. تحيا ت للجميع/صدق يا عمو ألحد يث إحلو أوي أوي وصا رأعلى من إسم كُرسيه ولا حرج عليك هنا لأن عنوان ألحد يث سا خن وكا نت ألموافقة عليه فنفخت فيه وألهبته لهباً وصا رذو شِجون وجمع نواحي كثيرة أو لها تعريفية ومن ثم إقتصا دية وألتها إقتصا دية سيا سية دنيوية وأعزبها إقتصا دية دينية وشملت جوانب كثيرة ، فبصراحة نا س قريعتي راحت لد يهم رأي في ألذي عنده علم من ألكتا ب ولد يهم أكبر من ذلك وليس لديهم رأي في عُلما ألفيزيا وألكِيمياء وغيرهم من علما ألدنيا ويؤمنون بهم ايما ن تا م ورغم إن هذه ألعلوم كلها إقتبا س ألدين. عموماً يا عموأبدعت وأحب أن أستفد منك كثيراً وسروعين ألله ترعاك. سوف أسأ لك لاحقاً ولك مني حُب سا خن. |
http://up.arab-x.com/pic/FCs63432.gif
رياح التغير التي تهب علي العالم نسفت القيم وغيرت المفاهيم ونظره البعض لبعض القيم ماهي القضيه التي تؤرقك وتستحق تسليك الضوء |
سلام شباب
جيتكم تاني المهم و باختصار المفهوم الاشتراكي في الاقتصاد متطور جدا لانو اتبني علي انو يعالج نقطة الضعف في النظام الاقتصادي العالمي كلو و هي تنظيم الدولة للاقتصاد بطريقة تراعي فيها حقوق الاغلبية و طبعا و قعوا في مشكلة كبيرة جدا لانهم بدل في الاغلبية البدافعو عتها اتاولو لي قيادية الحزب و قيادية الحزب انحصرت في الصفوة و بدل شغلانة نظام الحكم و ادارتو تمشي الي اعلي يعني من القيادة لللجماهير = المركزية للديمقراطية = اتركزت مصاير الناس في القيادات الهرمة و دي واحدة من الاسباب الادت لانهيار الاتحاد السوفيتي و منظومة الدول الاشتراكية كلها للاسف جماعتنا في السودان استفادو عن طريق المرحوم احمد سليمان في حاجات كتيرة من تجربة الشيوعيين تنظيمية بس للاسف الشديد و قعو في غلط تجربة الشيوعيين الماثلة قدامهم و هي تركيز السلطات في يد مجموعة واحدة ارجع لي موضوع مهم جدا . التجربة الاشتراكية لي مفهوم الاقتصاد مفيدة جدا و لم اجد في بحثي لفترة عشرين سنة بعد انهيار المعسكر الاشتراكي ما يخالف حسب وجهة نظري الشرع الاسلامي لانو السلام دين المساكين و الاشتراكية بتدافع عن المساكين عليك الله شفتو يوم واحد ناس البنوك ديل اسلامية و لا غيرو اشتغلو بالمساكين خليك من كده المساكين زاتهم هل بعرفو درب البنوك؟ مجرد سؤال قال بنوك اسلامية !!!!!!!! المهم برضو الاخوان في قضية مشروع الجزيرة بعد الانهيار التام ده مافي حل غير انو يعيدو الخرطة بتاعة المحاصيل و الدورة و الزراعية و يكون في اعادة تنظيم بحيثو انو تملك الحواشات لاهلها = انا عارف الجماعة ناويين علي المشروع و احتمال كبير بسبب البترول ترحل كتير من قري الجزيرة لشرق النيل = اوجود تعاونيات و ملكيات و تنويع المحاصيل مهم جدا برضو الغرب و جنوب النيل الازرق مهم جدا تدخل التقنية الزراعية و يكون في شكل من اشكال التمية الريفية لانو معطيات التطور و الاستفادة الاقتصادية كلها موجودة من طقس و نوعية محاصيل و خضروات و وفواكة حتي بتنمو طبيعيا = بتقوم بروس = مهم جدا انو في بعض التجار بدو يستفدوا من الاعشاب الطبية بدون ما يدخلوها في السياسة العامة لانو داير ين احتكار الشي ده الاعشاب الطبية السودانية ممكن تكون ثورة براها برضو ارجع للتنمية الريفية يعني اللحيوان في مناخ السافنا الممتد من دارفور و حتي حدود الحبشة دي منطقة عنية لتربية الحيوانات و عمل مناحل عسل و زراعة هشاب لطق االصمغ و الاعشاب الطبية الحكاية ما عايزها قروش و انا متاكد انو لو ده حصل الناس كلها ترجع اهلها بس اسع المساكين يزرعو و يربو بهايم تمشي تصدير نصف الربح يمشي للتجارة بدل ما يمشي للمنتج الكلام ده هو البيخل ضرس اليسار يتاورنا لي بكرة و بعد بكرة |
بعد الكلام ده ان شاء الله المرة الجاية اتكلم عن جيلي
لانو نحنا نشانا و ما كان في غير الراديو و الجرايد و الكتب رغما عني انا كنتا محظوظ جدا لانو قريت اولي اوسطي في امدرمان و شفتا التلفزيون اتذكر انو في واحد معانا كان و حدثتو عن التلفزيون قلتا ليهو التلفزيون زي الراديو بس الزول ممكن يشوف الصورة متحركة قام قال لي اقرانا تعالو شوفو عبد المنعم الكضاب قال ناس خرتوم راديهم فيهو صورة الزول زاتو تجي قام علق و قال لي انا قايلني الخرطوم ما شفتها اسع عليك الله العمارات الفي الخرطوم بتخلي الصورة تجي الجزيرة الرجل ده ما من الحلة و كان استاذ في الجامعة و اسع في الخليج لاقيتو و ذركرتو الكلام ده نكرو خالص = الشينة منكورة = طبعا الرجل ما ممكن يكون كضاب بس بكون نسا |
