الاخ حاتم ..... تحياتى واشواقى ...... مبروكة البنية ..... واعتزر عن تاخير التهنئة لظرف ..... حبوباتنا قالن الببكر بى بنية مابفقر .....هنئا لك الرزق الوفير .

بسم الله الرحمن الرحيم
الأخ النور حسب الرسول
السلام عليكم و رحمة الله تعالى و بركاته
بارك الله فيك و في آل بيتك , شئ جميل ان أفتح المنتدى و أجد تهانيكم التي جعلتني ادخل المنتديات مستبشرا في كل صباح و أشكرك جزيلا على اضافة معلومة الحبوبات التي تعبر عن أصالتك و هي معلومة تعتبر مكسب لنا لايقدر بثمن و الدلالة على صحة كلامهن تبريكاتكم و دعواتكم التي هي في حد زاتها رزق وفير لنا .
تسلم يا أخي النور و أرجو منك و من كل الأحباب ان تلبو دعوتي لحضور سماية حنان اليوم الاربعاء 2013/09/18.
و أسال الله ان يوسع في رزقك و رزق الاحباب يا اخي النور حسب الرسول

مبروك تاني وتالت

:d بس يا أبو حنان كيف نلبي الدعوة ؟ شنو عزومة المراكبية دي
:D بالنسبة للأعضاء خارج السودان أقترح ترسل رصيد :d




....
..
.

الاخ حاتم ...... تحياتى واشواقى ....... شكرا ليك كتير على الرد البشبة المدرسة التى تخرج منها حاتم .... مدرسة محمد دفع اللة الديس ...... وشكرا كذلك العزومة مقبولة وكما ذكر الاخ معتز الرصيد ماهو بطال .... تمنياتى لك بالتوفيق فى كل حياتك .

بسم الله الرحمن الرحيم
السلام عليكم و رحمة الله تعالى و بركاته
الشكر الجزيل لأخواني معتز و النور على قبول دعوة المراكبية و ذكرتني يا أخوي معتز بدعوة الرصيد واحد جاه ضيف و الضيف لقى صاحب البيت بظبط شية سمحة و الضيف بقى لما يصحى من النوم طوالي بقول لأخونا صاحب البيت الليلة اظبط الشية كويس (أوامر), في يوم من الايام صاحب البيت فلس و الضيف قال ليه اظبط الشية , صاحب البيت ما لقى قروش يجيب بيهن اللحم للشية و عاين جاي جاي أخونا فكر في شنطة الضيف شنطة سمسونايت سمحة شديد اخونا فتح الشنطة و طلع منها الأغراض و الضيف يعاين و ما عارف زولنا داير يسو شنو بالشنطة , صاحب البيت مشى السوق و عمل اللازم باع شنطة الضيف و رجع ظبط الشية و هنا الضيف ادرك انو لحم الشية بحق الشنطة ,الضيف أكل لكن ما قدر يقول اي كلمة لصاحب البيت لأنو صاحب البيت قال ليه الشية دي بقروش شنطتك , تاني يوم جا صاحب البيت للضيف و قال ليه : أها يا أخوي اليوم ما مشتهي ليك شية؟؟؟ الضيف قال ليه لا لا لا, . لذلك يا اخواني معتز و النور لما تجو لدعوة الرصيد كل واحد يجيب معاه شنطة سمسونايت و الحصاحيصا قريبة و انا بكتر الرصيد.
الاخ النور حسب الرسول مشكور على قبول الدعوة و الشكر الجزيل على افراد مساحة ذكرت فيها اسم الوالد محمد دفع الله و ان شاء الله سوف تصله تحياتكم .
نسأل الله ان يحفظ والديكم ووالدي كل الاحباب.

http://www14.0zz0.com/2013/10/01/16/801742815.jpg
حاتم ربنا يحفظها ويجعلها قره عين لكم تم ارسال هذه الصوره بواسطه الواتساب لى ارسلها لك ولك ولامها الف تحيه واحترام

بسم الله الرحمن الرحيم
المحترم الخال اطيب سعيد
السلام عليكم و رحمة الله تعالى و بركاته
الشكر الجزيل لك و لمن ارسل (ارسلت) لك الصورة بالواتساب أشكركم على انسانيتكم و احاسيسكم المرهفة التي تتعمق في وجدان الغير بلطف و تعرف ماذا يريد و يأتيه منكم ما يحلم به , فأنتم ممن أختصهم الله بقضاء حوائج الناس نسأل الله ان يحفظكم و أن لا يحرمنا منكم .
و جزاكم الله عنا خير الجزاء

الف مبرووووووك المولوده الأخ العزيز حاتم
وبارك الله لك في الموهوبه وشكرت الواهب وحمدته
وربنا اجعلها لكم من الصالحات واحفظها لكم امييييين

بسم الله الرحمن الرحيم
الأخ/ احمد امام العالم
السلام عليكم و رحمة الله تعالى و بركاته
الله يبارك فيك و جزاك الله عنا خير الجزاءعلى التهاني بمناسبة المولودة , و نسأل الله ان يهب ليكم كل جديد سمح و نهنيكم عليه.

الف مبرووووووووووووك ياخال وبعتزر عن تأخير التهنئه
http://im38.gulfup.com/tM3yn.jpg