عودا حميدا
وجودك معنا..بدينا نزاكر شويه في النظام الشتراكي..ونحاول نعرف المفيد فيه حتي لانقطع تسلسل افكارك ننتظر مواصله حديثك عن جيلكم وهل الاختلاف بين الاجيال خلق (فجوه)..ام (هوه) تحتاج الردم وماذا نفعل لتواصل الاجيال [IMG]http://www.arb-up.com/files/arb-up-2008-6/BRL51614.jpg[/IMG] |
مرور على سبيل التحية لرواد البوست وضيف الكرسى؛ وست البوست الأخت سارة متابعين عبر المتاوقة بين الحين والآخر لهذا البوست الرائع لما فيه من شفافية وصدق؛ وتجربة ثرة أنطوت على الكثير من المحطات الهامة في حياة أبوفروعي عبر مسيرة الحياة. لذا هو في نظري بوست نموذجي لتواصل الأجيال. وإن كان هنالك ثمة محطة ينبغي التوقف عندها بالسؤال هي في البداية: 1) هل كان توظيفك في المالية بدون أي دفه تنظيمية أو علائقية من أي نوع؟ 2)كيف كان تفاعل أبوفروع مع اليسار واليمين خلال سنوات الأدلجة؟ |
سلام يا الفاتح قبيل شفتك جايي تتاوق قلتا اديك لكزه اها براك جيت
اها جيتا جيت المهم) هل كان توظيفك في المالية بدون أي دفه تنظيمية أو علائقية من أي نوع؟ اولا و بدون فخر انا طيلة فترة دراستي بالجامعة كنتا شخصيا مقاطع لكل الرحلات بتاعة الجامعة لانو طلعتا من السجن لقيت كل تمويل الرحلات و الانشطة بيمول بواسطة الاتحاد الاشتراكي . لانو مرقدو قرض معاهم ابيت امشي الرحلات كنتا بجي الحلة بشتغل في الحواشة او اي شي في البيت . بملا اجازتي و كمان مرات كنتا برجع الجامعة لبعض الشغل او المراجعة للزملاء بتاعين الملاحق . المهم انتهينا من الامتحانات شهر 8 النتيجة طلعت شهر تسعة شهر اكتوبر قدمنا لجنة الاختيار و في الوقت داك كانو بخيرونا المالية الضرائب الجمارك التخطيط التجارة المهم اجتزتا المعاينة و خيروني و اخترتا المالية و ابيت الضرائب لانو بالواضح كنتا خايف جدا من الحتت الممكن يكون فيها افساد اتذكر بالمناسبة دي حاجة حصلت في البيت مع الوالد رحمة الله عليه اولا : محمد اخوي الاكبر لمن اشتغل بعد تخرجو من جامعة الخرطوم كلية الزراعة اشتغل قبل ما شهاداتهم تطلع في هئية توفير المياه و اشتغلو علشانو يوزعو بيارات في البطانة و كان معاهو تيم و كانت عندهم عربية و بزورا القري بتاعة البطانه المهم المواطن المسكين كان مرات بدفع = رشوة عديل علشان تجيهو الخدمات = اها ناس كم قرية حاولو يرشو التيم الفيهو محمد. الوالد رحمة الله عليه كان مبسوط من محمد جدا لانو رفض الرشوة رغما عن انو بعض الاهل غفر الله لهم قالو لي محمد ما كنتا تشيل الناس كلها بتشيل المهم الكلام ده خلاني انو حتي حته فيها مجرد ظن بانو تكون محل رشوة ما افكر فيها تانيا انا المالية دي كانت شي كبير جدا بالنسبة لي اتذكر انو برضو كان واحد من اولاد خالي شغال في شركة كبيرة و بتدي مواهي كبيرة الوالد رحمة الله عليه قال لي امشي ليهو زغتا منو قلتا بيني و بين نفسي لو بكرة نجحتا في مجالي قريبي ده يمسكها لي انو هو الشغلني يعين كانت نفسي كبيرة و دي طبعا حاجة ما كويسة المهم اشتغلتا في المالية بي رغبتي و بدون مساعدة من احد و بدون توجيه من احد الفاتح اهلنا ديل ما عندهم شغلة بي السياسة و في ملاحظة ناس ابوفروع ما بهمهم ان بقيت نجم في السماء ما بسو ليك هيلامنه الا بي تواصلك معاهم و دي و الله الغربة لومتنا معاهم فيها يعين ناس الحلة بتجي اعراسهم و وفواتحهم مرحب ما بتجي مرحب بس عابيين للطيش الفواتح ما بقصرو فيها و سترة الجنازة ما بقصرو فيها لكن البقطع كراعو بقطعوهو معاهو ناشف المهم حكاية اليسار في ابوفروع حكاية قديمة و كانو فيها ناس مشوا تنظيميا فوق بس المشكلة بعد الانقسام بتاع 71 معظم ناس الجزيرة لو ما كانو كلهم مشو مع جناح احمد سليمان و معاوية سورج طبعا انا جيت بعد 74 و الفترة دي ناس ابوفروع كانو بعتبرو انقسامين = ما اقول هم منو = لانهم هم الان موجودين و ممكن يتكلمو المهم انا كنتا في الجناح التاني و البعرفو انو كان الشغل كلو في الحصاحيصا لانو ابوفروع ما كان فيها فرع بس الصداقة طبعا قيادة الفرع كانت تابعة للحزب يعني ما اتقسمت و فرع الصداقة اظنو لغاية الان قوي لانو كان من اقوي الفروع و طبعا انا علاقتي كانت بي فرع الصداقة قوية جدا و هم اصحابي لغاية الان و طبعا فيهم اولاد اهلي برضو. الشي البعرفو انو ابوفروع كان فيها اخونا و قريبنا مرشح للحزب في الجامعة و عامل في مصنع الصداقة و حوالي تلاتة طلبة في الجامعات ديل جو بعدنا و لانو ناسنا جنهم و جن المشاكل الجماعة ديل مكربين شغلهم جدا و كانو مغتغتين علي شيوعيتهم شديد بس الزي انا شقي حال و وقع في القيد برضو لاحظتا انو الاهتمام بالقراية الفلسفية في الحلة ما كان شديد المهم ناسنا ديل جنهم و جن السياسة و انا ابعدتا المسالة دي من تعاملي مع الناس لانو في والد واحد من اخوانا و هو ممكن يدخل المنبر ده و يشوف كلامي قال لي عديل ابعد لي ولدي من السياسة انا ما دايرو يدخل السجن احتفظتا بي علاقتي بي ولدو لكن كنتا حذر جدا اني اناقشو سياسيا. كانت طبعا علاقتي الكبيرة في موضوع السياسة بجانب ناس الصداقة اهلي بي اخونا ناس مصطفي قرشي و ديل فيهم جزء رتب روحو من الطلاب بعد الانقسام وكانو قويين اها الفاتح قصرتا معاك و لا زغتا سلام |
الفجوة البين جيلي و الاجيال التانية هو عدم القراية
عليكم الله اقرو اقرو اي حاجة يعني في حاجات مهمة الواحد يعرفها و يكون مثقف يعين الواحد تلاقيهو خريج جامعة ما يعرف عن الادب السوداني شي عن التاريخ السوداني شي مسلسلات انواع حاجات شنو غايتو انا الغايظني الرسائل و الله الكلام البنكتب في الرسائل ممكن يخلق مبدعين بس وثقو ابداعكم و خلوهو يكون اكثر شمولا و انساني |
متااااااااااااابعين ومقفلين القزاز
مـــلاحظة: في ناس كتيرين متابعين وقالوا ما عاوزين يعلقوا عشان ما يخربوا البوست يعني كلنا انتباه ومتابعة متعك الله والجيمع بالصحة والعافية .. . |
http://www.arb-up.com/files/arb-up-2008-6/s0r29386.gif
والتحيه..للمتابعين..والمتاوقين..ومداخلاتهم تهمنا...والبوست ليس له اتجاه واحد.. لينحرف عن مساره. شخص افتقدنا مداخلاته وهو معنا..الخال الدكتور ابوزر...كلام الاقتصاد والاشتراكيه اتوقعت يجيبو.. ولماذا لم يستمر النظام الاشتراكي في تجربتي مصر واليمن..(وكلام من هذا النوع) ..او عن.. ابوفروع في تلك الفتره هي دعوه له..ولكل المتاوقين [IMG]http://www.arb-up.com/files/arb-up-2008-6/UO330828.gif[/IMG] |
ابوسعــــــــــــــــد متعك اللــــــــــــــه بالصحـــــــــه والعافيــــــــــــــــه
وجــــــــــزاك اللـــــــــــه خيـــــــــــــــر |
ألسلأمُ عليكُم ورحمة ألله تعا لى وبركا تُهُ لي يومين ما جلستُ في جِها زلأرى ما صا ربألكُرسي من لهِيب فدخلتُ ألأن ووجدت ألكُرسي إذداد نيران وكِدتُ لا أرى شئ من إندلاع ألنيران مع ألدُخا ن فبصراحة وجد تهُ بُركا ن لما أتا هُ من وقود كبير كما ن فهذا ألوقود من طِراظ فنا ن لامعروف محنا ن لامعروف.......ألمهم ألأن مرحب بِكل إنسا ن وتحية كما ن للمُتا وقين وألمُتا وقا ت وألصا متين وألصا مِتا ت وألخ... وألخ ...وأتواألبيوت من أبوا بها . فيا عمو أبدعت وحركت سواكن وأشعلتَ كُرسيك وأخمدتهُ بعض ألشئ عندما سُئلتَ سؤال ولم توفي بإ لإ جا بة ألشا فية بإ ختصا رهو عن لونك ألسيا سي ؟؟؟ لأنك هُنا لم تُبينهُ بتا تا وإكتفيت بشئ من ألتلميح وهذا لايُجذِ ي منا أن نحكِم بأ ن لديك لون سيا سي أم لا؟؟؟. وإنهُ لكُرسي سا خِن . ولك مني حُب بُركان. |
يا جماعة سلام
و الله مشغول اليومين ديل تحياتي يا سارة و معتز و حافظ و سمير و برد عليكم ان شاء الله ادعو لينا الشغل ده يخف شوية بعدين يا شباب انا كلامي ده بقصد منو حاجة واحدة ممكن يكون عندكم انتماء سياسي بس ابعدو من التطرف ببساطة كلو شي نسبي و ما في شي مية المية علشان كده و عملا بالحديث الشريف ( احبب حبيبك هونا ما عسا ان يكون بغيضك يوما ما و ابغض بغيضك هونا ما عسا ان يكون حبيبك يوما ما ) خليكم دائما في الوسط |
عبدالمنعم سلام فتح الله عليك... بالقرب ونفحات الحب ولطائف العرفان ببركة الجمعة الجامعة والدعوة السامعة ما قصرت معاي حاشاك لا زمان في أيام شبابك ولا حاليا مع بداية كهولتك قريت ردك كلو ... وتب ما عندي عليهو إلا تعليق واحد و تعقيب واحد، وحيرة كبيرة اقتباس:
بالرغم من أنك كنت بتعارض نظام الحكم ، ومع ذلك كان حقك في التوظيف كمواطن (بمعيار الكفاءة) مكفولاً تماما وغير ومنقوص؛ وقارن ذلك باليوم... حيث الواسطة كم ظلمت، وضيعت وسلبت حقوق المواطنين، وكم دمرت البلد.... والله يجازى الكان السبب. و كود:
في ملاحظة ناس ابوفروع ما بهمهم ان بقيت نجم في السماء ما بسو ليك هيلامنه الا بي تواصلك معاهممجتمع الحلة ليهو الحق في ذلك... لانو الكسب الشخصى سواء كان مال أو علم أو جاه أو سلطة يظل كسباً شخصيا إلا بمقدار إفادتو ليهم .. والتواصل معاهم في الأتراح والافراح من أهم عناصرالتقييم الإجتماعي. كود:
الفاتح اهلنا ديل ما عندهم شغلة بي السياسةكلامك دا نسف لي قناعة راسخة عندي تتمثل في إنو حلتنا دي كانت أحسن قرية عندها وعي سياسي على مستوى قرى الجزيرة كافة وهي مشغولة بالسياسة ولكن بتحفظ؛ وقناعتي دى كانت مستمدة من التالي:- 1- أحد أبناء حلتنا من خريجي كلية غردون كان عضواً في مؤتمر الخريجين الذي كان النواة لجميع الأحزاب السياسية السودانية. 2- زيارة الزعيم إسماعيل الزعيم الأزهري (رئيس الوزراء) لأبي فروع في الخمسينيات لإقامة ندوة سياسية فيها والعنف السياسي الذي صاحبها. 3- محاولة أحد أبناء أبوفروع الترشح لينوب عن الدائرة كلها. 4- وصول أحد أبناء أبوفروع لمنصب رفيع في حكومات الأقاليم ( حاكم إقليم). 5- أحد ابناء أبوفروع كان عضوا في الإتحاد الإشتراكي لعدة سنوات. 6- شخصك كان أول معتقل ومناضل سياسي في تاريخ ابوفروع. 7- مشاركة أحد أبناء أبوفروع في محاولة إنقلابية.. لم يكتب لها النجاح. 8- أحد أبناء أبوفروع كان والياً للخرطوم (حسب تسمية اليوم). 9- أحد أبناء أبوفروع كان عضوا في برلمان الحكومة الحالية لعدة سنوات من بوابة العمل النقابي. 10- أحد أبناء أبوفروع كان وزيراً ولائياً في الحكومة الحالية. أرجو شاكراً عندما تجد السعة في الوقت والمهلة والرواقة أن تعيد معى القراءة والتركيب لتصحيح بنيان قناعتي أعلاه. |
ابو سعــــــــــــــد الســــــــــلام عليك
كم نحنا سعــــــــــــداء بجلــــــــــــــوسك فى هذا الكرسى ونتمنى لك الجلـــــــــــوس فى اعــــــــــلا المراتب لى ملاحظـــــــــــه بسيطــــــــه ولكنهـــــــــا مهمه للغــــــــــايه ارجـــــــــوا منك ان تكتــــــــب الينــــــــــا بعض التجــــــــــــارب التى من الممكــــــــــن الاستفــــــــــاده منها وانا واحد من الاعضـــــــــاء اى حرف تدونو يعنى لى الكثيــــــــــر وبالاخص الرد على ســــــــــأل ما لونـــــــــك السيـــــــــــاسى كم استفـــــــــــت منه ولك كل الحب والاحتـــــــــــرام |
الفاتح سلام
طبعا بالواضح ناس نميري كانت ايامهم الخدمة المدنية واقفة علي حيلها و الواسطة كانت في بس مستواها و مستوي تدخلها و تاثيرها كان بسيط لحدما طبعا الاراء حول التسيس = شغل الناس بالسياسة = نسبية و انا ليس في محل اتهام و دفاع حول انو الناس بتشتغل بالسياسة ام لا ده راي عندي اراء الاراء دي ممكن تكون صاح و لا غلط طيب انا شايف انو نسبية عدم الاهتمام بالسياسة مش في الاهتمام بيها نقاش و راي المسالة هي في انو الاهتمام الحقيقي هو في انو تشارك مشاركة فعالة عضوية في حزب دعوة ليهو كده القياس في الحاجات دي بيتم في مسستوي ان تكون المشاركة ذات وزن اجتماعي = يعني بدون فلسفة مني الناس التشارك في السياسة تكون كتيرة لو واحد عايز يكون اكثر دقة اليشوف المشاركة السياسة عند ناس الصداقة مثلا انا بعتقد انو السبب الاساسي عندنا في ابوفروع انو مجتمعنا كان في الوقت الانا كنتا فيهو قريب من مجتمع الحلة = يعني قاعد فيهو و بجيهو في الشهر اكتر من مرة = انو الناس بتهتم بانها تكون قريبة من بعض و ما دايره البفرقها لانو حتي و لو تعددت الاثنية فالناس اهل و كمان بالدم من نواحي كتيرة جدا و العشرة زاتها مرات بتبقا دم المهم حكاية البعرفها انو في ابوفروع في ناس كتيرة كان ليها تاريخ اداري مشرف و الناس بقت مدارء مدرية و مظفين كبار و بي وظائفهم دي اجبرو السياسين يختارهم لمل وظائف كبيرة بعيدن زاتو زمان مش مهم تكون تنتمي لي الحزب السياسي الحاكم علشان يعينوك في وظيفة ادارية كبيرة حتي لو كانت محافظ مديرية = البتعادل الان والي و لايتة او حاكم اقليم حتي وزير مرات الناس بتعين اصحاب الكفاءة يعني نميري عين ناس اكاديميين في وظائف سياسية. بالواضح عمنا بشري محمد سعيد اسمو مكتوب كا احد الوطنين الضرب انجليزي كف في كاب الجداد لكنو ما مشا و بقا حزبي صارخ الي ان توفاه الله عليه الرحمة عمنا كامل محمد سعيد اصبح محافظ للشمالية والي و ما كان معروف عنو انتماء سياسي بقدرما كان معروف بانو اداري ناجح ابن عمنا الاخ ابراهيم الهادي بقا محافظ و ما كان معروف عنو انتماء سياسي عمنا علي الطيب العرش بقا مدير اداري للخرطوم و الانتماء السياسي العرف عنو في الجامعة و لمن كان استاذ في مروي الثانوية كان ضد حكومة نميري الاشتغل فيها اداري قيادي تعرف بالواضح الناس البقو قيادين في حكومة الانقاذ بس بعرف الاخ البقا نائب والي التانين ديل و الله ممكن اخمن بس المهم في مشاركة لكن ما بالمستوي البتكون فيهو مشاركة اجتماعة يعين بالواضح كده هل اثرتا انا في اخواني و بقوا كلهم شيوعيين ؟؟؟؟؟؟؟ هل الناس التانية اثرو و اهلم بقوا كلهم اتحاد اشتراكي او كيزان= اذا كان مؤتمر وطني و لا شعبي يعني ده المقاس بعدين تعال عاين للناس الاشتغلتا سياسة من الحلة تلاقيها معظمها اهتماها السياسي ده قل لانو انا عندي راي انو ناسنا ناس ابوفروع زيهم زي ناس الوسط ( اقصد وسط السودان) ناس اخلاقيين ما بريدو الواسطات و بخافو الله لمن يكتشفو لعبة السياسة ببعدوا عنها . انا عندي مثل من اهلي مثلا عمي ابراهيم بالرغم من انو كان من رواد التعليم و من الناس المسكو وظائف كبيرة في البلد لمن البلد كانت ما فيها تعليم عمرو ما توسط لي زول = الحكاية دي ممكن ما تعجب ناس كتيرين = بس كان واضح بانو صاحب الكفاءة هو صاحب الفرصة و بالواضح عمي ابراهيم مرة رد احد اقرب الاقربين ليهوو ابا يتوسط ليهو الحكاية دي ممكن تلاقيها عند ناس كتيرين من ناس ابوفروع و شوف سيرة الروائد الاوائل في مثال تاني عمنا علي الطيب العرش انا شخصيا مشيت ليهو في موضوع بخص احد اقرابي و ساعد في الموضوع مساعدة جليلة اسال اللله يجعلها في ميزان حسانتو = بس عمنا علي الطيب رحمة الله عليه = لم يخالف لوائح و لم يتجاوز القانون بساعدك علشان الناس التانية ما تظلمك يعني اهلنا لانهم مثاليين غالبا ما بدخلو عالم السياسة بعدين ناس الحلة حسب قناعتي بقيت كبير و لا ده بعاملوك حسب تعاملك معاهم بتواصلهم مرحب ما بتواصلهم لو بقيت رئيس جمهورية في ظني ما بتفرق معاهم ناس نفسهم عالية شديدة و دي و الله حاجة كويسة جدا حافظ و معاك اخونا سمير علما اظن ما بين السطور يوضح انو انتماء السياسي في جامعة الخرطوم كان في الجبهة الديقراطية و طبعا الناس بعرفو الشيوعيين بس وممكن ناس تقول الواجهة للحزب الشيوعي بجامعة الخرطوم و علاقتي التنظيمية بيهم انتهت في جامعة الخرطوم لاختلافي معهم انذاك فكريا بس كان في حبل تواصل و كنتا شبه منظم معاهو = بالواضح الشيوعيين = حتي الالنتفاضة و شتغلتا معاهم في انتخابات 85 علي خفيف لانو تغيرت قناعتي في اشياء كتيرة و بالواضح كان الانقاذ ديل لمن رفدوني من المالية سنة 89 باتهام اني شيوعي انا كنتا خلاص قد كفرت بالفكر الماركسي مية المية حافظ ود عمي امحمد برد عليك تاني حول الاستفادة من تجربتي |
معليش يا الفاتح و الله انا دوامي ثقيل عديل
بجي من 9 الي الساعة تلاتة و من خمسة خمسة و نصف الي تسعة و نصف عشرة بالليل علشان كده مرات ما بكون مرتب الرد و ظاهر جدا اني حتي ما بلقا وقت اراجع الاخطاء الاملائية المهم و بالواضح بالرغم من اني كنتا معارض لي ناس نميري لكن السجن الكنتا فيهو يعتبر جنة للسجون الاسجنو فيها الناس بعد عام 89 . يعني بالواضح التعذيب الكان في انو يدخلوك زنزانات الاعدام يعين يهرشوك بس . و نحا و الله زاتنا كان قلبنا ميت الهرش ما بسوي فينا شي. المهم انا قلتا ليك نظام نميري كانت فيهو المهنية هي المسيطرة حتي في الاجهزة الامنية يعين تلقا الناس كلها جاية من البوليس و الجيش و عندهم اهل . يعني انا كان احد اولاد خالي محمد = رحمة الله عليه= مقدم في امن الدولة و طبعا ما انحاز لي في شي و ما دافع عني لانو كنتا انا اصلا مورط سياسيا بس كمان ما سمح لي واحد من الجهاز حتي يتمسخر علي لانو اتذكر انو كويس كان بسال مني و للتاريخ ما عذبوا طلبة خالص تعذيب جسدي الا بعد يوليو 76 و التعذيب كان لي اولاد الانصار بس و بعض الاخوان المسلمين. طبعا حكاية زيارة الازهري للحلة دي انا حدثني عنها خالي المرحوم محمد عبد الدافع و هو الكان متهم بانو كسر الرتينة بتاعة الندوة . الناس ديل شايفين انو ابوفروع دائرة مفلقة للانصار . بالمناسبة المهدي لاقي الخليفة عبد الله التعايشي في ابوفروع و كانت علاقتو وطيدة جدا بالشيخ بابكر ابو شيخ ابراهيم و جدنا سعيد كمان المهدي كان بجي ابوفروع كل يوم الاربعاء قبل ما يبقا ينشر دعتو علشان يغسل هدومو قبل ليلة الجمعة كمان قالو انو فقراء الشيخ القرشي كانو بسوا ذكر في ابوفروع و المهدي كان بيستحول و بيقول انا مهدي الله اها الخليفة عبد الله جاء بالحلة و سمع المهدي بيقول انا مهدي الله الخليفة قال ليهو اشهد ان لا الله الا الله و اشهد ان محمدا رسول الله و اشهد انك مهدي الله و قالو الخليفة ردا عليهو و قال و اشهد انك خليفة مهدي الله يعني بالواضح الخليفة عبد الله اتعين خليفة من ابوفروع اها برضو قبل كده يا الفاتح المعركة الفاصلة بين العبدلاب و كان مركزهم الهلالية و العنج كانت في ابوفروع و غالبا المعركة دي كانت في محل المدارس و الشاهد انو اسع امشي احفر تلقا العظام معليش ديه سرد بس زي ما قلتا ليك ناسنا يل حدهم في السياسة قريب بالمناسبة انا اتذكر انو لمن كنتا في الوسطي سكنتا فترة مع خالي محمد في البيت و كان بيتو بجي فيهو كل سياسي السودان محمد احمد محجوب رئيس الوزراء زاتو كانو بجيهو لانو كان مقرب جدا من الامام الهادي برضو اتذكر انو في احد اقاربنا كان اتبؤا مركز متقدم في شباب الانصار ده كلو سياسة بس برضو ناسنا ما بريدو السياسة بعدين يا الفاتح انا ما اول مناضل و لا حاجة الاستاذ الدكتور اسحق محمد الامين القرشي اعتقل فترة كبيرة بعد يوليو 71 و طبعا استاذي اسحق مد الله في ايامه كان من المبرزين في جامعة الخرطوم و هو من الكوادر الكانت مشت المانيا الديمقراطية و البعرفو انو بعد اطلاق سراحو عمل استاذ ثم مشا في مجالي الاكاديمي لانو هو اصلا زول شاطر. انا في السجن لقيت قريبي محمد المهدي بشري و لاقيتو في دبك و كان قبلي يعني النضال بتاع ناس ابوفروع قديم و طبعا من اوائل الناس الاعتقلوهم سياسيا كان خالي محمد عبد الدافع بس برضو ناس زي ما قلتا ما كانو ايامنا و قبلها بمشو كتير يعني السياسة داير تلوين ناسنا ما بقدرو عليهو لانهم دمهم حار. ده كلو سياسة بس كانت في حدود اشخاص و نسة نقاش فهم لكن حكاية الناس ينشغلو بيها كه ده ما اكان اظنو شي ممكن كان يعمم علي ناس ابوفروع بالمناسبة عندنا قريبنا كان وصل تنظيميا في الاخوان حتة كبيرة جدا قبل الانقاذ بس برضو لمن الجماعة بقت ظاهرة لبد و اسع قبل ما يكبر سابهم انا بالمناسبة كنتا قريب جدا من تنظيم الاخوان في ابوفروع لانو كان كتير من اهلي كيزان و اظن انو اولاد عمي هم من ادخل تنظيم الاخوان للحلة بس برضو ما كانو متشددين و لا اظهرو انفسهم و لا تكسبو منو و طبعا ابن عمتي الذي توفي في ريعان شبابه كان هو و ابناء عمي الطيب و ابني عمي محمد رحمة الله عليه كانو من طلاب المعهد العملمي و تم تجنيدهم بدري جدا للتنظيم ده كلام ذكروا لي هم و فيهم اتنين احياء و اتنين انتقلو لي رحمة ربهم بس برضو الحكاية ما مسوين ليها هيلامنه تعرف يا الفاتح انا لو ما اعتقلتا ما كان في زول جاب لي سيرة اديك القنبلة دي !!!!!!!!!!!!!!!!!!!!!! دكتور الطيب يوسف كان ليهو علاقة باليسار و طبعا ممكن تسالو و حيقول كتير كانو معاهو ناس محسوبين علي الحزب الشيوعي انا قلتا ليك دكتور الطيب امد الله في عمره لانو حي بس الاموات ما بقدر اقول شي عليهم الرحمة اها اعتبر المسالة ونسة و ما تزنقنا بالاسئلة الا يكون في شي ما صاح او ما تذكر سلام |
ألسلأمُ عليكُم ورحمة ألله تعا لى وبركا ته أشهد أن لاإله إلاألله وأشهد أن محمداً رسول ألله لايسعني إلاأن أقول كما قا ل أحد هم [ألنا رولعت] وكما قا ل أخر[أهلها أتو]وأركن على جنب ملاحظاً[متا وقاً]لاستفد من محا ورألنقا ش لأن ألثقا فة إستراق .وإن كا نت لي عودة سوف أعود إنشاءألله وأللهُّمَ زدوبا رك في عدد ألمُتا وقين ألذي إمتدَ ذاحِفاً.ولكم كل ألحب. |
الاخ العزيـز عبدالمنعم
السلام عليكم والتحية موصولة للجميع خاصة للاخوان الطيب وحافظ والفاتح وللاخت سارة بالطبع والبقية. سرد رائع ودروس كثيرة وكبيرة ارجو ان نستفـيد منها، ودعوتك للناس بأن يقرأوا، ثم يقرأوا، ثم يقرأوا، ثم يحاولوا ان يـفهموا دعوة مهمة ارجو ان نقف فيها كلنا كثيراً. وهناك عدة نقط استوقفـتني منها ما يتعلق بالدكتور اسحق والدكتور الطيب والفكر الشيوعي والجمهوري وغيره، لكن المـربط اظنه كله في سورة النمل مع الآيات التي اشرت اليها في الاعراف (الاية 172 خاصة). يقول ربنا سبحانه وتعالي فيها "وإذ اخـذ ربك من بني آدم من ظهورهم ذريتهم واشهدهم علي انفسهم السـت بـربـكم قالوا بلـــي شهـدنـا ان تقـولوا يـوم القيامـة إنـا كنـا عن هذا غافليـن". فالسؤال الوارد في الآية الكريمة (السـت بربـكم؟) سُـؤل له كل مخلوق بشري جاء الي هذه الدنيا واستمـرت حياته فيها الي سن الرشد والتكليف والحساب كما يبـدو من الآية. هذا اولاً. نمرة اتنيـن، إن الرد كان من الجميع بغير استثـناء (قالوا بلــي شهدنــا). فالذي مـيّـز الرسول الكريم صلي الله عليه وسلـم انه اوّل من شــهد لله سبحانه وتعالي بأنه ربـــنا. وهنا كل القصة. انظر للسؤال الوارد في الآية مرة ثانية (الســت بربــكم؟). لم يسألنا ربنا سبحانه وتعالي الست بإلهكم؟ واجابة كل مخلوق بشري كانت (بلـــي) وهذا يعني انكل البشر اقـرّوا لله سبحانه وتعالي بالقول بلـــي انت يا الله ربنا. هذا كان قبل خلق ابونا آدم عليه السلام (فيما يشير اليه البعض بأنه عالم الذر كما ذكرت، رغم ان القرآن يصفه بأنه عالم الامر – الآية 54 الاعراف) وهنا يأتي السؤال: هل بعد مجيئ البشر الي الدنيا (عالم الخلق، كما في الآية المشار اليها) هل يفهم البشر ان الله هو ربهم؟ الذي يفهم ان الله سبحانه وتعالي هو ربـّه فهو، والعلم عند الله سبحانه وتعالي، هو المـوحــّد وهو السائر خلف اول من وحــّد وهو علم الهــدي مـحـمـّد صلي الله عليه وسـلّم. والذي لا يتحد عنده مفهمومي الالوهيه والربوبية هم الكفرة والمشركين. وانظر في كل الكفار والمشركين فهم لم ينازعوا الله سبحانه وتعالي في الوهـيـتـه (وحتـي فرعون اعترف قبل الغرق بإله موسـي) وإنما المنازعة كانت دائماً في الربوبية. فالكفار قالوا، والعياذ بالله، انهم يعبدون الاصنام "لـتقـرّبهم الي الله زلفي" (يعني اتخذوها ارباباً - او وسائط – للتقرّب من الله سبحانه وتعالي). والمسيحيون جعلوا عيسي رباً (قالوا، اعوذ بالله، انه ابن الله) وغيرهم اتخذوا احبارهم ورهبانهم ارباباً من دون الله. اما الذين يتخذون من الشيوخ، احياءً او امواتاً، وسطاء لهم عند ربــنا سبحانه وتعالي، فهم في خطــر كــبير، والعلم عند الله سبحانه وتعالي. والسلام. |
http://up.arab-x.com/pic/KBQ79571.gif
غدا..نكمل...شهرا" امضيناه معكم وضيفنا وحتي لانطيل عليه اكثر نتمني ان يجد متسعا من وقت ليرد علي اخر المداخلات ويختم لقاء الشهر. وله ولكم كل الشكر http://up.arab-x.com/pic/nAL80290.gif |
ألسلأمُ عليكُم ورحمة ألله تعا لى وبركاته ألخالة سارة كثير تحايا إليكِ وإليهِ وربنا يمتعه بألصِحة ألأتم. قا ل تعالى ; {والذينَّ يُوزونَ ألمُؤمِنينَ والمُؤمِنات بِغَير ما إكتسبوا فقد إحتملوا بُهتاناً وإثماً مُبيناً}[الأحزاب;٥٨]. ---------------------------------------------------- وقال تعالى ;{ألم تَرَ إلى اْلَّذِينَّ يُزكُّونَ أَنفُسَهُم بَلِ اللهُ يُزَكىِّ مَن يَشآءُ وَلا يُظلمُون فَتِيلاً}[ألنساء;٤٩]. ------------------------------- وقال تعا لى ;{هُوَ ألذي انزلَ عليكَ ألكِتاب مِنهُ آياتٌ مُحكمات هُنَّ أُم الكِتاب وأُخر مُتشا بِها ت فأَما الَّذِينَّ في قلوبهم زيغٌ فيتبعون ما تشا بهَ مِنهُ إبتغاءَ الفِتنة وإبتغاءَ تاويله وما يعلم تا ويلهُ إلاالله والراسِخُون في العِلم يقولون آمنا بهِ كُلٌ مِن عِند ربنا وما يَذكرُ إلاأُوْلُو الأَلبابِ}[آل عمران;[٧]. ------------------------------------------------ وقال تعا لى ;{الَّذِينَ اتينَاهُمُ الكِتَابَ يَعْرِفُونَهُ كَمَا يَعرِفُونَ أبْنَآءَهُمْ وَإنَّ فَرِيقاً مِنْهُمْ لَيَكتُمونَ الحَقَّ وَهُمْ يَعْلَمُونَ}[البقرة;١٤٦]. ------------------------------------------------------- وقال تعا لى ;{وَكَذالِكَ جَعَلكُمْ أُمَّةً وسَطاً لِّتَكُونُواْ شُهَدَآءَ عَلىَ النَّاسِ وَيَكُونَ الرَّسُولُ عَلَيْكُمُ شَهِيداً وَمَا جَعلْنَا القِبلةَ الَّتِى كُنتَ عَلَيْهَآ إلَّا لِنَعْلَمَ مَن يَتَّبِعُ الَّرسُولَ مِمَن يَنَقلَبُ عَلَى عَقِبَيهِ وَإن كَانَتْ لَكَبِيرَةً إلا عَلَى الَّذِينَ هَدَى اللهُ وَمَا كَانَ اللهُ لِيُضيعَ إيمَانكُمْ إنَّ اللهَ بالنَّاسِ لَرَءُوفٌ رَّحِيمٌ}[البقرة;١٤٣]. --------------------------------------------------- وقا ل تعا لى ;{إنَّ الَّذِينَ آمنوا وعمِلواالصَالِحات واقا مُواالصلواةَ وَءَتُواْ الزَّكواة لهُم أَجرُهُم عِنَد ربهم ولا خوفٌ عليهم ولا هُم يحزنون }[البقرة;٢٧٧]. وقال تعالى ;{فَرِحِينَ بِما اتآ ءَاهُمُ اللهُ مِن فضلِهِ وَيَستَبشِرُونَ بالَّذِينَّ لم يلحقوابِهِم مِن خلفِهِم أَلاَّ خَوقٌ عَلَيهِمْ ولَا هُم يَحزنُونَ}[آل عمران;١٧٠]. وقال تعا لى ;{وَعِبَادُ الرَّحْمن الَّذِينَ يَمشُون عَلَى الأَرضِ هَوناً وَإِذَا خَاطَبَهُمُ الجَا هِلوُنَ قَالوُاْ سَلَماً}[الفرقان;٦٣].[/center] --------------------------------------------------------------- |
[الدكتور الفاضل معز سلام عليكم
الاية 172 في الاعراف تتكلم عن خلق الاراوح و كما تعلم فان تعريف الروح في السايق الاسلامي هو من الامور التي تدخل عالم الحيرة و الحيرة كما تعلم عند المؤمنين هو السبر في اغوار الايمان بالغيب. انما الروح من امر ربي و كما تعلم فان اليهود قد حالوا سؤال سيد الخلق اجمعين سيدنا محمد صلي الله عليه و سلم عن الروح و اهل الكهف لاحراجه و جاء قول الله بان الروح من امر ربي ، و جاء في اماكن اخري معني اخر للروح الا ان الارواح هي التي خلقت قبل سيدنا ادم و تنفخ الاراواح في الشهر الرابع في بطن الام عند ارجح الاقوال الملاحظ ان الارواح في حركة صعود و هبوط اي ان الارواح من عالم الذر تاتي الي عالم الحياة = عالم الحياة الدنيا عالم الاجساد= و تكون النفس البشرية التي تكون حركتها شد و جذب بين احتايجيات الجسد الحيوانية و نورانية الروح ذات الفطرة الايمانية و التي شهدت لله كما ذكرت بانه الله في عالم الذر الشغلانة هي كالاتي خلقت الارواح في عالم الذر تنفخ في الاجساد في بطن الام تخرج النفس البشرية المكونة من جسد و روح الي عالم الدنيا = الممر الفانية خلال الحياة و عند النوم تصعد الروح من الجسد و تكون اما قريبة للجسد او صاعدة الي عالي المقامات و هذا يعتمد عليالعمل في الدنيا ايضا كما ورد في كتاب الروح لابن القيم الجوزيه و في الموت الاصغر تبيه و دلالات عظيمة و دروس مستقاة لمن اراد تخرج الروح من الجسد الي عالم البرزخ عند الموت ينفخ في الصور لخروج الارواح من عالم البرزخ ليوم الحساب بعد الحساب و بعد الحكم العدل تعيش الارواح في عالم الخلود ثوابا او عقابا و طبعا المسالة في كثير من الاخذ و ارد اما ايماني بها فانها من امر ربي و ما اوتيتم من العلم الا قليلا الاخ سمير ابو العزايم مشكور علي المرور في النهاية اتمني ان اكون عند فائدكم و اشكر جميع من تداخل معي او شارك بالقراءة او التعليق كما اعتذر عن الاشايء التي لم استطع الاجابة عليها نسبة لزحمتي الشدية و في النهاية سلام و اشكر مضيفتي الابنه سارة [/b] |
شكرن كثيير
نهايه الاستضافه..لاتعني اكتفاؤنا من خبرتكم وستبقي كتابتكم سجل لمحطات في حياتكم.. محفوظه في..المنتدي اي وقت رايت ان تضيف جديد..سنكن سعداء بالقراءه http://up.arab-x.com/pic/rOD76210.jpg |
| الساعة الآن 01:19 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir